Məlum olduğu kimi, Nazirlər Kabinetinin 2021-ci il 16 yanvar tarixli Sərəncamı ilə “Azərbaycan Respublikasında COVID-19 xəstəliyi əleyhinə 2021-2022-ci illər üçün Vaksinasiya Strategiyası” təsdiq edilib.
Strategiyaya uyğun olaraq, vaksinasiyanın birinci mərhələsində səhiyyə işçiləri, 65 yaşdan yuxarı şəxslər və hüquq-mühafizə orqanları tərəfindən əks-epidemik tədbirlərə cəlb olunan heyət peyvənd olunur. Daha sonra digər ölkə vətəndaşları da peyvənd ediləcək. Strategiyanın əsas məqsədi ölkədə geniş yayılmış koronavirus pandemiyasının qarşısının alınmasına, virusa yoluxma və ölüm səviyyəsinin aşağı salınmasına nail olmaqdır. Vaksinin əhəmiyyəti immuniteti gücləndirmək yolu ilə xəstəlikdən qorunmaq, infeksiyanın ötürülməsini məhdudlaşdırmaq, ölüm halının qarşısını almaq və nəticədə səhiyyə sisteminə düşən yükü azaltmaqdan ibarətdir.
O da məlumdur ki, artıq bir ildir ölkədə pandemiya ilə bağlı məhdudiyyətlər tətbiq edilir. Məqsəd əhalini qorumaqdır. Ancaq o da sirr deyil ki, əhali bu məhdudiyyətlərdən tez xilas olmaq istəyir. Mütəxəssislər hesab edirlər ki, pandemiya məhdudiyyətlərindən nə qədər tez canımızın qurtarması vaksinasiyanı nə qədər tez aparacağımızdan asılıdır. İctimaiyyət vaksinləşmədə nə qədər həvəsli olsa, qadağalar o qədər tez götürüləcək.
“Əhalinin immun sistemini gücləndirmək üçün təbii, təmiz qidaların istehsalına önəm verilməlidir”
Məsələyə münasibət bildirən tanınmış həkim, Tibb Universitetinin müəllimi Aydın Əliyev də hesab edir ki, qadağalardan xilas olmağın yolu vaksinasiyadır: “Məsələ ondadır ki, koronavirus pandemiyası dünyanın problemidir. Əhali bu işdə fəal olmalıdır. Çünki vaksinasiya ilə bağlı cürbəcür fikirlərin olması bəzi insanları çaşdırır. Vaksinasiyadan keçməkdən ehtiyat edirlər. Azərbaycan da Türkiyə kimi Çindən gələn vaksinlərdən istifadə edir. İstənilən peyvəndin cürbəcür fəsadları ola bilər, amma bundan çəkinmək lazım deyil. Çünki pandemiya bütün dünyanı bürüyüb. Ona görə də hələlik əsas çıxış yolu insanların vaksinasiya olunması hesab edilir. Bu üzdən, vaksinasiya vacibdir. Bununla yanaşı, əhalinin immun sistemini gücləndirmək üçün təbii, təmiz qidaların istehsalına önəm verilməlidir. Elə etməliyik ki, yerli tələbat daxili istehsal hesabına təmin edilsin”.
A.Əliyev hesab edir ki, yerli təmiz qida da sözügedən işə töhfə verə bilər.
Vidadi ORDAHALLI
