“Əfsuslar olsun ki, 20 il ərzində bu təşkilat Azərbaycanı hədəf seçib, Türkiyəni isə daha uzun müddət ərzində”. Bunu Prezident İlham Əliyev Türkiyə Xarici İşlər naziri Mövlud Çavuşoğlunun başçılıq etdiyi nümayəndə heyətini qəbul edərkən deyib.
Ölkə başçısının sözlərinə görə, Avropa Şurasının Parlament Assambleyasında fəaliyyət göstərən insanlar kimi bu təşkilatı yaxşı tanıyırıq: “Əfsuslar olsun ki, 20 il ərzində bu təşkilat Azərbaycanı hədəf seçib, Türkiyəni isə daha uzun müddət ərzində. Xatırlayıram, ilk dəfə mən Azərbaycan nümayəndə heyətinin rəhbəri kimi Avropa Şurası Parlament Assambleyasında fəaliyyətimə başlayanda mənim ilk addımım Azərbaycan heyətini Türkiyə heyəti ilə görüşdürmək idi. Biz elə birinci gün görüşüb razılaşdıq, anlaşdıq ki, bütün məsələlərdə bir-birimizə daim dəstək olacağıq. Əfsuslar olsun ki, hesab edirəm o illərdən bəri Avropa Şurasında deqradasiya prosesi gedir. Bu təşkilat beynəlxalq müstəvidə öz əhəmiyyətini itirməkdədir. Təşkilat dünyada gedən proseslərə heç bir təsir etmək gücündə deyil. Təşkilatın nüfuzu çox aşağı düşüb və bunun yəqin ki, başlıca səbəbi təşkilatda hökm sürən riyakarlıq, ikili standartlar və ədalətsizlikdir”.
Prezidentin sözlərinə görə, nə üçün Ermənistana qarşı bir münasibət var, Azərbaycana, Türkiyəyə qarşı başqa münasibət: “Biz bu sualın cavabını yaxşı bilirik və bir daha qeyd etmək istəyirəm, yaxşı olardı ki, Avropa Şurası bu məsələlərlə məşğul olsun. Bu gün bu təşkilat əfsuslar olsun, bir daha demək istəyirəm ki, heç bir nüfuza malik deyil, onların qəbul etdiyi qərarlar bizim üçün tamamilə əhəmiyyətsizdir. Azərbaycanla bağlı qəbul edilmiş son qətnamə bizim üçün heç bir əhəmiyyət kəsb etmir və bu qətnamənin bizim üçün dəyəri bir kağız parçasından artıq deyil”.
Həqiqətən də AŞPA Azərbaycan və Türkiyəyə qarşı çox ədalətsiz münasibət sərgiləyir. Nəzərə alsaq ki, Azərbaycan Avropa İttifaqının enerji təchizatına mühüm töhfələr verir, bir sıra layihələrin həyata keçirilməsində vacib rol oynayır, o zaman qurumun belə siyasət sərgiləməsinin heç bir məntiqi və digər əsası yoxdur. Hansı ki, Avroropa üçün enerji xətlərinin diversifikasiyası çox önəmlidir. Ancaq AŞPA-nın hədəfində Azərbaycanla Türkiyədir.
Yeri gəlmişkən onu da qeyd edək ki, bir zamanlar Rusiyanın AŞPA-dakı fəaliyyəti donduruldu. Sonra Aİ-nin bəzi aparıcı ölkələri vasitəçilik edərək minnətçi düşüb Rusiyanı quruma qaytardılar. O baxımdan, Azərbaycan bu ədalətsizliklərə görə qurumu tərk etsə, bundan məhz AŞPA itirəcək.
“Qurumdan çıxmaq bizə heç bir zərər verməz, bundan ancaq qarşı tərəf itirəcək”
Sözügedən məsələ ilə bağlı fikirlərini “Bakı-Xəbər”lə bölüşən şərqşünas Seyid Camal Əzimbəylinin sözlərinə görə, zaman-zaman AŞPA Azərbaycana yönəlik ikili standartlardan çıxış edib: “Bu nə birincidir, nə də axırıncı. Əvvəl Türkiyəyə qarşı bu cür ədalətsizliklər edilirdi. Məlum olduğu kimi, Türkiyə bizdən xeyli əvvəl AŞPA-nın üzvü olub. Sonra sözügedən ikili standartlar Türkiyə ilə yanaşı, Azərbaycana qarşı da sərgiləndi. Zatən, 20 ildir biz bunu görürük. İndiyə qədər AŞPA işğalçı ilə işğala məruz qalan tərəfə fərq qoymayıb. Nəticədə Ermənistanın təcavüzkar fəaliyyəti cilovlanmayıb. Digər tərəfdən, AŞPA sərgilədiyi ikili standartlar üzündən beynəlxalq təşkilat olaraq dünya siyasətinə təsir imkanlarını itirib. O qurumun ki, qərarları siyasi sifarişlərə söykənir, belə bir təşkilatın effektiv fəaliyyətindən, nüfuzundan söhbət gedə bilməz. Necə ki, biz bunu AŞPA-nın timsalında zaman-zaman görürük. Bu gün Azərbaycan əksər dünya ölkələri ilə yüksək səviyyəli ikitərəfli münasibətlərə malikdir. Azərbaycan kimi, Türkiyənin də AŞPA-ya ehtiyacı yoxdur. Bütün bunlardan çıxış edərək hesab edirəm ki, qurumdan çıxmaq bizə heç bir zərər verməz, bundan ancaq AŞPA itirəcək”.
Vidadi ORDAHALLI
