Ombudsman Səbinə Əliyeva 2020-ci il üzrə Milli Məclisə məruzəsində vətəndaşların ölkədən çıxışına yalnız məhkəmənin qərarı ilə məhdudiyyət tətbiq edilməsi təklifi ilə çıxış edib.
O, məruzəsində bildirib ki, şəxsin ölkədən çıxışına məhdudiyyət yalnız məhkəmə qərarı əsasında qoyulmalı və qəbul edilmiş qərara dair müvafiq şəxsin əlaqə vasitələrinə (mobil nömrəsinə, elektron poçt və ya ev ünvanına və s.) xəbərdarlıq bildirişinin göndərilməsi ilə bağlı müddəalar qanunvericiliyə əlavə olunmalıdır: “Hazırda kredit borcu, vergi borcu, məhkəmə qərarının icrası, istintaqa cəlb edilmə və s. hallarda şəxslərin ölkədən çıxış hüququ müvafiq qurumlar (Vergi Xidməti, Daxili İşlər Nazirliyi, Ədliyyə Nazirliyi və s.) tərəfindən xəbərdarlıq edilmədən məhdudlaşdırılır. Bu barədə vətəndaşa hər hansı bildiriş verilmədiyi üçün ölkədən çıxmaq istəyən şəxs bu barədə yalnız sərhəd-keçid məntəqəsində xəbər tutur və bu da bir çox problemə səbəb olur”.
Ekspertlər hesab edirlər ki, bütün hallarda, hər hansı bir vətəndaşın ölkədən çıxışına “stop” qoyulması ilə bağlı istintaq qərar qəbul edirsə, bununla bağlı mütləq şəkildə məhkəməyə müraciət etməlidir. Vətəndaş təqsirləndirilən statusunda deyilsə, ölkədən çıxışına “stop” qoyulması düzgün deyil.
“Vətəndaşların ölkədən çıxışına yalnız məhkəmənin qərarı ilə məhdudiyyət tətbiq edilməlidir”
Ombudsmanın məlum təklifinə münasibət bildirən Azərbaycan İnternet Forumunun prezidenti Osman Gündüz dedi ki, hazırda "Sərhədi keçməyə məhdudiyyət siyahısı"na görə 11 dövlət qurumu vətəndaşın ölkədən çıxışına qadağa – “stop” tətbiq edir: “Yalnız borcu olanlar bunu qabaqcadan öyrənə bilərlər. Digərləri isə, adətən, sərhədi keçərkən, pasport yoxlaması zamanı qadağa ilə bağlı məlumatı əldə edə bilirlər. Bu baxımdan hesab edirəm ki, məlum mövzu ilə bağlı ombudsmanın təklifi aktualdır və faydalıdır. Ümid edirəm ki, aidiyyəti qurumlar bildiriş sistemini tez bir zamanda hazırlaya biləcəklər”.
Günel CƏLİLOVA
