“Gənclər milli ruhda tərbiyə almalıdırlar, xarici təsir altına düşməməlidirlər, xüsusilə indiki internet dövründə ki, istənilən yalan tezliklə yayılır və sonra elə bil həqiqət kimi təqdim olunur”. Bu fikirləri Prezident İlham Əliyev altıncı çağırış Milli Məclisin ilk iclasındakı çıxışında bildirib.
Dövlət başçısının sözlərinə görə, Azərbaycan əhalisinin mütləq əksəriyyəti gənclərdir və ölkədə demoqrafik mənzərə çox müsbətdir: “Ona görə gənclərin asudə vaxtlarının səmərəli təşkili, onların fəal işə cəlb edilməsi, - misal üçün, könüllülər hərəkatı çərçivəsində, - vətənpərvərlik ruhunda tərbiyə edilməsi istiqamətində, əlbəttə ki, qanunvericilikdə addımlar atılmalıdır. Gənclər milli ruhda tərbiyə almalıdırlar, xarici təsir altına düşməməlidirlər, xüsusilə indiki internet dövründə ki, istənilən yalan tezliklə yayılır və sonra elə bil həqiqət kimi təqdim olunur. Bu da bizə qarşı aparılan qeyri-təmiz siyasətin bir hissəsidir. Çünki sirr deyil ki, Azərbaycanda hazırda ictimai-siyasi vəziyyət çox sabitdir. Ölkəmizdə ictimai-siyasi sabitliyə təhlükə törədə biləcək heç bir amil mövcud deyil. Ona görə bu amilləri anti-Azərbaycan qüvvələr ölkəmizin xaricində yaratmaq istəyirlər”.
Prezident onu da qeyd edib ki, gənclərin mənəvi və fiziki hazırlığı üçün əlavə tədbirlər həyata keçirilməlidir: “Hesab edirəm ki, Milli Məclis və onun müvafiq komitələri bu işlə məşğul olub konkret təkliflər irəli sürəcəklər”.
Onu da qeyd edək ki, Prezident İlham Əliyev ötən il Bakı Dövlət Universitetinin 100 illik yubileyində çıxışı zamanı da gənclərin yad təsirlərdən qorunması ilə bağlı çağırış edib. Bütövlükdə gənclər siyasəti ilə məşğul olan qurumların bu yöndə fəaliyyətini qənaətbəxş hesab etmək olarmı? Ötən müddət ərzində bu istiqamətdə hansı işlər görülüb?
“Ölkədə gənclər siyasəti ilə məşğul olan qurumlar, təsisatlar bununla bağlı geniş konsepsiya hazırlamalıdır”
Məsələyə münasibət bildirən AMİP-in baş katibi Arzuxan Əlizadənin sözlərinə görə, hələ ki, bu yöndə nəzərəçarpan yeniliklər müşahidə edilmir: “Baxmayaraq ki, bununla bağlı gözləntilər var. Ümumilikdə, müasir dövrdə gəncləri yad təsirlərdən qorumaq çox çətin və mürəkkəb məsələdir. Çünki müasir texnologiyalar bütün gənclərin həyatına bu və ya digər dərəcədə təsir edir. Sözügedən məsələ qlobal miqyasda aktualdır. Hesab edirəm ki, bu sahədə nəticələrin əldə edilməsi zaman tələb edir. Ancaq ölkədə gənclər siyasəti ilə məşğul olan qurumlar, təsisatlar bununla bağlı geniş konsepsiya hazırlamalıdır. Sözügedən konsepsiya hazırlanarkən geniş müzakirələr aparılmalıdır. Cəmiyyətin müxtəlif zümrələri bu prosesdə iştirak etməlidir. İctimai təşkilatların bu prosesə cəlb olunmasına ehtiyac var. Yalnız bundan sonra geniş tədbirlər planı ilə çıxış etmək və bunu tətbiq etmək olar. Hesab edirəm ki, aparılan kompleks tədbirlər sayəsində gənclərin yad təsirlərə məruz qalmasının qarşısını almaq olar. Bu da ciddi iş və zaman tələb edən məsələdir. Fikrimcə, gənclərlə bağlı fəaliyyət göstərən müvafiq strukturlar bu yöndə səylərini artırmalıdır”.
Vidadi ORDAHALLI
