09/07/2020 17:45
728 x 90

2020-ci ildə Azərbaycanla Türkiyənin birgə hərbi təlimlərinin sayını artırmaq rəsmən bəyan edildi

Azad İsazadə: “Birgə təlimlər nə qədər çox keçirilsə, bu bir o qədər ordumuzun döyüş qabiliyyətini artıracaq”

img

“Azərbaycan-Türkiyə birgə hərbi təlimlərinin sayı artacaq”. Bunu Prezident İlham Əliyev Bakıda türkiyəli həmkarı Rəcəb Tayyib Ərdoğanla birgə mətbuata bəyanatlarla çıxışında deyib. Dövlət başçısı müdafiə sahəsində birgə gələcək işbirliyi haqqında fikir mübadiləsinin aparıldığını vurğulayıb: “Təkcə keçən il 13 birgə hərbi təlim keçirilib. Bu il isə hərbi təlimlərin sayı daha da çox olacaq”.

Prezident onu da qeyd edib ki, Azərbaycan Türkiyədən müasir silahların alınmasını davam etdirəcək: “Bu gün biz birgə istehsalın təşkili haqqında da danışmışıq”.

Ümumilikdə, Türkiyə Azərbaycan müstəqillik qazandıqdan sonra Silahlı Qüvvələrin formalaşmasına yardım göstərib. 1992-ci ildə Azərbaycan Ordusunun yaradılmasında və Qarabağ savaşında Türkiyə Silahlı Qüvvələrinin nümayəndələri bizə kömək ediblər. O zaman orduda kadr çatışmazlığı var idi. Sonrakı dövrdə də iki ölkə arasında hərbi-texniki əməkdaşlıq inkişaf etdi. Türkiyə Azərbaycanda kadrların hazırlanması, hərbi məktəblərin proqramlarının formalaşmasında böyük rol oynayıb. Bununla belə, hər il Azərbaycan və Türkiyə silahlı qüvvələri birgə hərbi təlimlər keçirirlər. Bütövlükdə, bu il iki ölkə arasında keçiriləcək hərbi təlimlərin sayının artırılmasının praktiki əhəmiyyətini ekspertlər necə dəyərləndirirlər?

  • “Nəzərə almaq lazımdır ki, Türkiyə neçə ildir antiterror əməliyyatları aparır”

Məsələyə münasibət bildirən hərbi ekspert Azad İsazadənin sözlərinə görə, iki ölkə hərbçilərinin keçirdiyi birgə hərbi təlimlərin bir sıra üstün tərəfləri var: “Birincisi, Türkiyə Ordusu çox güclüdür. Nəzərə almaq lazımdır ki, Türkiyə neçə ildir antiterror əməliyyatları aparır. Belə ki, İraqda, Suriyada və ölkə daxilində neçə ildir bu əməliyyatları keçirir. Nəzərə alsaq ki, əsasən bu əməliyyatlar dağlıq ərazilərdə həyata keçirilir, o zaman, bu təlimlərin əhəmiyyəti bir qədər də artır. Çünki əldə etdikləri təcrübəni Azərbaycan Ordusu ilə keçirdikləri birgə təlimlərdə bölüşürlər. Bunun da ordumuzun döyüş qabiliyyətinin artmasına çox böyük müsbət təsiri var. O baxımdan birgə təlimlər nə qədər çox keçirilsə, bu bir o qədər ordumuzun döyüş qabiliyyətini artıracaq. İkincisi, Azərbaycan Türkiyə ilə müttəfiqdir. İki ölkə ordusunda bəzi fərqlər olduğu üçün, sözügedən təlimlər sayəsində birgə fəaliyyət qabiliyyəti yaranır. Ordu strukturları bir qədər fərqli olduğuna görə birgə təlimlər əlavə təcrübə əldə etməyə imkan yaradır. Bu, gələcəkdə lazım olsa bir yerdə əməliyyat keçirmək bacarığı yaradacaq. Üçüncüsü, bunun hərbi-siyasi baxımdan əhəmiyyəti var. Ermənistana, İrana, Rusiyaya nümayiş etdiririk ki, iki qardaş ölkənin silahlı qüvvələri birgə təlim, əməliyyat keçirməyə hazırdır və bunu bacarırlar”.

Vidadi ORDAHALLI

Son xəbərlər