Suraxanı Rayon Polis İdarəsində 30-dan çox vəzifəli şəxsin guya işdən çıxarılmasına dair bəzi elektron kütləvi informasiya vasitələrində yayımlanmış məlumatlar həqiqəti əks etdirmir.
Daxili İşlər Nazirliyinin Mətbuat xidmətindən verilən məlumata görə, cari ilin yanvar ayında həmin qurumda plan üzrə inspeksiya keçirilərək nəticələrinə əsasən qərar qəbul edilib. Qərara əsasən, xidməti fəaliyyətdə yol verdiyi nöqsanlara görə idarənin və onun tabeliyində olan bölmələrin bir neçə əməkdaşı tutduğu vəzifədən aşağı vəzifəyə keçirilib, bir qrup əməkdaşa digər intizam tənbehləri verilib, daha bir qisminin xidmət yeri bərabər vəzifəyə dəyişdirilib.
Qeyd edilməlidir ki, daxili işlər orqanlarında aparılan belə yoxlamaların məqsədi idarəetmənin təkmilləşdirilməsi, cinayətkarlığa qarşı mübarizə, asayişin və təhlükəsizliyin qorunması, insanların həyatının, sağlamlığının, qanuni mənafelərinin, mülkiyyətinin, hüquqlarının və azadlıqlarının müdafiəsi sahəsində fəaliyyətin yeni keyfiyyət səviyyəsinə yüksəldilməsidir. Eyni zamanda, mövcud nöqsan və çatışmazlıqların aradan qaldırılması, gələcəkdə təkrarlanmaması üçün zəruri tədbirlərin görülməsi, əməkdaşların tapşırılmış sahəyə cavabdehliyinin və məsuliyyətinin daha da artırılmasıdır.
Guya 30 nəfərin polisdən ümumən çıxarıldığı barədə yanlış xəbər yayan media orqanları və jurnalist konkret hansı məqsədləri güdürlər? Belə yanlış xəbərlərlə cəmiyyətdə polis barədə hansı xoşagəlməz rəylərin yaradılmasını hədəfləyirlər?
“Bəzi KİV həmin polis idarəsi haqqında cəmiyyətdə xoşagəlməz, neqativ rəy...”
“Polisə Dəstək” İctimai Birliyinin rəhbəri, tanımış hüquqşünas Şəmsəddin Əliyev “Bakı-Xəbər”ə bildirdi ki, cəmiyyətə bu cür yalan məlumatlar verən, dəqiqləşdirilməmiş informasiya təqdim edən belə KİV, ilk növbədə, öz qeyri-peşəkarlıqlarını ortaya qoyur. Ş.Əliyev hesab edir ki, bu KİV belə məlumatları şüurlu şəkildə qəsdən cəmiyyətə ötürür, məqsədləri də polisin işinə kölgə salmaq və onların fəaliyyətini qaralamaqdır. “Əslində, bu, ilk növbədə, bəzi xəbər portallarının öz işinə qeyri-peşəkar yanaşdığının göstəricisidir. Bu kütləvi informasiya vasitələri öz işlərinin nəticələrinin nələrə gərtib çıxaracağını görürlərsə, demək, buna şüurlu şəkildə yol verirlər. İndiki şəraitdə guya 30 nəfər polis işçisinin daxili işlər orqanlarından uzaqlaşdırılması ilə bağlı yalan məlumat yayanların məqsədi polisin fəaliyyətinə kölgə salmağa, onun nüfuzuna xələl gətirməyə xidmət edir. Bir polis idarəsindən “30 nəfər polis əməkdaşının tamamilə işdən çıxarıldığı” ilə bağlı yalan məlumatlar yayan bəzi KİV həmin polis idarəsi haqqında cəmiyyətdə xoşagəlməz, neqativ rəy yaratmaq məqsədi güdür. Hesab edirəm ki, müvəqqəti sensasiya yaratmaq naminə dəqiqləşdirilməmiş məlumatların yayılması yolverilməzdir. Bu, KİV haqqında qanunun tələbləri ilə də daban-dabana ziddir. Çünki KİV haqqında qanunda aydın şəkildə göstərilir ki, bütün informasiyalar səhih mənbələrə əsaslanmalıdır. Yəni xəbər hazırlanarkən heç bir məqsəd güdülməməli, obyektivlik və qərəzsizlik əsas götürülməlidir. Bu KİV KİV haqqında qanunun tələblərini pozmaqla həm də jurnalistlərin peşə davranışı qaydalarına zidd davranış sərgiləyib”.
Ş.Əliyevin sözlərinə görə, DİN-in Mətbuat xidməti, yaxud digər aidiyyəti qurumlar tərəfindən rəsmi məlumat olmadığı halda, bu KİV-in öz maraqlarına uyğun yalan xəbərlər hazırlayıb yayması qanunun tələblərinə ziddir: “Bu, qanunun tələblərinə zidd olmaqla yanaşı, həm də daxili işlər orqanlarının fəaliyyətinə qara yaxmağa cəhd deməkdir. Bu, cinayətkarlıqla mübarizə aparan, cəmiyyətdə ictimai qaydaları qoruyan, ictimai təhlükəsizliyi təmin edən bir qurumun fəaliyyətinə kölgə salmağa yönələn neqativ bir haldır. Ona görə də mən bunu yolverilməz hesab edirəm” - deyə Ş.Əliyev qeyd etdi.
İradə SARIYEVA
