Son zamanlar Azərbaycanın Ermənistanla dövlət sərhədinin Qazax rayonu istiqamətində ermənilər tərəfindən tez-tez atəkəs pozulur. Ermənistan ərazisində dislokasiya olunan erməni hərbi birləşmələri müəyyən zamanlarda mövqelərimizi atəşə tuturlar. Azərbaycan Dövlət Sərhəd Xidmətinin qoruduğu sərhəd-döyüş postlarında atəşkəs rejimi daimi olaraq erməni hərbçiləri tərəfindən iriçaplı pulemyotlar və müxtəlif kalibrli snayper tüfəngləri ilə pozulur.
Erməni tərəfi Azərbaycan sərhədçilərinə qarşı həyata keçirməyə çalışdığı kəşfiyyat, kəşfiyyat-diversiya, silahlı sərhəd pozuculuğu halları ilə yaratdığı bu gərginlliyin fonunda beynəlxalq aləmə rəsmi Bakını nüfuzdan salmağa yönəlmiş informasiyalar yayır. Qarabağ müharibəsinin danışıqlar yolu ilə həllində süni çətinliklər formalaşdırır və dünya səviyyəli tribunalarda Azərbaycan əleyhinə kampaniya aparırlar. Eyni zamanda, sərhəddə xidmət aparan Dövlət Sərhəd Xidmətinin gözdən salınmasına yönəlik fəaliyyət göstərirlər.
O da məlumdur ki, ötən ildən Ağstafa və Qazax rayonlarının Ermənistanla olan sərhədini Dövlət Sərhəd Xidmətinin əsgərləri qoruyurlar. Ermənistanın məhz bu istiqamətdə intensiv təxribatlara əl atması təsadüfi deyil. Ehtimal ki, Ermənistan bununla yenidən həmin sərhədin Azərbaycan Milli Ordusu tərəfindən qorunmasını istəyir. Yəni DSX məcbur olsun sərhədi Silahlı Qüvvələrə təhvil versin. O baxımdan güman etmək olarmı ki, ermənilərin təxribatının arxasında bu niyyət dayanır?
“...təxribatların miqyasını genişləndirməyə səy göstərirlər”
Məsələyə münasibət bildirən ehtiyatda olan polkovnik-leytenant, hərbi ekspert İbrahim Rüstəmlinin sözlərinə görə, Qazax istiqamətində təxribatların intensiv artmasında bir sıra məqsədlər ola bilər: “Zaman-zaman Ermənistanda hakimiyyətdə olan qüvvələr Qarabağ kartından öz məqsədləri üçün istifadə ediblər. İndi də Paşinyan bu məqsədlə öz niyyətlərini həyata keçirməyə çalışır. Qazax istiqamətində təxribatların artmasının bir səbəbi həmin ərazinin relyefi ilə bağlıdır. Məsələ ondadır ki, mövcud relyef ermənilərə bir sıra kəndləri atəş altında saxlamağa imkan verir. Ermənilər də bu imkandan maksimum istifadə etməyə çalışırlar. Digər tərəfdən, erməni tərəfi hesab edir ki, Sərhəd Qoşunlarının döyüş təcrübəsi yoxdur. Eyni zamanda, Sərhəd Qoşunlarında xidmət edən zabitlərin də birbaşa cəbhə xəttində döyüş təcrübəsi yoxdur. Ona görə də Qazax istiqamətində təxribatların miqyasını genişləndirməyə səy göstərirlər. Ermənilər istəyirlər ki, yenidən həmin sərhədləri Müdafiə Nazirliyinin qoşunları qorusun. Baxmayaraq ki, Müdafiə Nazirliyi tərəfindən qorunan ərazilərə müdaxilə etmək, təxribat törətmək çətindir. Ancaq nəzərə almaq lazımdır ki, DSX-nin döyüş təcrübəsi az olsa da, ən müasir hərbi texniki vasitələrlə təmin olunub. Çox yüksək səviyyədə idarə olunur və nizam-intizam üstün səviyyədədir. Ancaq praktika və təcrübə deyilən bir şeylər var. Bu baxımdan hesab edirəm ki, DSX-nin qoruduğu ərazilərdə orduda döyüş təcrübəsi olan zabit və bölük komandirlərini yerləşdirmək lazımdır. Çünki onlar müəyyən döyüş praktikasına malikdirlər. Zamanla onsuz da DSX-nin döyüş təcrübəsi artacaq. Bütün hallarda, biz elə etməliyik ki, ermənilər hər gün itki versinlər. O zaman Qarabağla bağlı onların təsəvvürləri deformasiyaya uğrayacaq və şüurlarında real vəziyyətlə bağlı rəy formalaşacaq”.
Vidadi ORDAHALLI
