Xəbər verildiyi kimi, Mərkəzi Seçki Komissiyası (MSK) parlament seçkiləri ilə bağlı Dağlıq Qarabağda yaşayan erməni əsilli Azərbaycan vətəndaşlarına müraciət edib.
Müraciətdə bilidirilir ki, Dağlıq Qarabağ bölgəsinin erməni əsilli Azərbaycan vətəndaşları da digər vətəndaşlarımız kimi bu seçkilərdə öz səsvermə hüquqlarından azad və sərbəst şəkildə istifadə edə bilər: “Ermənistanın işğalı nəticəsində Azərbaycan Respublikasının vətəndaşları olan Dağlıq Qarabağ bölgəsinin erməni icması digər konstitusion hüquqları ilə yanaşı, seçki hüquqlarından da məhrum olmuşdur. Ermənistan bu ərazilərdə dəfələrlə saxta seçki şousu yaratmağa cəhd göstərmişdir. Azərbaycan ərazilərində seçkilərin keçirilməsinin əsasını Azərbaycan Konstitusiyası və Seçki Məcəlləsi təşkil etdiyi üçün, bu “seçkilər” qeyri-legitimdir və beynəlxalq ictimaiyyət tərəfindən tanınmır. Ermənistanın hərbi təcavüzü nəticəsində ölkə ərazisindəki 125 seçki dairəsindən 7-nin ərazisi tamamilə, 3 seçki dairəsi ərazisinin isə bir hissəsi işğal altındadır. Bununla yanaşı, digər 4 seçki dairəsi ərazisində də məcburi köçkün məntəqələri mövcuddur.
Azərbaycan Respublikasının Mərkəzi Seçki Komissiyası bəyan edir ki, Azərbaycanın Dağlıq Qarabağ bölgəsinin erməni əsilli Azərbaycan vətəndaşları da digər vətəndaşlarımız kimi bu seçkilərdə öz səsvermə hüquqlarından azad və sərbəst şəkildə istifadə edə bilər və bunun üçün Azərbaycan Respublikası qanunvericiliyinin tələblərinə uyğun olaraq bütün addımların atılmasına hazırdır”.
Diqətçəkən məqam odur ki, MSK-nın Dağlıq Qarabağın erməni əsilli Azərbaycan vətəndaşlarına məlum müraciəti Ermənistanda marağa səbəb olub. Bununla belə, Ermənistanda müəyyən dairələr sözügedən müraciətdən narahatdırlar. Hər vasitə ilə bunu inkar etməyə çalışırlar. Bütün hallarda, maraqlıdır, ermənilər bundan niyə bu qədər narahatdırlar?
“Bütün bunlar Ermənistanın maraqlarına uyğun olmadığına görə məlum müraciətdən narahat olmağa başlayıblar”
Məsələyə münasibət bildirən siyasi ekspert Ramil Hüseynov bunu bir sıra faktorlarla əlaqələndirdi: “Ermənilərin MSK-nın məlum müraciətindən narahat olması bir neçə amillə bağlıdır. Əvvəla Ermənistan Dağlıq Qarabağı və ətraf 7 rayonu işğal edəndən sonra davamlı olaraq belə təbliğat aparır ki, ermənilərlə azərbaycanlılar bir yerdə yaşaya bilməz. Bunu onunla əsaslandırmağa çalışırlar ki, Azərbaycanda guya güclü ermənifobiya var, Qarabağdakı etnik ermənilər linç ediləcək, dövlət səviyyəsində bu siyasət dəstəklənir və s. Qarabağdakı separatizmə haqq qazandırmaq üçün beynəlxalq təşkilatlara da bizi belə təqdim edirlər. Guya azərbaycanlılarla birlikdə yaşamaq mümkün deyil. Bu baxımdan MSK-nın məlum müraciəti onları çaşbaş salıb. Məlum olur ki, Azərbaycan Dağlıq Qarabağdakı erməni vətəndaşların varlığını inkar etmir. Əksinə, onların səsvermədə iştirakını istəyir. Zatən, onlar Ermənistanın işğalçı siyasətinin girovuna çevriliblər. Otuz ildir iqtisadi-sosial sıxıntılar içərisində yaşayırlar. Bölgənin Azərbaycanın nəzarətindən çıxması Qarabağdakı etnik ermənilərə xoşbəxtlik gətirməyib. Başqa bir tərəfdən, Ermənistanın narahatlığı onunla bağlıdır ki, Qarabağdakı separatçı qurum indiyə qədər heç bir dövlət, beynəlxalq birlik tərəfindən tanınmayıb. Baxmayaraq ki, 30 ilə yaxındır Qarabağ ermənilərin nəzarətindədir. Azərbaycan bu siyasi gedişi ilə dünyaya bir daha göstərdi ki, Qarabağdakı etnik erməniləri öz vətəndaşı hesab edir. Bütün bunlar Ermənistanın maraqlarına uyğun olmadığına görə məlum müraciətdən narahat olmağa başlayıblar”.
Vidadi ORDAHALLI
