Bakının Sabunçu rayonu, Pirşağı qəsəbəsində çirkab sularının dənizə axıdılması ilə bağlı sosial şəbəkələrdə görüntülər yayılıb. Görüntülərdən aydın olur ki, ətraf kəndlərin tullantı suları Pirşağıda iri borular vasitəsilə Xəzərə axıdılır. Balıqçılar bildirirlər ki, artıq buradan balıq tutmaq mümkün deyil. Ərazidə suiti və balıqların kütləvi ölümü müşahidə olunur. Bu sulardan tutulan balıqların yeyilməsi təhlükəlidir.
Qeyd edək ki, bir neçə aydır Pirşağı qəsəbəsində çirkab sularının dənizə axıdılması məsələsi aktuallığını qoruyur. Bu problemin bir neçə aydır yaşanmasına baxmayaraq, hələ də öz həllini tapmayıb.
“...Xəzərin biomüxtəlifliyi üçün də təhlükəlidir”
Məsələ ilə bağlı fikir bildirən ekoloq Aygün Əliyeva qeyd etdi ki, çirkab sular torpağın eroziyasına və içməli suyun kimyəvi maddələrin təsirindən çirklənməsinə şərait yaradır: “Pirşağı çimərliyinin sahilinə kimi böyük ərazini əhatə edən çirkab suları vətəndaşların sağlamlığını da təhlükə altına salır. Çirkab suların dənizə axıdılmasının səbəbi mərkəzləşdirilmiş kanalizasiya sisteminin olmamasıdır. Ümumiyyətlə, baş verənlər ekoloji cəhətdən təhlükəli hal kimi qiymətləndirilir. Məlumat üçün qeyd edim ki, çirkab sularının dənizə axıdılması insan sağlamlığı ilə yanaşı, Xəzərin biomüxtəlifliyi üçün də təhlükəlidir.
Çirkab suların birbaşa təmizlənmədən dənizə axıdılması müxtəlif dəri, mədə-bağırsaq və s. xəstəliklərə səbəb olur. Vətəndaşlar sağlamlıqları üçün bu ərazilərdən yay fəslində çimərlik kimi istifadə etməməlidirlər”.
Həmsöhbətimiz onu da əlavə etdi ki, kanalizasiya suları təmizləndikdən sonra dənizə axıdılmalıdır: "Qonşu Türkiyədə kanalizasiya suları təmizləndikdən sonra dənizə axıdılır. Kanalizasiya suyu o qədər təmizlənir ki, içməli sudan fərqləndirmək mümkün olmaz. Bu qədər təmizlənməsinə baxmayaraq, həmin sular xüsusi borularla dənizin daxilində 5 kilometr məsafəyə buraxılır. İçməli suyun bir litrində 1 qram, Xəzər dənizinin suyunun 1 litrində 13-15 qram duz var. Kanalizasiya suları təmizlənib dənizə axıdıldığı təqdirdə dənizin suyunun tərkibinə təsir etmir. Təmizlənmədiyi halda isə kanalizasiya suyunun tərkibində olan zərərli maddələr dəniz suyuna qarışır. Belə olan təqdirdə həmin ərazilərin çimərlik kimi istifadə edilməsi sağlamlıq üçün təhlükəlidir”.
Günel CƏLİLOVA
