“Məqsədimiz beynəlxalq məhkəmələr müstəvisində Xocalının soyqırım kimi tanıdılmasıdır”. Bunu Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev deyib.
Şöbə müdirinin sözlərinə görə, Xocalı faciəsinin beynəlxalq ictimaiyyət tərəfindən soyqırımı kimi tanınması istiqamətində səylər davam etdirilir: “Bu gün Xocalı faciəsinin beynəlxalq ictimaiyyətə təqdim olunması və soyqırımı aktı olaraq tanıdılması istiqamətində səylərimiz davam edir. Çox müsbət haldır ki, 10-dan artıq ölkənin parlamentləri və bir çox ölkənin yerli qanunverici orqanları səviyyəsində Xocalı insanlıq əleyhinə cinayət və soyqırım aktı kimi qəbul edilib. Əsas məqsədimiz beynəlxalq məhkəmələr müstəvisində Xocalının soyqırım kimi tanıdılmasına nail olunmasıdır ki, bu prosesdə də ictimai məlumatlandırma, “Xocalıya ədalət” kampaniyası, vətəndaş cəmiyyəti təşkilatlarımızın fəaliyyəti, diplomatik nümayəndəliklərimizin və diaspor təşkilatlarımızın fəaliyyəti çox önəmli xarakter daşıyır”.
Bu yöndə neçə ildir ki, Azərbaycan müəyyən səylər göstərir. Bir sıra ölkələrdə müxtəlif səviyyələrdə Xocalı insanlıq əleyhinə cinayət və soyqırımı aktı kimi qəbul edilib. Bütün bunlarla yanaşı, vacib məsələlərdən biri də beynəlxalq məhkəmələr müstəvisində Xocalının soyqırım kimi tanıdılmasıdır. Maraqlıdır, buna nail olmaq nə dərəcədə mümkündür? Bununla bağlı perspektivləri ekspertlər necə dəyərləndirirlər?
“Hesab edirəm ki, bununla bağlı səylərimizi daha da artırmalıyıq”
Məsələyə münasibət bildirən “İki Sahil” qəzetinin baş redaktoru Vüqar Rəhimzadənin sözlərinə görə, zamanla beynəlxalq məhkəmələr də Xocalı faciəsini soyqırım kimi tanıyacaqlar: “Bütövlükdə, Xocalı soyqırımının beynəlxalq müstəvidə tanıdılması ilə bağlı Azərbaycan tərəfindən bir sıra işlər görülüb. Ortada nəticə də var. Bir sıra ölkələr tərəfindən Xocalı faciəsi soyqırım kimi tanınıb. Bununla bağlı müxtəlif sənədlər qəbul edilib. Bizim ən böyük məqsədlərimizdən biri Xocalı həqiqətlərinin dünya ictimaiyyətinə çatdırılmasıdır. Düşünürəm ki, gec-tez, daha geniş müstəvilərdə bu soyqırımı dünya dövlətləri tanıyacaqlar. Baxmayaraq ki, erməni diasporu müxtəlif vasitələrlə buna mane olmağa çalışır, ancaq Azərbaycanın bu istiqamətdə sistemli iş aparması zamanla öz nəticəsini verəcək. Çünki Azərbaycan bununla bağlı kifayət qədər böyük işlər görüb. Bunun nəticəsidir ki, bir sıra ölkələr Xocalıda baş verənləri soyqırım kimi tanıyır. Xüsusən də Heydər Əliyev Fondunun bu yöndə gördüyü işlər qeyd olunmalıdır. Hesab edirəm ki, bununla bağlı səylərimizi daha da artırmalıyıq. Zamanla beynəlxalq məhkəmələr də Xocalı faciəsini soyqırım kimi tanıyacaqlar. Çünki bununla bağlı yetərincə sübut, şahid ifadələri var. O üzdən, səylərimizi maksimum artırmalıyıq”.
Vidadi ORDAHALLI
