Koronavirusla mübarizə və bununla əlaqəli qlobal peyvənd prosesi medianın diqqət mərkəzində olmaqda davam edir. Bunda müəyyən bir rol müvafiq istehsalçılardan ayrı-ayrı ölkələrə peyvənd tədarükünün pozulması ilə əlaqəli qalmaqallar tərəfindən oynanır. Eyni zamanda, digər ölkələr növbədənkənar peyvənd alırlar.
12 martda UNICEF (Birləşmiş Millətlər Təşkilatının Uşaq Fondu) rəsmiləri bu günlərdə Gürcüstanın COVAX sistemi ilə AstraZeneca-SKBio (Koreya Respublikası) tərəfindən istehsal olunan 43.200 doza AstraZeneca/Oxford peyvəndinin ilk partiyasını alacağını açıqladılar. Gürcüstan mediasının yazdığına görə, bu partiya artıq martın 13-də Tiflis Beynəlxalq Hava Limanına gətirilib. Rəsmi məlumata görə, hökumət peyvəndi ölkənin bütün bölgələrinə paylayacaq. Peyvəndlənmə hökumətin müəyyən etdiyi prioritet qruplar daxilində həyata keçiriləcək. Önümüzdəki həftələrdə Gürcüstan AstraZeneca-dan 129,600 doza alacaq.
Məlum olduğu kimi, Azərbaycan keçən il COVAX platformasına qoşulan ilk ölkələrdən biri oldu. Bununla yanaşı, 3 martda Azərbaycan İcbari Tibbi Sığorta Agentliyi (AİTSA) xüsusi bəyanat yayaraq, COVAX vasitəsilə Azərbaycana peyvənd tədarükünün pozulduğunu bildirdi: “COVAX təşəbbüsü çərçivəsində Azərbaycana müvafiq peyvənd verilməsi vədi bu günə qədər yerinə yetirilməyib. Bu yaxınlarda COVAX-dan alınan məktub yaxın zamanlarda Azərbaycana müvafiq peyvəndlər verə bilməyəcəklərini bir daha təsdiqlədi”.
Bu cür münasibət ən azı çaşqınlıq yaradır. Nə üçün ölkəmizdən daha gec müraciət edən bəzi ölkələr peyvəndi daha erkən alırlar? Bu ayrıseçkilik nədən irəli gəlir?
“Sanki müəyyən dairələr çalışırlar ki, Azərbaycan virusa yoluxmanı dayandıra bilməsin”
Məsələyə münasibət bildirən tanınmış həkim Aydın Əliyevin sözlərinə görə, COVAX platforması çərçivəsində Azərbaycana münasibətdə yaşananlar siyasi motivlərdən qaynaqlanır: “Təəssüf ki, artıq dünyada xəstəlikləri də siyasilər idarə edirlər. Özü də xeyirli siyasətçilər yox, ziyanlı siyasətçilər bu işi görürlər. Bu, dünyada artıq bir faktdır. Sözügedən məsələ və ondan irəli gələn problemlərin həlli həkimlərin əlindən çıxıb. Bir növ, siyasilər həkimlərin məşğul olduqları işdən silah kimi istifadə edirlər. Azərbaycana da bu cür münasibət məhz bu kimi ikili siyasətdən qaynaqlanır. Belə olmasaydı, o zaman COVAX çərçivəsində vaksin preparatlarının gətirilməsi heç bir əsas olmadan gecikdirilməzdi. Azərbaycanın maddi imkanının olmasına, müqaviləni vaxtında imzalamasına baxmayaraq, vaksinlərin ölkəyə gətirilməsi gecikir. Daha dəqiq desək, dünyadakı müəyyən dairələr bunu gecikdirirlər. Burada xristian amilinin də rolu var. Bir növ, müəyyən dairələr bu amildən də Azərbaycana qarşı istifadə edirlər. Məqsəd Azərbaycanın inkişafına əngəl törətməkdir. Sanki müəyyən dairələr çalışırlar ki, Azərbaycan virusa yoluxmanı dayandıra bilməsin. Nəticədə ölkə daha çox zərərə məruz qalsın. Bax, budur onların çirkin məqsədi, niyyəti”.
Tanınmış həkim onu da qeyd etdi ki, Azərbaycan digər ölkələrdən dünyada qəbul olunan vaksinlərin alınmasına daha çox önəm verməlidir.
Vidadi ORDAHALLI
