Ermənilər Azərbaycana yönəlik növbəti təxribata hazırlaşırlar. Belə ki, Rusiyanın paytaxtı Moskvada Dağlıq Qarabağda 90-cı illərdə gedən müharibədən bəhs edən, rusiyalı telejurnalist Svetlana Kulçitskayanın “Qayıdış” adlı sənədli filminin təqdimatına hazırlıq görürlər.
Martın 11-də Vasilyevskaya küçəsində yerləşən kino evində keçirilməsi nəzərdə tutulan sənədli filmdə Ermənistan-Azərbaycan, Dağlıq Qarabağ münaqişəsinin tarixi təhrif olunub. Azərbaycan tərəfi aqressor xalq kimi təqdim olunub. Hansı ki, bu, hadisələrin saxtalaşdırılması deməkdir. Çünki sözügedən münaqişə nəticəsində Azərbaycan ərazisinin 20 faizi erməni silahlıları tərəfindən işğal olunub. Nəticədə çoxlu sayda dinc azərbaycanlı həlak olub, milyondan çox insan evsiz-eşiksiz qalıb.
Məlumat üçün qeyd edək ki, Dağlıq Qarabağda 90-cı illərdə gedən müharibədən bəhs edən, rusiyalı telejurnalist Svetlana Kulçitskayanın hazırladığı “Qayıdış” adlı sənədli film Ermənistan Respublikasının maliyyə dəstəyilə çəkilib. Filmdə tarixi Azərbaycan əraziləri Şərqi Ermənistan adı altında göstərilir. Dağlıq Qarabağda ermənilərin 90-cı illərdə müharibə zamanı ordusuz, blokada şəraitində öz “müstəqilliyi” və “azadlığı” uğrunda mübarizə aparmasından bəhs edilir.
Xatırladaq ki, bu il yanvarın 26-da da Rusiyadakı erməni diasporu Moskvadakı “Pobeda” kinoteatrında Azərbaycanın ərazi bütövlüyünün əleyhinə olan “Sehrli ölkə - Aran” adlı filmi nümayiş etdirməyə cəhd edib. Lakin Moskvadakı Azərbaycan icmasının Moskva hökumətinə müraciətindən sonra filmin nümayişi təxirə salınıb. Bu dəfə də Azərbaycan icması bənzər müraciətlə çıxış edib. Bütövlükdə, ermənilərin növbəti təxribatının qarşısını almaq üçün hansı işlər görülməlidir?
“Fikrimcə, Moskva rəhbərliyi və müvafiq qurumlar provokasiyanın...”
Məsələyə münasibət bildirən AMİP funksioneri Əli Orucovun sözlərinə görə, ermənilər hər fürsətdə öz məkrli niyyətlərini həyata keçirməyə, canfəşanlıq yaratmağa və özlərini məsum göstərməyə çalışırlar: “Buna görə hər vasitəyə əl atmaqdan belə utanıb çəkinmirlər. Ermənistanın maliyyə dəstəyilə Rusiyadan olan telejurnalist S.Kulçitskayanın hazırladığı “Qayıdış” adlı sənədli film növbəti erməni təxribatı sayılmalıdır. Çünki həmin filmdə 90-cı illərdə Ermənistanın Azərbaycana təcavüzü ciddi şəkildə təhrif olunaraq təqdim edilir. Moskvanın Azərbaycan icmasının sədri Şamil Tağıyevin adından Moskva hökumətinin Mədəniyyət Departamentinin rəhbəri Aleksandr Kibovskiyə və Kinematoqraflar İttifaqının sədri Nikita Mixalkova göndərilən müraciət təqdirəlayiqdir. Müraciətdə erməni məkrinin hansı fəsadlara yol aça biləcəyi qeyd olunub. Hesab edirəm ki, bütün hallarda, Azərbaycan icması ayıq-sayıqlığını itirməməlidir. Fikrimcə, Moskva rəhbərliyi və müvafiq qurumlar provokasiyanın işləməsinə imkan verməyəcəklər. Ermənilərin ifşa olunan daha bir məkrli planı da iflasa uğrayacaq”.
Vidadi ORDAHALLI
