Erməni mətbuatı iddia edir ki, guya ölkədəki qaçqınlar mənzillə təmin ediləcək. Bunu onunla əsaslandırmağa çalışırlar ki, Ermənistan hökuməti 1988-1992-ci illərdə Azərbaycanı tərk etmiş qaçqın ailələrinə mənzil sertifikatı vermək proqramını bərpa edib. Artıq bununla bağlı qərar verilib və 112 ailə qısa müddətdə mənzillə təmin ediləcək. Sonrakı mərhələdə isə digərləri mənzilə sahib olacaqlar.
Ərazi İdarəetmə və İnfrastruktur Nazirliyinin Miqrasiya Xidməti rəhbərinin müavini İrina Davtyan jurnalistlərə proqramın təfərrüatları və sertifikat üçün müraciət qaydaları barədə məlumat verib. Onun sözlərinə görə, 2013-cü ilin məlumatlarına əsasən, 895 qaçqın ailəsi evsizdir. Onlardan 641-i İrəvanda, 254-ü isə bölgələrdədir. Böyük maliyyə mənbələri nəzərə alınmaqla problemi mərhələli və prioritet olaraq müxtəlif alt proqramlarla həll etmək qərara alınıb. Noyabrın 21-də keçirilən iclasda hökumət 2008-ci ildə dondurulmuş 112 qaçqın ailəsinə mənzil vermək üçün sertifikat vermə proqramını bərpa etmək qərarına gəlib. Bu məqsədlə büdcədən 1,5 milyard dram (3.1 milyon dollardan çox) ayrılacaq.
Davtyan qeyd edib ki, qaçqınlara mənzil verilməsi qaydası ilə bağlı qərar 2004-cü ildə verilib. 2005-2008-ci illərdə bununla bağlı guya hansısa addımlar atılıb. 2008-ci ildəki maliyyə böhranı ilə əlaqədar olaraq proqram dayandırılıb. Onun sözlərinə görə, yataqxanalarda və ya müvəqqəti sığınacaqlarda, məktəblərdə, uşaq bağçalarında və ya otellərdə 30 ildən çox müddətdə yaşayan insanlar üçün öz mənzillərinə sahib olmaq çox vacibdir.
Açıq-aydın görünür ki, qaçqınların mənzillə təmin ediləcəyi ilə bağlı deyilənlər Ermənistan hökumətinin yeni oyunudur. Ən azından ona görə ki, Ermənistan hökumətinin bunu həyata keçirmək üçün maliyyə imkanı yoxdur. Digər tərəfdən, erməni rəsmisi sözügedən proqramın konkret hansı mənbələr hesabına maliyyələşdiriləcəyini açıqlamayıb. Belə olan halda, uzun illər dayandırılmış proqram hansı vəsait hesabına maliyyələşdiriləcək? Deməli, bu, Paşinyan hakimiyyətinin növbəti blefidir və bundan təbliğat məqsədi üçün istifadə etmək istəyirlər.
“...bu deyilənlərin heç bir real əsası yoxdur”
Məsələyə münasibət bildirən AMİP funksioneri Əli Orucovun sözlərinə görə, Ermənistanın ölkədəki qaçqınları mənzillə təmin etmək imkanı olduqca məhduddur: “Deyərdim ki, yox dərəcəsindədir. Çünki 1988-ci ildə Spitakda baş verən zəlzələ zamanı evsiz qalan ermənilər hələ də mənzillə təmin edilməyiblər. Bu barədə xarici media orqanlarında, hətta yerli erməni KİV-ində dəfələrlə məlumatlar yayılıb. Hansı ki, sözügedən zəlzələ ilə bağlı Ermənistana böyük yardımlar edildi. Erməni lobbisi xətti ilə maliyyə vəsaitləri köçürüldü. Ancaq Ermənistanda hakimiyyətdə olan qüvvələr bu vəsaitləri mənimsədilər. Ona görə də Spitak zəlzələsi zamanı evsiz qalan erməniləri evlə təmin edə bilməyən Ermənistan hökuməti qaçqınları necə evlə təmin edəcək? Başqa bir tərəfdən, Paşinyan hakimiyyətə gələndən sonra Ermənistan iqtisadiyyatında köklü nəsə baş verməyib. O mənada ki, ölkənin maliyyə resursları əsaslı şəkildə artmayıb. Deyəsən ki, bu imkanlar hesabına mənzillər tikiləcək. Ermənistanın builki dövlət büdcəsi 3,5 milyard dollardır. Mənzil tikintisi böyük vəsait tələb edir. Azərbaycan bu istiqamətdə böyük işlərə imza atıb. Bu da onunla əlaqədardır ki, Azərbaycan böyük neft gəlirlərinə malikdir. Ermənistanın nəyi var? Ona görə də bu deyilənlərin heç bir real əsası yoxdur. Ermənistan hakimiyyəti bundan təbliğat məqsədi üçün istifadə edir. Bununla ölkə ictimaiyyətinin başını qatırlar və cəmiyyətdə reytinq qazanmağa çalışırlar”.
Vidadi ORDAHALLI
