“Regionların 2019-2023-cü illərdə sosial-iqtisadi inkişafı Dövlət Proqramı”nın icrasının birinci ilinin yekunlarına həsr olunan konfransda Prezident İlham Əliyev Azərbaycanın təşəbbüsü, təşkilatçılığı ilə həyata keçirilən layihələrin hər birinin tarixi əhəmiyyət daşıdığını söyləyib. Prezident bu layihələrin, ümumiyyətlə, görülən işlərin hamısının Azərbaycan xalqı qarşısında böyük xidmətlər olduğunu vurğulayıb.
Dövlət başçısı qeyd edib ki, uğurlu inkişafımızı, sabitliyi şərtləndirən, cəmiyyətdə xoş əhval-ruhiyyəni formalaşdıran bizim siyasətimiz və addımlarımızdır: “Nəyi demişiksə, onu da etmişik. Bir dənə də icra edilməmiş vəd yoxdur. Heç kim bunu tapa bilməz. 2003-cü ildə və ondan sonrakı illərdə nəyi demişəmsə, onu da etmişəm. Ona görə bizim sözümüzə də, işimizə də xalq tərəfindən böyük inam var. Mən həmişə demişəm ki, bizim sözümüzün qüvvəti imzamız qədər olmalıdır və bu gün bu, belədir”.
Maraqlıdır ki, erməni mətbuatı İlham Əliyevin nitqindəki bu məqama çox böyük diqqət ayırır və özlərinə sərf edən tərzdə yorumlar edirlər. İlham Əliyevin “2003-cü ildə və ondan sonrakı illərdə nəyi demişəmsə, onu da etmişəm” kimi səsləndirdiyi fikri və həmin zamandan indiyə qədər Azərbaycanın əldə etdiyi uğurları barədə söylədikləri Ermənistan hakim dairələrini niyə ciddi narahat edir? Erməni KİV-indəki ab-hava onların hakimiyyətinin məsələlərə olan münasibətinin tam inikasıdır. Cənab Prezidentin geniş və məzmunlu nitqində olan məhz bu məqama diqqət yönəltmələri təsadüfi deyil. Çünki İlham Əliyev məhz 2003-cü ildə Prezident seçilib. Onun həmin zamandan başlayaraq, verdiyi bütün sözlərə əməl etməsi tam reallığı əks etdirir. Bu müddət ərzində Azərbaycanda ölçüyəgəlməz dərəcədə inkişaf olub. Bunu bütün beynəlxalq reytinq agentlikləri də öz hesabatlarında qeyd edirlər. İlham Əliyevin prezidentliyi dönəmidə əldə olunan uğurlar konkret bir sahəni yox, bütün seqmentləri əhatə edir. Ermənistan bizimlə düşmən ölkədir. Təbii ki, onlar Azərbaycanın qüdrətli olmasını yox, iqtisadi cəhətdən çökməsini istəyirlər. Ancaq 2003-cü ildən İlham Əliyevin rəhbərliyi ilə həyata keçirilən siyasət onların istəyinin reallaşmasına qəti imkan vermir. Azərbaycan həmin zamandan bəri həm də hərbi cəhətdən daha da qüdrətli ölkəyə çevrilib. Ermənistan rəhbərliyini narahat edən məqamlardan biri də budur ki, nümayiş etdirdikləri qeyri-konstruktivliyin hər an hərbi yolla cavabını ala bilərlər. Ən əsası isə İlham Əliyev bu keyfiyyətlərinə görə həm də sözünün ağası olan bir ölkə başçısı kimi xarakterizə olunur. Onların özündə isə bütün sadalananlar yoxdur. 2003-cü ildən bəri Azərbaycan və Ermənistanın inkişafları arasında paralellər aparsaq, ortaya dəhşətli dərəcədə təzadlı mənzərə çıxacaq. Ermənistan bu müddət ərzində çöküb. Demoqrafik vəziyyət acınacaqlı hal alıb. Ölkənin daxilində vətəndaş qarşıdurması hökm sürür. Bunun nəticəsində hakimiyyət sivil yox, inqilab yolu ilə dəyişdirildi. Hazırda Ermənistana rəhbərlik edən Baş nazir Nikol Paşinyan hakimiyyətə gəldiyi meydanlarda xalqa verdiyi sözləri necə, yerinə yetirə bilibmi? Təbii ki, yox. Bunu təkcə biz demirik, həm də Ermənistanın daxilindəki ictimai rəy Paşinyanı verdiyi sözlərə əməl etməyən bir avantürist kimi qiymətləndirir. Məhz buna görə də Ermənistan hakimiyyətini İlham Əliyevin nitqində məhz deyilən məqamın narahat etməsi təsadüfi sayıla bilməz. Çünki verdiyi sözə əməl etmək siyasətçi üçün çox önəmli sayılan keyfiyyətdir ki, İlham Əliyev buna tam sahibdir.
Məhəmmədəli QƏRİBLİ
