Vaksinasiya insanları koronavirus pandemiyasının cəngindən xilas edən yeganə vasitədir. Odur ki, koronavirusa yoluxmamaq üçün hər bir insanın vaksinasiya olunması vacibdir, hətta qaçılmazdır.
Təbii, hər bir ölkədə vaksinasiya prosesində vətəndaş aktivliyi əsasdır. Məsələn, biz bu aktivliyi Türkiyə vətəndaşlarında daha çox müşahidə edirik, qardaş ölkədə ictimaiyyət vaksinasiya prosesində çox fəal iştirak edir, vaksinasiya ictimaiyyət tərəfindən təbliğ edilir, demək olar ki, vaksinasiya əleyhinə hər hansı bir proses getmir.
Azərbaycanda isə ayrı-ayrı nümunələri nəzərə almasaq, ictimaiyyət arasında vaksinasiyanın təbliği elə də geniş deyil.
Azərbaycam ictimaiyyətini bu məsələdə necə fəallaşdırmaq olar, bunun yolları nə ola bilər?
Pərvanə Vəliyeva: “...millət vəkilləri, tanınmış dövlət adamları, daha sonra məşhur sənətkarlar, yaşlı ictimai və elm xadimləri, ətrafında müəyyən qədər kütlə olan blogerlər...”
“Sağlamlığa Xidmət” İctimai Birliyinin icraçı direktoru Pərvanə Vəliyevanın sözlərinə görə, cəmiyyətin tanınmış nümayəndələri vaksinasiya məsələsində daha aktiv iştirak etməlidirlər ki, bu, sadə vətəndaşlar üçün də bir nümunə olsun: “Məlumatlandırma üçün bir çox vasitə var. İlk növbədə, millət vəkilləri, tanınmış dövlət adamları, daha sonra məşhur sənətkarlar, yaşlı ictimai və elm xadimləri, ətrafında müəyyən qədər kütlə olan blogerlər vaksinasiya prosesində aktiv iştirak etməlidirlər. Fikrimcə, vaksin vurdurmanı trend halına gətirmək lazımdır. Vaksinasiyanı televiziya proqramlarında hər gün səsləndirmək və önəmini vurğulamaq lazımdır. TV-də canlı bağlantı ilə peyvənd vurulan tanınmış insanlar göstərilə bilər və bununla da insanlar canlı olaraq həmin şəxslərin peyvənddən öncə hansı prosedurlardan keçdiklərini, peyvənddən sonra nə hiss etdiklərini əyani izləyə bilərlər”.
Leyla Bayramlı: “Kifayət qədər maarifləndirmə işi aparılsa, vətəndaşların bu prosesdə daha çox aktivlik göstərməsinə nail ola bilərik”
Həkim-terapevt Leyla Bayramlının da fikrincə, vaksinasiyanın təbliği sahəsində vətəndaş aktivliyini artırmaq üçün tanınmış şəxslərin timsalında örnəklər təqdim və təbliğ edilməlidir: “Deyə bilmərik ki, Azərbaycan vətəndaşları vaksinasiyaya biganədirlər. Əksinə, kifayət qədər insan var ki, vaksin vurdurmağa maraq göstərir. Doğrudur, bizdə vaksin məsələsində ictimai aktivlik Türkiyə ilə müqayisədə bir qədər zəifdir. Hesab edirəm ki, ictimaiyyətin vaksinasiya prosesində daha fəal olması üçün həkimlər, ictimaiyyət nümayəndələri, elm, mədəniyyət, dövlət xadimləri, kütləvi informasiya vasitələri tərəfindən maarifçilik işləri davam etdirilməlidir. KİV cəmiyyətə vaksin vurduran ayrı-ayrı tanınmış şəxslərin timsalında vaksinin əhəmiyyətli olduğunu çatdırmalı, təbliğ etməlidir. Burada vətəndaş cəmiyyəti institutunun da rolu olmalıdır. Maarifçilik tədbirlərinin daha da gücləndirilməsinə ehtiyac var, kifayət qədər maarifləndirmə işi aparılsa, vətəndaşların bu prosesdə daha çox aktivlik göstərməsinə nail ola bilərik. Amma bütövlükdə götürdükdə, qeyd etdiyim kimi, vətəndaşlar arasında vaksin vurdurmağa kifayət qədər maraq göstərənlər var. Biz ona nail olmalıyıq ki, insanlar daha kütləvi şəkildə bir-birinə vaksin vurdurmağı tövsiyə etsin” - deyə L.Bayramlı qeyd etdi.
İradə SARIYEVA
