Biz, adətən, koronavirusa yoluxanların artmasını vətəndaş məsuliyyətsizliyi, diqqətsizliyi, onların qaydalara riayət etmək istəməməsi ilə əlaqələndiririk. Yoluxma dinamikası yüksələn kimi deyirik ki, vətəndaşlar qaydalara riayət etmədi, sosial məsafə saxlamadı, qoruyucu vasitələrdən, maskadan istifadə etmədi, gigiyenasına fikir vermədi, ona görə də yoluxanların sayı artı.
Nədənsə, çoxlarımız əsas məsələni, bəlkə də problemin kökünü unuduruq. Metro bağlı olduğu üçün əksəriyyətimiz avtobuslardan istifadə edirik. Amma sərnişin avtobuslarındakı vəziyyət, bəzilərində antisanitariya, toz-torpaq, bəzilərində isə havasızlıq sərnişinləri ciddi narahat edir. Avtobusların bir qismində havalandırma sisteminin işlək olmaması sərnişinlərdə ciddi nəfəs darlığı yaradır. Bir tərəfdən, salondakı insan sıxlığı, digər tərəfdən, havasızlıqdan yaranan buğ qatı ciddi narahatlığa səbəb olur. İnsanlar virusdan qorunmaq üçün maska taxsa da, avtobusların salonunda müşahidə edilən buğlanma virusun artmasına az təsir göstərmir, təbii ki, buğdan boğulan insan qeyri-ixtiyari olaraq maskanı aşağı endirmək məcburiyyətində qalır, bunun da nəticəsinin şərhə ehtiyacı yoxdur.
Son zamanlar vətəndaşlar şikayət edirlər ki, “BakuBus”ların bir çoxunun havalandırma sistemi işləmir, sürücüdən soruşanda isə deyir ki, köhnə “BakuBus”larda havalandırma sistemi qurulmayıb.
Elə biz özümüz də 6 nömrəli marşrut avtobusunda deyilənlərin şahidi olmuşuq, təsəvvür edin ki, salonda nəfəs almaq mümkün deyil. Hətta biz özümüz də sürücüyə deyəndə ki, zəhmət olmasa, havalandırma sistemini işə salın, buğdan nəfəs almaq olmur, sürücü digər sərnişinlərə verdiyi cavabı bizə də verdi. Eyni zamanda da bildirdi ki, nəfəsliyi açın, buğ çıxsın. Nəfəsliyi isə həmişə açmaq olmur. Çünki Bakı küləklidir, nəfəslik açılanda bütün toz-torpaq salona dolur və bu da vəziyyəti daha da gərginləşdirir.
Mütəxəssislər qeyd edirlər ki, avtobuslarda müşahidə edilən bu problem insanların sağlamlığı üçün əlavə təhlükələr yaradır, eyni zamanda, virusun yayılmasına şərait yaratmış olur.
Hansı səbəbdən bəzi “BakuBus”larda havalandırma sisteminin olmamasını araşdırmaq üçün
“Bu məsələni araşdıracağam və görüm sürücü hansı əsasla deyib ki...”
Bakı Nəqliyyat Agentliyinin (BNA) mətbuat xidmətinin rəhbəri Mais Ağayevlə əlaqə saxladıq. M.Ağayev “Bakı-Xəbər”ə bildirdi ki, “BakuBus”ların hamısında havalandırma, istilik sistemi var. “Düzdür, onların pəncərələri bir qədər dardır, amma o avtobusların hamısında havalandırma, istilik və sərinləndirmə sistemi var. Amma sürücü niyə elə deyib, bimirəm. Ola bilər ki, avtobusda havalandırma sistemi işləməsin, ona görə də sürücü bəhanə gətirsin. “BakuBus”larda havalandırma sistemi var, olmaması mümkün deyil. Çünki onlar 2015-ci ildə “BakuBus”a alınan ən müasir avtobuslardır, ona görə də mümkün deyil ki, onlarda havalandırma sistemi olmasın. Bu avtobuslarda ekoloji baxımdan tənzimləyici sistem də var. Amma həmin vaxt avtobusda havalandırma sistemi işləməyib, hansısa bir problem olub, bu başqa məsələ. Bu məsələni araşdıracağam və görüm sürücü hansı əsasla deyib ki, havalandırma sistemi yoxdur. Bu məsələ mütləq araşdırılacaq” - deyə M.Ağayev qeyd etdi.
İradə SARIYEVA
