Kamil Musəvinin namizədliyinin ləğvi üçün əsaslar tam yetişib...
Xəbər verdiyimiz kimi, 60 saylı Salyan-Neftçala seçki dairəsindən deputatlığa namizəd Fəzail Ağamalı və rəqibi Kamil Musəvi arasında qalmaqal yaşanıb.
Fəzail Ağamalı baş verən hadisə ilə bağlı Baş prokuror Zakir Qaralova, Daxili İşlər naziri Vilayət Eyvazova, Dövlət Təhlükəsizliyi Xidmətinin rəisi Əli Nağıyevə, Mərkəzi Seçki Komissiyasının sədri Məzahir Pənahova, 60 saylı Salyan-Neftçala Dairə Seçki Komissiyasının sədri F.Muradova və KİV-ə müraciət edib. F.Ağamalı hadisənin Salyan rayonunun Qarabağlı kəndində seçicilərlə keçirdiyi görüşü başa çatdırandan sonra baş verdiyini bildirib: “Deputatlığa namizəd Kamil Musəvi müxtəlif bölgələrdən gətirdiyi sərxoş və nəşəli insanlarla birlikdə aqressiv şəkildə üzərimə hücum etdilər. Söyüş və təhqiramiz davranışlarla mənə və tərəfdarlarıma fiziki təzyiq göstərdilər. Minik maşınıma əllərindəki küt alətlərlə zərbələr vurmağa başladılar”.
Deputatlığa namizəd aidiyyəti orqanlardan məsələyə hüquqi qiymət verilməsini xahiş edib: “Əvvəlcədən təşkil olunan bu təxribat şəxsiyyətimi alçaltmaq və mənə fiziki xəsarət yetirmək məqsədi daşımış və ictimai təhlükəsizlik xarakteri almış, deputatlığa namizəd Kamil Musəvi tərəfindən hüquqlarım kobud şəkildə pozulmuşdur. Pozulmuş hüquqlarıma, məruz qaldığım mənəvi və fiziki hücumlara, şəxsiyyətimin təhqir olunmasına hüquqi qiymət verilməsini sizdən xahiş edirəm”.
Qeyd edək ki, Salyanda baş verən hadisənin videosu sosial şəbəkələrdə yayılıb. Həmin videodan görünür ki, bir namizəd öz tərəfdarları ilə rəqibinin üstünə hucum çəkir, hətta onun avtomobilinə də zədələr vurulur. Analoji halla bağlı Kamil Musəvinin namizədliyi ləğv oluna bilərmi və bunun hansı hüquqi mexanizmləri var?
- Mehman Muradlı: “Ola bilər ki, seçkilərdən sonra aparılacaq istintaqın nəticələrinə uyğun şəkildə qərar çıxarılsın”
Azərbaycan Vəkillər Kollegiyasının üzvü, hüquqşünas Mehman Muradlı qəzetimizə bildirdi ki, həmin hadisə ilə bağlı videoya bir neçə dəfə baxıb: “Biz bir qədər standart seçki taktikalarına öyrəşmişik. Baş verən hadisədə ağır cinayət əməli yox idi. Ancaq qanun pozuntuları vardı. Bunun üçün də məsuliyyət nəzərdə tutulur, ancaq ola bilər ki, inzibati qaydada olsun. Çünki namizədə qarşı nalayiq hərəkətlər edilib, onun avtomobilinə ziyan vurulub. Mən mediadan tanış oldum ki, artıq Fəzail Ağamalı hüquq-mühafizə orqanlarına şikayət edib. Edilən istənilən şikayət araşdırılmalıdır. Bunun üçün vaxt amilinə də nəzər yetirməliyik. Ola bilər ki, kiminsə təqsirkar olması dərhal deyil, aparılan istintaq nəticəsində ortaya çıxa bilər. Bizdə seçki bazar günü keçiriləcək. Belə olan halda, namizədliyin ləğvi mümkün olmayacaq. Çünki artıq namizədlərin adları bülletenlərə salınıb. Ancaq qanunun tələblərində namizədliyin tez bir vaxtda ləğv edilməsi də var. Əgər həmin zaman hansısa bir ağır cinayət baş versəydi, prokurorluq dərhal namizədliyin ləğvi ilə bağlı Mərkəzi Seçki Komissiyasına müraciət edəcəkdi. Orda da təcili toplantı çağırılaraq namizədliyin ləğvi məsələsinə baxılacaqdı. Bundan sonra namizədliklə bağlı olan toxunulmazlıq da aradan götürülür və cinayət təqibi həyata keçirilə bilər. Hesab edirəm ki, Salyanda baş verən hadisədə belə hal müşahidə edilmədi. Ola bilər ki, seçkilərdən sonra aparılacaq istintaqın nəticələrinə uyğun şəkildə qərar çıxarılsın. Bir daha qeyd edirəm ki, namizədliyin dərhal ləğvi üçün ciddi zəmin yoxdur. Ancaq kifayət qədər qanun pozuntusu ilə müşayiət olunan bir hadisədir, ona da hüquqi qiymət veriləcək. Seçkinin təbliğat-təşviqat hissəsi üçün də qanunun tələbləri müəyyənləşib. Həmin proses də qanunun tələblərinə uyğun şəkildə aparılmalıdır. Qanunun tələblərinə kiminsə riayət etməməsi pozuntu sayılır və buna görə də, dərəcəsindən asılı olaraq, məsuliyyət müəyyənləşdirilib”.
Məhəmmədəli QƏRİBLİ
