06/07/2020 12:03
728 x 90

İlham Əliyev Türkiyə ilə Qoşulmama Hərəkatının münasibətlərində yeni səhifənin anonsunu verdi...

Seyid Camal Əzimbəyli: “Türkiyə kimi bir ölkənin Qoşulmama Hərəkatı ilə hansısa formada əməkdaşlıq etməsi beynəlxalq münasibətlər üçün faydalı olacaq”

img

“Keçən il Azərbaycan Qoşulmama Hərəkatına sədrlik etməyə başlamışdır. Bu, Birləşmiş Millətlər Təşkilatından sonra dünya miqyasında ikinci böyük təsisatdır. Bu gün bu təsisatla Türkiyə arasındakı gələcək əlaqələr haqqında geniş fikir mübadiləsi aparılmışdır”. Bu sözləri fevralın 25-də sənədlərin imzalanması mərasimindən sonra Prezident İlham Əliyev Türkiyə Prezidenti Rəcəb Tayyib Ərdoğanla mətbuata birgə bəyanatında deyib.

Prezidentin sözlərinə görə, iki ölkə beynəlxalq təşkilatlarda bir-birini dəstəkləyir: “Bu gün bir çox məsələlər geniş müzakirə olundu. Bir çox önəmli qərarlar qəbul edildi, önəmli sənədlər imzalandı. Biz siyasi əlaqələrimiz haqqında geniş fikir mübadiləsi apardıq və bir daha gördük ki, bu əlaqələr iki xalqın iradəsini əks etdirir. Biz bütün beynəlxalq təşkilatlar çərçivəsində vahid mövqedən çıxış edirik. Bir-birimizə arxayıq, bir-birimizə dayağıq. BMT, ATƏT, İslam Əməkdaşlıq Təşkilatı, Avropa Şurası və digər təşkilatlarda biz fəal işbirliyi apararaq bir-birimizin gücünü artırırıq”.

O da məlumdur ki, Qoşulmama Hərəkatında hərbi bloklarda təmsil olunmayan ölkələr iştirak edirlər. Türkiyə NATO blokunun üzvü olduğuna görə sözügedən hərəkatda təmsil olunmur. Ancaq Azərbaycan vasitəsilə Qoşulmama Hərəkatı ilə Türkiyə arasında müəyyən əlaqələrin qurulması beynəlxalq münasibətlərə töhfə verə bilər. Ümumilikdə, sözügedən əlaqələrin qurulması dünyadakı təhlükəsizliyə nə verəcək?

  • “Bu, bir sıra məsələlərin dialoq yolu ilə həllinə kömək edəcək”

Məsələyə münasibət bildirən şərqşünas Seyid Camal Əzimbəylinin sözlərinə görə, Türkiyə ilə Qoşulmama Hərəkatı arasında əlaqələrin qurulması beynəlxalq təhlükəsizliyin gücləndirilməsi üçün faydalı olacaq: “Hesab edirəm ki, Azərbaycan hərəkata sədrlik etdiyi üçün buna nail ola bilər. Türkiyə kimi bir ölkənin Qoşulmama Hərəkatı ilə hansısa formada əməkdaşlıq etməsi beynəlxalq münasibətlər üçün faydalı olacaq. Ona görə ki, Türkiyə NATO ölkəsi olmaqla yanaşı, böyük geosiyasi çəkiyə malikdir. Bir sıra parametrlərə görə üstün çəkiyə malikdir və dünyada söz sahibi olan ölkələrdən biridir. İslam dünyasında Türkiyənin özünəməxsus çəkisi var. Bütün bunlardan çıxış edərək hesab edirəm ki, bu yöndə əlaqələrin qurulması dünyada təhlükəsizliyin qorunmasına müsbət təsir edəcək. Bu, bir sıra məsələlərin dialoq yolu ilə həllinə kömək edəcək. Ona görə də mən bunun perspektivini yüksək qiymətləndirirəm. Hesab edirəm ki, bu istiqamətdə aparılan siyasət öz səmərəsini verəcək”.

Vidadi ORDAHALLI 

Son xəbərlər