Azərbaycan Respublikasının Prezidenti İlham Əliyev martın 10-da altıncı çağırış Milli Məclisin ilk iclasındakı çıxışında bildirib ki, bizim bütün daxili problemlərimiz Azərbaycanın daxilində həll olunmalıdır:
“...Çünki sirr deyil ki, Azərbaycanda hazırda ictimai-siyasi vəziyyət çox sabitdir. Ölkəmizdə ictimai-siyasi sabitliyə təhlükə törədə biləcək heç bir amil mövcud deyil. Ona görə bu amilləri anti-Azərbaycan qüvvələr ölkəmizin xaricində yaratmaq istəyirlər. Burada özünü müxalifət adlandıran və tamamilə rüsvayçı halda guya fəaliyyətini davam etdirən qruplaşmadan artıq onların əli üzülüb, onlara heç inam da qalmayıb. Ona görə yeni “beşinci kolon”un yaradılması istiqamətində iş aparılır. Çünki indiki “beşinci kolon” öz sahiblərinin etimadını doğrultmur. Azərbaycanda çevriliş edə bilməyib, dırnaqarası inqilab edə bilməyib, xalqın dəstəyini qazana bilməyib, sadəcə, onlara müntəzəm olaraq verilən pulları mənimsəyib və beləliklə, öz havadarlarını pis günə qoyubdur. Odur ki, yeni “beşinci kolon” axtarışı gedir. Mən bütün siyasi qüvvələri bu məsələ ilə bağlı çox ciddi xəbərdar etmək istəyirəm ki, bu yol xəyanət yoludur, bu yola gedən xalq, dövlət qarşısında xəyanət edəcək. Ona görə bizim bütün daxili problemlərimiz Azərbaycanın daxilində həll olunmalıdır. Biz öz daxili problemlərimizi, siyasi çəkişmələri xaricə ixrac etməməliyik. Birincisi, bunun heç bir əhəmiyyəti yoxdur. Çünki bu gün dünyada elə bir qüvvə yoxdur ki, hansısa qərarı bizə aşılasın, yaxud da bizə nəyisə diktə edə bilsin. Belə qüvvə yoxdur və nə qədər ki, mən Prezidentəm, belə qüvvə olmayacaqdır. Ona görə bu, tamamilə mənasızdır. Azərbaycanı hansısa təzyiq altına salmaq cəhdləri, yaxud da ki, sanksiyalarla hədələmək – bütün bunların heç bir əhəmiyyəti yoxdur. Bu, iqtidara qarşı deyil, bu, dövlətə qarşı edilən cinayətdir və bunu heç kim unutmasın".
Göründüyü kimi, ölkə başçısı Azərbaycana olan beynəlxalq təhdidlərdən geniş söz açır. Bu xüsusda Prezident xüsusi olaraq qeyd edir ki, ölkənin bütün problemləri daxildə həll edilməlidir. Ölkəmizlə bağlı problemləri xarici auditoriya qarşısında müzakirə etməyin nə kimi ziyanı ola bilər?
Yeganə Hacıyeva: “...ancaq beynəlxalq təşkilatlarda yurd salmış lobbi qrupları üçün əlavə yem funksiyasını daşıyır”
Politoloq Yeganə Hacıyeva “Bakı-Xəbər”ə açıqlamasında bildirdi ki, Prezidentin bu fikri ölkəmiz üçün böyük əhəmiyət kəsb edir: “Azərbaycan Respublikasının Prezidenti İlham Əliyev martın 10-da altıncı çağırış Milli Məclisin ilk iclasındakı çıxışında Azərbaycanın daxili siyasi məsələlərinin həllini beynəlxalq aləmə çıxarmağın ziyanlılığı kimi bir fikir bildirdi. Daxili siyasi məsələlərin həllinin beynəlxalq təşkilatlar, xarici instansiyalara çıxarılmasının, ümumilikdə, bu problemlərin həllinə faydası yoxdur, digər tərəfdən də belə məqamlar bir sıra dairələrdə bu kimi halların bu və ya digər dövlətlər üçün təsir və ya təzyiq vasitəsi kimi istifadə olunması xülyası və imkanları yaradır. Əlbəttə, Azərbaycan dövləti və hökuməti bu kimi təsir və təzyiq alətlərini qəbul etmir və nəticə kimi bu mövzunun həlli bir müddət üçün gecikmiş olur.
Ölkələrin daxili problemləri daxili qanunvericilik və daxili siyasi iradə əsasında həll edilməlidir. Bu halda həmin məsələlərin cəmiyyət və dövlət üçün faydalı bir həll yolu tapıla bilər. Ümumiyyətlə, dövlətlərə qarşı tətbiq olunan siyasi, hüquqi və sair, daxili problemlərin həlli üçün onların hazırladığı beynəlxalq hesabatların, dinləmələrin təşkili kimi təsir alətləri özünü doğrultmur və ancaq beynəlxalq təşkilatlarda yurd salmış lobbi qrupları üçün əlavə yem funksiyasını daşıyır.
Belə qrupların bu məqamlar üzərindən fəaliyyəti isə üzv dövlətlərlə beynəlxalq təşkilatlar arasında fikir ayrılığına gətirib çıxarır, bu isə uzunmüddətli hesabda beynəlxalq təşkilatların mövcudluğuna əsaslar üçün hədə rolunu oynayır. Biz belə müzakirələr əsasında ölkəmizə necə təzyiqlərin edildiyinin dəfələrlə şahidi olmuşuq”.
Məhəmmədəli QƏRİBLİ
