Ermənistan KİV-i neftin qiymətinin kəskin ucuzlaşması ilə bağlı maraqlı, lakin özlərinə sərf edən tərzdə paralellər aparıb. Onlar belə qənaətə gəlirlər ki, indiki situasiya SSRİ-nin dağılması dönəmini xatırladır.
Qeyd olunur ki, Rusiyanın dövlət büdcəsində neftin barrelinin qiyməti 40 dollar həcmində müəyyənləşib. SSRİ dönəmi ilə bağlı aparılan müqayisədə bildirilir ki, 1970-ci ildə neftin qiyməti hər barrel üçün 1,8 dollar idisə, 1980-ci ildə bu rəqəm 36,83 dollar təşkil etdi. SSRİ 1980-ci ildə Əfqanıstana girəndə neftin qiyməti yenidən enməyə başladı və 1982-1985-ci illərdə 30 dollar təşkil etdi: “1986-cı ildə Səudiyyə Ərəbistanı ABŞ-la birlikdə SSRİ-ni cəzalandırmaq planını həyata keçirdi. Nəticədə neftin barreli 12 dollara endi. Bundan 5 il sonra isə SSRİ süqut etdi”. Erməni KİV-i bu müqayisəni edib sonda belə qənaətə gəlir ki, Rusiyanı da SSRİ-nin aqibəti gözləyə bilər. Ehtimal olunur ki, Rusiyanın enişə gedən neft qiymətləri fonunda davranışları keçmiş SSRİ-ni xatırladır və böyük ehtimalla bu da Rusiyanın çöküşü ilə nəticələnəcək.
Bəllidir ki, ermənilər SSRİ-nin süqutunu əvvəlcədən planlayıb və həmin vəziyyətə uyğun məkrli planları olub. Sonradan məlum oldu ki, SSRİ-nin çökməsindən erməni lobbisi məharətlə istifadə edərək Dağlıq Qarabağda separatçılığı alovlandırdı və nəticədə Azərbaycanın 20 faiz torpağı işğal edildi. Təbii ki, onların indiki istəkləri reallaşan deyil. Çünki nə Rusiyanın parçalanması real görünür, nə də ermənilərin Azərbaycandan torpaq ala bilmə ehtimalları. Belə olan təqdirdə, daşnakların yaranmış neft eyforiyasında yeni ərazilər zəbt etməklə bağlı hansısa yeni planları ola bilərmi?
Səyyar Əliyev: “Bundan sonra nə olsa, hansı proses başlansa belə, ermənilərin ərazi ələ keçirmək şansları olmayacaq”
Tarix üsrə fəlsəfə doktoru Səyyar Əliyev “Bakı-Xəbər”ə açıqlamasında bildirdi ki, ermənilərin məkrli planları heç vaxt ara verməyib: “Bilirsiniz ki, onlar hazırda yaşadıqları ərazinin aborigen xalqı sayılmır. Vaxtilə Yaxın Şərqdən qovula-qovula gəlib Azərbaycanın tarixi ərazilərində məskən salıblar. Sonra isə yersiz ərazi iddiaları əsasında, havadarlarının dəstəyilə özlərinə dövlət qurublar. SSRİ-nin dağılması prosesində onların əməyindən yaxşı istifadə olundu. Dağlıq Qarabağda separatçılığın əsası da vaxtilə Qorbaçovun müşaviri olmuş Aqanbekyanın Fransanın “Humanite” qəzetində dərc etdiyi məqaləsi ilə qoyuldu. Araşdırmalar göstərir ki, SSRİ-nin dağıdılması prosesində Dağlıq Qarabağda separatçılığın baş qaldırması da planın tərkib komponenti olub. Bəli, məhz həmin prosesdən yararlanaraq onlar bugünkü vəziyyəti yarada bildilər. SSRİ-nin dağılmasından maksimum uduşla çıxdılar.
Ermənistan yeganə ölkədir ki, bütün qonşularına qarşı ərazi iddiası ilə çıxış edir. Gürcüstanda separatizmi açıq dəstəkləyir. İstənilən vaxt Cavaxetiyada ermənilər Dağlıq Qarabağdakı vəziyyəti təkrar edə bilərlər. Türkiyəyə qarşı iddialarını hətta dövlət atributları vasitəsilə bəyan edirlər. İrana və Azərbaycana qarşı səslənən ərazi iddiaları da mövcuddur. Daşnakların “Dənizdən dənizə Ermənistan” ideyası onların mübarizə idealına çevrilib. Həmin ideologiyada yalnız qonşu ölkələrin torpaqlarına deyil, eyni zamanda, başqa dövlətlərə də ərazi iddiaları irəli sürülür. Rusiyanın Qafqaza yaxın əyalətlərini ermənilər özlərininki hesab edirlər. Görün nə qədər azğınlaşıblar ki, xarici işlər nazirləri səviyyəsində Qüdsün taleyinin müəyyənləşməsində onların da söz sahibi olduqlarını bəyan etdilər. Ancaq bu iddialara baxmayaraq, Ermənistan hazırda çox ağır dönəmini yaşayır. Yürütdüyü işğalçı siyasət onu diz çökdürüb. Vəziyyət o həddə çatıb ki, Ermənistan öz ərazisini dolanmaq üçün kiməsə icarəyə verməyə hazır vəziyyətdə olduğu təsirini bağışlayır. Bundan sonra nə olsa, hansı proses başlansa belə, ermənilərin ərazi ələ keçirmək şansları olmayacaq. Artıq qəsb etdiklərini qaytarmağın zamanı çatıb”.
Məhəmmədəli QƏRİBLİ
