Məlum olduğu kimi, Münhendə İlham Əliyevlə Nikol Paşinyan arasında baş tutan debatın əks-sədası hələ də eşidilməkdədir. Xüsusilə də Ermənistandan bu məsələyə verilən reaksiyalardan aydın olur ki, cəmiyyət Paşinyanı bütün erməni xalqını təhqir etdiyinə görə lənətləyir.
İlham Əliyevin aşkar qələbəsilə keçən debatdan sonra belə bir sual da meydana çıxır: Paşinyan bundan sonra İlham Əliyevlə üz-üzə formatda Qarabağ məsələsini yaxın zamanda müzakirə etməyə hazır olacaqmı?
Yeganə Hacıyeva: “Paşinyanın Münhendəki açıq məğlubiyyətindən sonra tez bir zamanda təkbətək görüşə maraq göstərəcəyi inandırıcı deyil”
Politoloq Yeganə Hacıyeva “Bakı-Xəbər”ə açıqlamasında bildirdi ki, son iki ildə Azərbaycan Prezidenti İlham Əliyev və Ermənistanın Baş naziri Nikol Paşinyanın beynəlxalq nizamlayıcı missiya rəhbərləri, ATƏT-in Minsk Qrupunun həmsədr ölkələrinin təşəbbüsü ilə çoxsaylı rəsmi və qeyri-rəsmi görüşü baş tutub: “Görüşlərdə adəti üzrə Ermənistan tərəfi guya konstruktiv mesajlı mövqedə görsənməyə çalışsa da, görüşlər sonrası Nikol Paşınyanın Ermənistanda daxili auditoriya üçün konfliktin həllinə neqativ təsirli mesajlarını eşidirik. Bunun Ermənistanın ənənəvi status-kvonun uzanmasına xidmət edən mövqeyindən başqa həm də bir neçə başqa səbəbi də var. Məsələ ondadır ki, bu görüşlər, birmənalı olaraq, İlham Əliyevin sərt, beynəlxalq hüquqa söykənən məntiqi mövqeyi ilə seçilən üstünlüyü şəraitində keçir. Bu isə, əlbəttə, Nikol Paşınyanın daxildə onsuz da aşağı olan nüfuzunu daha da ayaqlar altına atır.
Biz bunu istər 2018-ci il dekabrın 6-da Sankt-Peterburqda MDB dövlət başçılarının qeyri-rəsmi sammiti çərçivəsində Prezident İlham Əliyev və onda hələ Ermənistanın Baş naziri vəzifəsini icra edən Nikol Paşinyanla görüşündən sonra, ardınca Brüsseldə Avropa İttifaqının Şərq Tərəfdaşlığının 10-cu ildönümü ilə bağlı tədbir çərçivəsində görüşündən sonra, keçən il Davos Dünya İqtisadi Forumu çərçivəsində, Avstriyanın paytaxtı Vyanadada görüş zamanı, Soçidə "Valday" Beynəlxalq Diskussiya Klubunun XVI illik iclasında və nəhayət, bu il Münhendə keçirilən Təhlükəsizlik Konfransı çərçivəsində görüşlərdən sonra müşahidə edirik. Görüşlər sonrası Paşınyan ölkə daxilində nüfuzunu dirçəltmək məqsədilə kəskin mesajlar verir. Bu yanaşma daxildə Paşınyanın qısa bir müddət üçün işinə yarasa da, uzunmüddətli hesabda onu bir siyasətçi kimi bitirdi.
Növbəti mərhələ kimi ölkə rəhbərlərinin görüşünün keçirilməsi və bunun perspektivləri haqqında danışırıqsa, onu qeyd edim ki keçirilən görüşlərdə müəyyən razılaşmalar mövcud idi ki, onların həyata keçirilməsi prosesi davam etməlidir”.
Politoloqun sözlərinə görə, bura humanitar layihələr, əsirlərin qaytarılması, xalqların sülhə hazırlanması prosesləri və s. məsələlər daxildir: “Lakin görüşlər sonrası Ermənistan Baş nazirinin daxili auditoriyada öz nüfuzunu bərba etmək məqsədilə söylədiyi fikirlər sülh nizamlama prosesinin bünövrəsinə zərər vurur.
Başqa bir məqam da ondan ibarətdir ki, Paşınyan daxili təlatümlərdən çıxış yolu kimi sərhəddə gərginlikdə maraqlıdır və bütün davranışı ilə Azərbaycan tərəfini buna təşviq edir. Nəzərə alaq ki, Ermənistan Baş nazirinin belə sərsəmləmələrindən sonra müharibə yeganə çıxış yolu olaraq görsənir. Çünki hazırkı Ermənistan hökumətinin yanaşması “biz işğal etmişik və biz haqlıyıq” kimi qəbuledilməz bir tonda səslənir. Odur ki, ölkə rəhbərlərinin görüşlərindən daha çox sərhəddə erməni təxribatının və bir neçə günlük eskalasiyanın şahidi olacağımıza inanıram. Hesab edirəm ki, Paşinyanın Münhendəki açıq məğlubiyyətindən sonra tez bir zamanda təkbətək görüşə maraq göstərəcəyi inandırıcı deyil”.
Məhəmmədəli QƏRİBLİ
