04/04/2020 00:07
728 x 90

Sarkisyanla Köçəryanın adı Azərbaycanda Xocalı ilə bağlı cinayət işinə indiyə qədər niyə salınmayıb...

img

Xocalı soyqırımının törədilməsində birbaşa iştirakları olan şəxslərin heç biri cinayət məsuliyətinə cəlb edilməyib. Söhbət xüsusilə də soyqırım iştirakçıları olan Ermənistana prezidentlik etmiş Robert Köçəryan, Serj Sarkisyan, eləcə də müdafiə naziri olmuş Seyran Ohanyandan gedir.

Digər ağrılı məsələ isə əli günahsız insanların qanına bulaşmış şəxslərin adının təqsirləndirilən şəxslərin siyahısında olmaması ilə bağlıdır. Bu adamların adının ittiham aktında hələ də olmamasını Hərbi Prokurorluğun Xüsusi istintaq şöbəsinin rəisi Emil Tağıyev belə izah edib: “Həm Sarkisyan, həm  Köçəryan, həm də digərləri barəsində cinayət işi istintaq olunur. Onların törətdikləri əməllər üzrə materiallar toplanır və bu işlər davam etdirilir. Gələcəkdə onların məsuliyyətə cəlb edilərək barələrində qəti imkan tədbirlərinin keçirilməsi və axtarışlarının elan edilməsi təmin ediləcək”.

Emil Tağıyev bildirib ki, ağır cinayətlərin araşdırılması üzrə cəlb edilmiş bütün sənədlər həm İnterpola, həm də Daxili İşlər Nazirliyinin Cinayət-Axtarış İdarəsinə göndərilib: “Hazırda onların barəsində bütün sənədlər getməyib. Çünki cinayət işi istintaq olunur və sübutlar toplanır.  Yaxın gələcəkdə o istiqamətdə işlər davam etdiriləcək”.

Hərbi Prokurorluğun əməkdaşının verdiyi açıqlamadan belə başa düşülür ki, sözügedən şəxslərin adının ittiham aktına salınması üçün istintaq yekunlaşmalıdır. Onda belə bir sual da meydana çıxır: illərlə davam edən istintaq niyə yekunlaşmır?

  • Mehman Muradlı: “Bunun üçün biz icraçı və ya prosesin digər iştirakçılarının ələ keçməsinə nail olmalıyıq”

Azərbaycan Vəkillər Kollegiyasının üzvü, hüquqşünas Mehman Muradlı “Bakı-Xəbər”ə açıqlamasında bildirdi ki, məsələyə bir qədər hüquqi aspektdən yanaşmalıyıq: “Həmin adamların adı istintaq prosesində çəkilir. Prossesual normalara görə, cinayət işinin istintaqı tamamlanandan sonra ittiham aktı tərtib edilir. Orada təqsirləndirilənlərin, zərərçəkən və şahidlərin siyahısı müəyyən olunur. Ardınca isə məsələyə tam hüquqi qiyməti məhkəmə verir. İş aidiyyəti üzrə məhkəmələrə göndərilir. İstintaqın uzun illərdir davam etməsi də səbəbsiz deyil. Həm Köçəryanı, həm də Sarkisyanı cinayətə cəlb etmək üçün sübutlar toplanmalıdır. Bu da asan deyil. Əsirlikdən azad edilən şəxslərlə söhbətlər edilib. Sübut və dəlillərin olub-olmaması araşdırılır. İcraçılar tam məlumdur. Sifarişin kimlər tərəfindən verilmə məsələsinə hüquqi qiyməti mülahizə ilə vermək olmaz. Biz bunun siyasi tərəfini anlayırıq. Ancaq yaxşı olar ki, bunun hüquqi əsaslandırılması da olsun. Bunun üçün biz icraçı və ya prosesin digər iştirakçılarının ələ keçməsinə nail olmalıyıq. Onlardan alınan ifadələr hesabına təşkilatçılara ittiham elan etməliyik. Etiraf edək ki, sıradan bir cinayət işi deyil. Bu 28 il ərzində Xocalı ilə bağlı çoxlu iş görülüb. Bu baxımdan da Hərbi Prokurorluğun əməkdaşının səsləndirdiyi məqamlarla tam razıyam. Əminəm ki, Xocalı faciəsinə zamanı çatanda lazımi hüquqi qiymət veriləcək”.

Məhəmmədəli QƏRİBLİ

Son xəbərlər