Azərbaycan Prezident Administrasiyasında parlamentlə bağlı xüsusi şöbə yaradılıb. Bu barədə altıncı çağırış Milli Məclisin ilk iclasında çıxış edən Prezident İlham Əliyev deyib.
Ölkə başçısının fikrincə, sərəncamların icrasına nəzarət lazımi səviyyədə deyil: “Biz bir çox gözəl qanunlar qəbul edirik, eyni zamanda, Prezident tərəfindən bir çox önəmli sərəncamlar imzalanır, ancaq onların icrasına nəzarət lazımi səviyyədə deyil. Ona görə Prezident Administrasiyasında xüsusi şöbə yaradıldı”.
Prezident onu da qeyd edib ki, Milli Məclis, deputatlar da bu işlərlə məşğul olmalıdırlar: “Baxın, görün, qəbul olunmuş qanunlar icra edilir, yoxsa edilmir, bu qanunları pozurlar, yoxsa pozmurlar. Əgər belə hallar aşkarlanarsa, onda, əlbəttə ki, ciddi cəza tədbirləri görülməlidir. Ona görə hesab edirəm ki, bütövlükdə, - əlbəttə, bu, vaxt aparacaq, amma hər halda bunu etmək lazımdır, - biz qanunvericilik bazamızı təftiş etməliyik. Əgər lazım olarsa, onları qarşımızda duran mövcud hədəflərlə uzlaşdırmalıyıq. Çünki həyat yerində durmur, yeni çağırışlar, yeni problemlər üzə çıxır. Gözlənilmədən elə hadisələr baş verir ki, bütün dünya çaş-baş qalır. Ona görə bu qanunlar doqma deyil, onlara, əlbəttə ki, baxmaq lazımdır. Yeni qəbul ediləcək qanunların əsas mahiyyəti islahatları dərinləşdirməkdir”.
Görünən odur ki, ölkə başçısının imzaladığı sərəncamların icrasına nəzarət mexanizminin yaradılması yenidən gündəmə gəlib. Hansı ki, bu çox vacib məsələdir.
“...çox mükəmməl qanunlar qəbul edilir, müvafiq sərəncamlar verilir, amma...”
Məsələyə münasibət bildirən şərqşünas Seyid Camal Əzimbəylinin sözlərinə görə, qanunların nə dərəcədə icra edilməsinə nəzarət olmalıdır: “Çünki bu, müasir dövrün tələbidir. Həqiqətən də bu sahədə görüləsi işlər var. Bir sıra hallarda çox mükəmməl qanunlar qəbul edilir, müvafiq sərəncamlar verilir, amma sonrakı mərhələdə onların icrası arzuolunan səviyyədə olmur. Bu baxımdan ölkə başçısı çox önəmli bir məqama toxundu. Prezident İlham Əliyevin parlamentdə çıxışı hər bir vətənini sevən, ölkənin bütövlüyünü istəyən vətəndaşın ürəyincədir. Prezidentin çıxışı hüquqi bir dövlət olan Azərbaycanda hüquq sisteminin möhkəmlənməsinə öz töhfəsini verəcək. Eləcə də verilmiş qərarların icrasının həyata keçirilməsini istəyən hər bir kəs üçün bu çox önəmli çıxışdır. Bu baxımdan düşünürəm ki, verilən sərəncamların icrasına nəzarət mexanizminin yaradılması çox vacibdir. Hesab edirəm ki, müəyyən mənada bu məsələdə gecikmə var. Hətta cənab Prezident də bu məsələdə gecikmələrin olması ilə bağlı öz iradlarını bildirib. Fikrimcə, ictimai təşkilatlar da qəbul olunan qərarların icrasına nəzarətin təmin olunmasında iştirak etməlidirlər. Belə olarsa, daha effektiv nəticələr əldə etmək mümkün olacaq. Nəticədə ölkəmizin daha dinamik inkişafına nail olacağıq”.
Vidadi ORDAHALLI
