Azərbaycan Respublikasının Prezidenti İlham Əliyev martın 10-da altıncı çağırış Milli Məclisin ilk iclasındakı çıxışında bəzi beynəlxalq dairələrin Azərbaycanda yeni “5-ci kolon” formalaşdırmaq istəyindən danışıb: "Gənclər milli ruhda tərbiyə almalıdırlar, xarici təsir altına düşməməlidirlər, xüsusilə indiki internet dövründəki istənilən yalan tezliklə yayılır və sonra elə bil həqiqət kimi təqdim olunur. Bu da bizə qarşı aparılan qeyri-təmiz siyasətin bir hissəsidir. Çünki sirr deyil ki, Azərbaycanda hazırda ictimai-siyasi vəziyyət çox sabitdir. Ölkəmizdə ictimai-siyasi sabitliyə təhlükə törədə biləcək heç bir amil mövcud deyil".
Prezidentin sözlərinə görə, bu amilləri anti-Azərbaycan qüvvələr ölkəmizin xaricində yaratmaq istəyirlər: “Burada özünü müxalifət adlandıran və tamamilə rüsvayçı halda guya fəaliyyətini davam etdirən qruplaşmadan artıq onların əli üzülüb, onlara heç inam da qalmayıb. Ona görə yeni “beşinci kolon”un yaradılması istiqamətində iş aparılır. Çünki indiki "beşinci kolon" öz sahiblərinin etimadını doğrultmur. Azərbaycanda çevriliş edə bilməyib, dırnaqarası inqilab edə bilməyib, xalqın dəstəyini qazana bilməyib, sadəcə, onlara müntəzəm olaraq verilən pulları mənimsəyib və beləliklə, öz havadarlarını pis günə qoyubdur.
Odur ki, yeni "beşinci kolon" axtarışı gedir. Mən bütün siyasi qüvvələri bu məsələ ilə bağlı çox ciddi xəbərdar etmək istəyirəm ki, bu yol xəyanət yoludur, bu yola gedən xalq, dövlət qarşısında xəyanət edəcək”.
Göründüyü kimi, ölkə başçısı bəzi dairələrin Azərbaycanda yeni “beşinci kolon” yaratmaq istəyindən danışıb. Təbii ki, bu, ölkəmizdə yarana biləcək təhlükə ilə bağlı verilən ciddi xəbərdarlıqdır. Yeni “5-ci kolon”u kimlərdən təşkil etmək istəyirlər və bunun qarşısı hansı üsullarla alınmalıdır?
Rauf Zeyni: “Biz hər bir fərdimizin qeydinə qalıb, onu qorumalıyıq ki, həmin təsirlərin altına düşməsin”
Azərbaycan Milli Qeyri-Hökumət Təşkilatları Forumunun prezidenti Rauf Zeyni “Bakı-Xəbər”ə açıqlamasında bildirdi ki, ölkə başçısı parlamentin ilk iclasında etdiyi çıxışda çox mühüm məqamlara toxundu: “Proqram xarakterli çıxışda Prezident ölkəmizin inkişafı ilə bağlı bütün istiqamətlərdə olan vəziyyəti təhlil etdi. Bura ölkədə aparılan islahatlardan tutmuş, deputatların gələcəkdə necə davranacağına dair verdiyi tövsiyyəni də aid edə bilərik. Prezident ölkəmizə olan xarici siyasi təhdidlərdən də geniş bəhs etdi və bildirdi ki, bunun üçün yeni “5-ci kolon” formalaşdırılır. Ölkədə müəyyən qüvvələrin belə niyyətdə olmasını biz dəfələrlə qeyd etmişik. Bu prosesə əsasən gəncləri və cəmiyyətin fəal zümrəsini cəlb etmək istəyirlər. Əsəsən də QHT və media təmsilçilərinin nümayəndələrinin əməyindən daha çox istifadə etməyi düşünürlər. Məqsəd Azərbaycanı öz iradələrinə tabe etdirməkdir. Azərbaycanın müstəqil siyasət yürütməsi onları qane etmir. Vacib məqam budur ki, həmin dairələr yeni “5-ci kolon” formalaşdırmaq istiqamətində işləyirlər. Hər halda, bunu Prezident deyirsə, informasiyanın mötəbərliyinə şübhə ola bilməz. Onların əvvəlki şəbəkəsi tapşırıqların öhdəsindən gələ bilmədi. Tapşırıqlar da çox təhlükəli idi. Çevriliş etmək, ölkəmizdə stabilliyi pozmaq. Müstəqillik dönəmindən bu tərəfə bizim forum illərdir belə təhdidlərlə mübarizə aparır. Hesab edirəm ki, bundan sonra bu istiqamətdə daha gərgin işləməliyik. Bunun üçün vətəndaş cəmiyyəti güclənməlidir. Gənclərlə iş fərqli və daha təsirli əsaslarla aparılmalıdır. Xüsusilə də regionlarda layihələrin icrasına ciddi fikir verilməlidir. Biz hər bir fərdimizin qeydinə qalıb, onu qorumalıyıq ki, həmin təsirlərin altına düşməsin. Bu haqda ciddi düşünməliyik. Keçən il biz bu məqsədlə tədbirlər keçirmişik. Mediaya da açıqlanıb ki, məqsədimiz yadd təsirlərdən necə qorunmağı öyrənmək olub. Xarici və zərərli amillərin qarşısını almaq üçün bütün cəmiyyət və əlaqədar qurumlar səfərbər olunmalıdırlar”.
Məhəmmədəli QƏRİBLİ
