09/07/2020 17:39
728 x 90

Ermənistanın İsraildəki səfirliyi İrəvandan Təl-Əvivə köçdü - Azərbaycan - İsrail əməkdaşlığında nə dəyişə bilər...

img

Ermənistan İsraildə səfirlik açmaq istəyir. Bu barədə məlumatı İsrailin Moldova və Ermənistan üzrə akkreditə edilmiş səfiri Eliav Beroçerkovski bildirib: “Biz bu niyyəti alqışlayırıq və hesab edirik ki, belə addım ölkələrimiz arasındakı münasibətlərin inkişafına yeni təkan verəcək”.

Qeyd edək ki, Ermənistan Prezidentinin 25 fevral tarixli fərmanı ilə Armen Smbatyan həmin ölkənin İsraildəki səfiri təyin edilib. Buna qədər Ermənistanın İsraildəki səfirliyinin rezidensiyası İrəvanda olub. Bundan sonra isə səfirlik Təl-Əvivdə fəaliyyət göstərəcək. İsrailin isə Ermənistanda hələlik səfirlik açmaq fikri yoxdur.

İsrailin Xarici İşlər Nazirliyi Ermənistanın həmin ölkədə səfirlik açmaqla bağlı planını alqışlayıb. Bu barədə İsrailin Xarici İşlər Nazirliyi rəsmi saytında bəyanat verib. Bəyanatda deyilir: "Ölkənin Xarici İşlər Nazirliyi Ermənistanın burada səfirlik açmaq planını alqışlayır. Bu addım son illərdə sürətlə artmaqda olan əlaqələrin göstəricisidir. Səfirliyin açılması iki ölkə əlaqələrində yeni səhifələr açacaq. Biz əminik ki, bu, iki xalqın əlaqələrini, qarşılıqlı əməkdaşlığı bütün sahələrdə möhkəmləndirəcək".

Məlumdur ki, bəzi obyektiv səbəblərə görə Azərbaycanın İsraildə diplomatik missiyası fəaliyyət göstərmir. Ermənistanın həmin ölkədə səfirlik açması Azərbaycan-İsrail münasibətlərində nəyisə dəyişə bilərmi?

  • Hatəm Cabbarlı: “Ermənistanın İsraildə səfirlik açması Təl-Əvivin Bakı ilə münasibətlərinə təsir edə bilməyəcək”

Siyasi elmlər doktoru Hatəm Cabbarlı “Bakı-Xəbər”ə açıqlamasında bildirdi ki, ötən ilin əvvəlindən başlayaraq Ermənistanın xarici siyasət kursunuda bir sıra ölkələrdə səfirlik açmaq prioritet elan olunub: “Ermənistan bu ilin əvvəlində İsraildə səfirlik açmağı əvvəlcədən planlaşdırırdı. Qeyd edək ki, İsrailin Ermənistanda səfiri yoxdur, həmin ölkənin Gürcüstandakı səfiri, eyni zamanda, Ermənistanda da akkreditə olunub. İki ölkə arasındakı əlaqələr İsrailin Gürcüstandakı səfirliyi vasitəsilə həyata keçirilir. Ermənistanın həmin ölkədə səfirlik açmağa tələsməsi onların yeni siyasət qurmaq istəmələri ilə əlaqəlidir. Yaxın Şərqdə ermənilər çox yaşayırlar. Həmin regionun ən qüdrətli ölkəsi İsraildir. Ermənistan orada səfirlik açmaqla, eyni zamanda, Yaxın Şərqdəki erməniləri yaxşı koordinasiya etməyi düşünür. Azərbaycanın İsraildə səfirliyinin olmamasına baxmayaraq, iki ölkə arasındakı münasibətlər çox yüksəkdir. İki ölkə arasında heç vaxt ciddi problem ortaya çıxmayıb. Azərbaycanın İsraildə bu günə qədər səfirlik açmamasının səbəbi İran amili ilə bağlıdır. Ölkəmiz düşünüb ki, bu, İranı qıcıqlandırar. Artıq mənə elə gəlir ki, bununla bağlı heç bir problem yoxdur. Hazırda bu məsələ gündəmə gətirilə bilər. Hətta İranın etirazı olsa da, onu haqsız saymaq olar. Çünki Ermənistanla onun münasibətləri inkişaf edə-edə İrəvan İsraildə səfirlik açır. Deməli, lazım gələndə İran qıcıqlanmaya da bilir.

Azərbaycan hökuməti İranla münasibətlərini daha soyuqqanlı, praqmatik əsaslara söykənərək aparmalı və İsraildə səfirliyimizin açılmasında maraqlı olmalıdır. İsrail Azərbaycan üçün çox lazımlı ölkədir. Ölkəmiz üçün belə bir addımın atılması heç bir risq tələb etmir. Etiraz edənlər üçün onlara təqdim etməyə əlimizdə ciddi faktlar var. Burada heç bir hüquqi maneə də yoxdur. Ehtimal edirəm ki, yaxın zamanlarda Azərbaycan İsraildə səfirliyini aça bilər. Hətta bu, olmasa belə, Ermənistanın İsraildə səfirlik açması Təl-Əvivin Bakı ilə münasibətlərinə təsir edə bilməyəcək”.

Məhəmmədəli QƏRİBLİ

Son xəbərlər