Bu gün Ermənistanda Baş nazir Nikol Paşinyanla Konstitusiya Məhkəməsinin sədri Hrayr Tovmasyan arasındakı mübarizə açıq mübarizə mərhələsinə qədəm qoyub. İş burasındadır ki, Nikol Paşinyan bütün rəqiblərini inzibati rıçaqlar hesabına ram etmək istəyir. Ona tabe olmayanlara cinayət işləri açdırır, hətta ən tanınmış şəxsləri həbsə salmaqdan belə çəkinmir. Paşinyanın ram edə bilmədiyi şəxslərdən biri də ölkənin Konstitusiya Məhkəməsinin sədridir.
Bu günlərdə N.Paşinyanın H.Tovmasyan haqqında gedən bir videomaterialı “Facebook” səhifəsində paylaşması problemi daha da dərinləşdirib. Konstitusiya Məhkəməsinin sədri buna görə Ermənistanın İctimai Televiziyasını və Baş nazirin özünü məhkəməyə vermək niyyətindədir. Qeyd edək ki, 2019-cu ilin dekabrında H.Tovmasyana qarşı onun hələ 2013-2018-ci illərdə ədliyyə naziri olarkən vəzifə səlahiyyətlərindən sui-istifadə etməsilə bağlı ittiham irəli sürülüb. Konstitusiya Məhkəməsinin sədri ona qarşı siyasi təqib aparıldığını söyləyir.
Erməni politoloqları və başqa nüfuzlu şəxslər Tovmasyana edilən hücumların kökündə siyasi məqsədlərin durduğunu deyirlər. Onların sözlərinə görə, həmin məhkəmənin digər əməkdaşı sayılan Norayr Panosyana qarşı açılan cinayət işi də Paşinyanın sifarişi ilə həyata keçirilib və məqsəd Konstitusiya Məhkəməsinin sədrini istefaya göndərməkdir. Erməni politoloqlarından birinin sözlərinə görə, Ermənistan hakimiyyətində təkcə özünü görən N.Paşinyan dövlətin maraqlarından irəli gəlməyən, təkcə öz hakimiyyətinin maraqlarına xidmət edəcək tərkibdə Konstitusiya Məhkəməsini yaratmaq istəyir. Bundan başqa, erməni politoloq Konstitusiya Məhkəməsinə qarşı mübarizənin əsas səbəblərindən biri kimi konvensiyaların ratifikasiya edilməməsi qorxusunun olduğunu da istisna etmir.
Görünən budur ki, Paşinyan həm də Ermənistanda məhkəmələrin müstəqil olmasını istəmir. Ölkənin daxilində Paşinyanın addımlarına etirazlar olsa da, beynəlxalq arenadan biz lazımi reaksiyaların verildiyinin şahidi olmuruq. Xüsusilə də ölkənin üzvü olduğu Avropa Şurası kimi qurum bu açıq hərcmərcliyə reaksiya vermir. Biz dəfələrlə bu cür məsələlərdə Azərbaycana qarşı ikili standartların tətbiq edildiyinin şahidi olmuşuq. Azərbaycanda xırda bir qanun pozuntusu olan kimi həmin dəqiqə Avropa strukturları siyasi məzmunlu bəyanatlar verirlər. Hətta xırda faktları əllərində rəhbər tutaraq, Azərbaycanda demokratiyanın olmadığına dair fikir bildirirlər, vəziyyətin tezliklə düzəldilməsinə dair ultimativ tələblər irəli sürürlər. Bu gün Ermənistanda birbaşa Baş nazirin diqtəsi və iştirakı ilə baş verən proseslərə diqqət edin. Onun bütün rəqiblərinə qarşı hüquqi müstəvidə cinayət işləri açılır, hətta bir çoxu həbs edilir. Ermənistanda Paşinyana tabe olmayan, son alınmaz qala kimi xarakterizə olunan Konstitusiya Məhkəməsinin üzvləri və rəhbərinə qarşı total hücum həyata keçirilir, amma bir dənə də olsun Avropa strukturunun səsi çıxmır. Bunun bir adı var, qərəz. Paşinyanın bu əməllərinə görə hətta Ermənistana sanksiya da tətbiq etmək olar. Adam özünü açıq şəkildə diktator kimi aparır, ancaq Avropa strukturları, nədənsə, ona sığal çəkməklə məşğuldurlar.
Məhəmmədəli QƏRİBLİ
