Məlum olduğu kimi, erməni işğalı altında olan Dağlıq Qarabağda separatçı rejim martın 29-da qondarma “parlament və prezident seçkiləri” keçirməyə hazırlaşır. Dağlıq Qarabağ işğal ediləndən sonra bənzər qondarma “seçkilər” dəfələrlə keçirilib. Ancaq həmin “seçkiləri” heç bir dövlət, beynəlxalq təşkilat tanımayıb. Heç şübhəsiz ki, bu dəfə də qondarma “seçkilər” dünya ictimaiyyəti tərəfindən tanınmayacaq.
Ancaq onu da nəzərə almaq lazımdır ki, bu dəfə vəziyyət və situasiya fərqlidir. Məsələ ondadır ki, bu günlərdə Azərbaycan və Ermənistan Xarici İşlər nazirləri Cenevrədə bir araya gələrək münaqişənin tənzimlənməsi ilə bağlı danışıqlar aparıblar. Aparılan substantiv danışıqlar iki gün davam edib və tərəflər bir sıra məqamları müzakirə ediblər. Yəni substantiv danışıqlar getdiyi Cenevrə görüşü başqa vəziyyət yaradıb. Belə vəziyyətdə “DQR”də qondarma “seçkilərin” keçirilməsi aparılan danışıqları poza bilər. Bu baxımdan ola bilərmi ki, Qarabağdakı bu qondarma “seçkilərin” dayandırılması məsələsi tələb kimi fəallaşdırılsın? Belə bir ehtimalı ekspertlər necə dəyərləndirirlər?
“Azərbaycan tərəfi təkcə diplomatik deyil, eyni zamanda, hərbi müstəvidə Ermənistana təzyiq etməlidir”
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin fikrincə, həmsədrlər bununla bağlı Ermənistana təzyiq göstərsə, separatçı qurumda qondarma “seçkilərin” keçirilməsi təxirə salına bilər: “Cenevrədə başlanan və ATƏT-in Minsk Qrupunun həmsədrlərinin iştirakı ilə keçirilən Qarabağ danışıqlarını növbəti dəfə Ermənistan tərəfi pozmağa çalışır. Ermənistanın məhz martın 29-da Azərbaycanın işğal olunmuş ərazilərində keçirəcəyi qondarma “seçkilər” buna hesablanıb. Heç bir beynəlxalq təşkilat tərəfindən tanınmayan bu “seçkiləri” keçirməklə İrəvan, bir növ, danışıqları uzatmağa çalışır. Hesab edirəm ki, Azərbaycan tərəfi Minsk Qrupunun həmsədrləri qarşısında bu məsələni qaldırmalı və danışıqlar prosesində belə qanunsuzluqlara yol verilməməsini tələb etməlidir. Düşünürəm ki, Ermənistan heç də Cenevrə danışıqlarının müsbət istiqamətdə irəliləyişində maraqlı deyil. Ona görə də Azərbaycan tərəfi təkcə diplomatik deyil, eyni zamanda, hərbi müstəvidə Ermənistana təzyiq etməlidir. Fikrimcə, Azərbaycanın bu addımları Ermənistanın bu avantüralarının qarşısını ala bilər. Nəticədə proseslər lehimizə işləyəcək”.
Vidadi ORDAHALLI
