Son günlər sosial şəbəkələrdə Milli Məclisin deputatlarının seçiciləri ilə görüşləri zamanı baş verən qalmaqallar haqqında çoxsaylı videomaterial yayılıb. Bütün bu çəkilişlər görüş iştirakçısı olan vətəndaşlar tərəfindən aparılıb. Görünən odur ki, bəzi dairələrdə seçicilər deputatlığa namizədləri fitə basır, açıq-aşkar hörmətsizlik göstərir və onlara ciddi iradlar bildirirlər.
Xüsusən də əvvəl deputat olmuş bəzi namizədlər belə situasiyalarla üzləşirlər. Faktiki olaraq, əvvəlki çağırış parlamentin bir sıra deputatları belə vəziyyətə düşüblər. Nəticədə bəzi namizədlərin seçicilərlə görüşmək cəhdləri baş tutmayıb.
Bütün bunlar da səbəbsiz deyil. Məsələ ondadır ki, insanlar deputatların seçicilərin xahişlərinə məhəl qoymamasının, regionlara gəlməməsinin və sadə insanlar üçün heç nə etməməsinin səbəbləri ilə bağlı izahat tələb edirlər. İradlar yüksək səs tonu ilə bildirilir və bəzən bu, davaya qədər gedib çatır. Seçicilər deyirlər ki, yalnız seçkidən-seçkiyə onlar namizədlərin yadına düşürlər. Deputat seçiləndən sonra bəzi millət vəkilləri, ümumiyyətlə, dairələrə gedib seçiciləri narahat edən məsələlərlə maraqlanmır, vətəndaşların onlara ünvanladığı məktubları cavablandırmırlar. Bütün bunlar da növbəti seçki kampaniyasında belə gərginliklərin baş verməsinə gətirib çıxarır.
Maraqlıdır, yeni parlament formalaşandan sonra bir sıra deputatlar bundan ciddi nəticə çıxaracaqlarmı? Yəni belə hallar baş verməsin deyə, seçiciləri qayğılandıran məsələlərə diqqət ayıracaqlarmı?
“Ona görə də deputat olacaq namizədlər öz məsuliyyətlərini dərk etməlidirlər”
Məsələyə münasibət bildirən Azərbaycanda Vətəndaş Cəmiyyətinin İnkişafına Yardım Assosiasiyasının (AVCİYA) Seçki Qərargahının rəhbəri Məhərrəm Zülfüqarlının sözlərinə görə, bu baxır deputatın fəaliyyətinə: “Bundan ciddi nəticə çıxarıb seçicilərlə işləyənlər də olacaq, əvvəlki kimi işinə laqeyd yanaşanlar da. Eləsi olacaq ki, işinə vicdanla yanaşacaq. Fikirləşəcək ki, seçicilərin etimadını doğrultmasa, onun da başına belə işlər gələ bilər. Demək ki, bu baş verənlər bütün deputatlar üçün ciddi dərs olacaq, bu doğru olmaz. Passiv deputatlar hər zaman olub. Baxmayaraq ki, bu, millət vəkilinin imici üçün yaxşı bir şey deyil. Deputat gərək öz işində məsuliyyətli olsun. Seçiciləri narahat edən məsələlərlə vaxtında maraqlansın. Belə olmadıqda bu onun əleyhinə işləyir və seçicilər arasında nüfuzunu itirməyə başlayır. Nəzərə almaq lazımdır ki, seçkinin özü siyasətdir. Cəmiyyətin idarə olunmasında iştirak etmək deməkdir. Bu il seçki dairələrində seçici fəallığı var. İndi seçicilər bir neçə il qabaq olduğu kimi, istənilən vədə inanmırlar. Ona görə də deputat olacaq namizədlər öz məsuliyyətlərini dərk etməlidirlər”.
Vidadi ORDAHALLI
