Damarda azərbaycanlı qanı axırsa, dünyanın harasında həyata göz açdığının bir fərqi yoxdur. O vətən, torpaq sevgisi ruhunu ovsunlayar. Qürbətdə dünyaya gələn ancaq vətən torpağı uğrunda şəhid olan qəhrəmanları az eşidib, görmədik.
Belə qəhrəmanlardan biridir Musibov Veysəl Yadulla oğlu. 1989-cu il fevralın 15-də Qazaxıstan SSR Taldı Kurqan vilayətinin Kirov qəsəbəsində anadan olub. Veysəl ailənin yeganə oğul övladı bir bacının qardaşı idi. Veysəl qürbətdə dünyaya gəlsə də onun 2 yaşı olanda ailə Naxçıvan Muxtar Respublikasının Şahbuz rayonunun Sələsüz kəndinə köçüblər. Elə həmin kənddə yerləşən Vahid Ələkbərov adına məktəbdə təhsil alıb. Atasını erkən yaşlarında itirən Veysəl uşaqlıqdan anasının ən böyük dəstəkçisi olub. O, 7 - ci sinifi bitirib və Hərb peşəsinə yiyələnmək üçün Heydər Əliyev adına Hərbi liseyə qəbul olub. 2007-ci ildə liseyi bitirib. Həmin ildən 2011-ci ilə qədər AAHM - da oxuyub. 2011-ci ildə N saylı hərbi hissədə Tağım komandiri kimi çalışıb. 2012-ci ildə Xüsusi Təyinatlı Qüvvələrin (XTQ) kursunu keçib. Xüsusi əməliyyat qrup komandiri vəzifəsində xidmət edib. 2012-ci il 2016-cı illər ərzində bir çox döyüşlərdə iştirak edib. 2016-cı ildə ordumuzun qalibiyyəti ilə nəticələnən Aprel döyüşlərində də böyük şücaət göstərib. Həmin o zəfərdə payı olanlardan biri də Veysəl idi.
Veysəl bir çox yarışların da qalibi olmuşdu. 2018-ci ildə Ordu arasında keçirilən kəşfiyyatçı qrup yarışında 1-ci yerin sahibi olmuşdu. Bundan başqa "Efes - 2018" Xüsusi Təyinatlılar yarışında iştirak edən 24 ölkə arasında qrup olaraq 1-ci yerin sahibi olmuşdular. 2018-ci ildə xüsusi əməliyyat taborunda əməliyyat zabiti olmuşdu. 2019 - 2020-ci illərdə xüsusi əməliyyat taborunun qərərgah rəisi vəzifəsində çalışmışdı. Ömrünün hər anını vətən naminə yaşayan bu qəhrəman getdiyi yolun məsuliyyətini hər zaman hiss edirdi. O yaxşı bilirdi ki, torpaqlarının bir qismi işğal altında olan bir ölkəyə savadlı hərbçi lazımdı. O yiyələndiyi bilik və bacarığını zamanı gəldiyində vətənin işıqlı günə çıxması üçün sərf etmək arzusunda idi. Veysəl kimi minlərlə vətən oğlu vətəni azad görmək arzusu ilə yaşayırdılar. Onlar o azadlığın müjdəçilərinin özləri olduqlarını gözəl bilirdilər.
27 sentyabr 2020-ci il. Bu tarix hər bir azərbaycanlının yaddaşına həkk olunub. Çünki azadlığa uzanan yolun təməli o gün atıldı. Vətən müharibəsinin başladığı ilk günlərdən döyüşlərin ən qızğın nöqtələrində vuruşanlardan biri də Veysəl idi. O, Kəlbəcər rayonu istiqamətində, Murovdağ yüksəkliyinin azad olunmasında müstəsna xidməti olan hərbçilərdən biridir. Eləcə də Füzulinin bir çox kəndlərinin azad edilməsində iştirak edib. Son döyüşü isə Cəbrayılın azadlığı uğrunda olub. Mürsəlov Veysəl 7 oktyabrda Cəbrayıl rayonunda qəhrəmancasına şəhadətə yüksəlib. Neçə-neçə qəhrəmanların qanı, canı bahasına azadlığa qovuşdu Qarabağımız. İndi həmin o oğullar əbədi olaraq vətən qoynunda uyuyublar. Veysəl Musibov 8 oktyabr 2020-ci ildə Xırdalan şəhər Şəhidlər xiyabanında can verdiyi torpağa tapşırılıb.
Orduda xidməti zamanı "Qüsursuz xidmətə görə" lll dərəcəli medalı, "Azərbaycan Ordusunun 90 illiyi" yubiley medalı, "Azərbaycan Ordusunun 95 illiyi" yubiley medalı, "Azərbaycan Ordusunun 100 illiyi" yubiley medalı, "Hərbi xidmətlərə görə" medalları ilə təltif olunan qəhrəman şəhadətə ucaldıqdan sonra "Vətən müharibəsi qəhrəmanı" medalı, "Vətən uğrunda" medalı, "Cəbrayılın azad olunmasına görə" medalı və "Zəngilanın azad olunmasına görə" medalları ilə təltif edilib.
Vətən müharibəsi qəhrəmanının 2 övladı bu gün atalarının şəhid adı ilə qürur duyur. Onlar hələ atalarının şücaətlərinin böyüklüyünü dərindən dərk etmirlər. Onlar böyüdükcə necə bir qəhrəman atanın övladları olduqları ilə daim fəxr edəcəklər.
Manya SƏXAVƏTQIZI
