Məlum olduğu kimi, 2020-ci ilin 15 fevral tarixində Münhen Təhlükəsizlik Konfransı çərçivəsində Ermənistan-Azərbaycan Dağlıq Qarabağ münaqişəsi ilə bağlı panel müzakirələr keçirilib. Müzakirələrdə Azərbaycan Prezidenti İlham Əliyev və Ermənistanın Baş naziri Nikol Paşinyan iştirak ediblər. Müzakirə zamanı Prezident İlham Əliyev N.Paşinyanı gerçək tarixə söykənən faktlarla susdurub.
Debat zamanı tərəflərin başlıca müzakirə predmeti Dağlıq Qarabağ konflikti oldu. Ermənistanın dövlət başçısı yenə də öz ampluasında idi. Mahiyyət etibarilə bəlli oldu ki, o nəinki həqiqətləri qəbul edir, hətta müxtəlif yalanları uydurmaqla problemin həllindən maksimum yayınmağa çalışır. Həmin debatdan bir çox nəticə əxz edildi. Debat Qarabağ probleminin dinc həlli perspektivinə ümidlərin nə dərəcədə qalması ilə bağlı hansı real mənzərəni ortaya qoydu?
Elşən Mustafayev: “Bu müzakirədən bəlli oldu ki, ərazilərimizi azad etmək üçün başqa bir variant qalmayıb”
Politoloq Elşən Mustafayev “Bakı-Xəbər”ə bildirdi ki, biz adətən bu tip danışıqlarla bağlı məlumatları bir neçə mənbəyə ötürüləndən sonra alırdıq: “Yəni, adətən, bu tip konfliktlərlə bağlı danışıqlar bağlı qapılar arxasında keçirilir. Mediaya isə görüşlərlə bağlı razılaşdırılmış məlumatlar ötürülür. Dağlıq Qarabağ konfliktində də belə idi. Qeyd olunurdu ki, Azərbaycan tərəfi dəfələrlə belə formatda görüşün keçirilməsinə razı olub, ancaq Ermənistan razılaşmırmış. Biz Münhendə bu formatı görə bildik. Həmin debat vəziyyətin hansı yerdə olduğunu üzə çıxardı. Nəticə nədir? Azərbaycan tərəfi haqlı tələblərində israrlıdır. Biz ölkəmizin ərazi bütövlüyünü təmin etmək istəyirik. Bunu həm hüquqi, həm də mənəvi cəhətdən Ermənistandan tələb edirik. Ermənistan isə işğala haqq qazandırmaq üçün müxtəlif variantlara əl atır. Buna görə də Paşinyanın Münhendə düşdüyü vəziyyətlə üzləşir.
Prezident İlham Əliyevin ortaya qoyduğu faktlar konkret tarixi sənədlərə söykənir. Ölkə başçısı Dağlıq Qarabağın Azərbaycana məxsus olmasını elmi və tarixi dəlillərlə, əsaslandırılmış şəkildə izah etdi. Dağlıq Qarabağla bağlı məlumatı olmayanlara belə məlum oldu ki, Dağlıq Qarabağ həmişə Azərbaycanın tərkibində olub və bu ərazilər Ermənistanın işğalına məruz qalıb. Amma cavabında nə gördük? Gördük ki, dili topuq vuran işğalçı tərəf heç bir sənədə əsaslanmayan fikirlərlə populist çıxışlar etdi. Bəlli oldu ki, Paşinyan da Ermənistanın əvvəlki rəhbərləri kimi işğal niyyətindən əl çəkməyəcək. Bu debatda nöqtə qoyuldu ki, Ermənistan özbaşına Dağlıq Qarabağ problemini sülh və ya danışıqlar yolu ilə həll etməyə qadir deyil. Bu müzakirədən bəlli oldu ki, ərazilərimizi azad etmək üçün başqa bir variant qalmayıb. Sülhlə bunun mümkünlüyü inandırcı sayılmır. Azərbaycanın tam haqqı çatır ki, öz ərazi bütövlüyünü hərbi yolla bərpa etsin”.
Məhəmmədəli QƏRİBLİ
