Yanvarın 30-da Avropa Şurası Parlament Assambleyası (AŞPA) “Azərbaycanda siyasi məhbuslarla bağlı məlumatlar haqqında iş” üzrə qətnaməni qəbul edib. Müzakirələr zamanı deputatların əksəriyyəti sözügedən bədnam hesabatı dəstəkləyib.
Qətnamə layihəsi Azərbaycanda siyasi məhbuslar üzrə məruzəçi, İslaniyadan olan deputat Torhildur Sunna Evarsdottirin hesabatı əsasında hazırlanıb. Əsasən fransalı millət vəkili Bernard Furnye canfəşanlıq edib. İddia edib ki, guya Azərbaycan Avropa İnsan Hüquqları Məhkəməsinin (AİHM) qərarlarını icra etmir. Guya hüquq müdafiəçilərinin, fəalların fəaliyyəti bəzən onların həbsxanalara düşməsinə səbəb olur. Bununla belə, Furnye cəza və məhkəmə-hüquq sistemində islahatlarla bağlı Azərbaycan Prezidentinin fərmanlarını yüksək qiymətləndirib. Ancaq o bu tədbirləri yetərli saymayıb.
Öz növbəsində, Azərbaycan nümayəndə heyətinin üzvləri hesabatın müddəaları ilə qəti şəkildə razılaşmayaraq buna öz etirazlarını bildiriblər. Sahibə Qafarova məruzədə cinayət əməllərinə görə mühakimə olunan dini radikalların siyasi məhbus kimi təqdim edilməsinin düzgün olmadığını deyib. Digər azərbaycanlı deputatlar da tənqidi qəbul etməyərək Azərbaycanın AŞ ilə əməkdaşlığa sadiq olduğunu qeyd ediblər. Eyni zamanda, demokratiya quruculuğunda obyektiv çətinlikləri və keçmişin ağır irsini qeyd ediblər. Rusiya, Türkiyə və bir sıra digər ölkələrin bəzi deputatları Azərbaycan nümayəndə heyətini dəstəkləyiblər.
Göründüyü kimi, AŞPA Azərbaycana qarşı növbəti dəfə qərəzli mövqedən çıxış edərək bu cür əsası olmayan qətnamə qəbul edib. Bu bir daha qurumun Azərbaycana qarşı qərəzli mövqedən çıxış etdiyini sübut edir.
“AŞPA-nın məlum bədnam və qərəzli qətnaməsi də məhz bu qəbildəndir”
Məsələyə münasibət bildirən ekspert Azər Həsrətin fikrincə, AŞPA-nın belə qərəzli qətnamə qəbul edəcəyi gözlənilən idi: “Çünki bütün vasitələrlə müəyyən dairələr buna çalışırdılar. Ötən il Varşavada ATƏT-in Demokratik Təsisatlar və İnsan Haqları Bürosunun illik toplantısında iştirak etdim. Həmin toplantıda ABŞ-ın dövlət nümayəndəsi öz çıxışında Azərbaycandakı “siyasi məhbuslardan” danışdı. Konkret olaraq ad çəkərək bildirdi ki, filan şəxs siyasi motivlərə görə həbs edilib. Hansı ki, həmin şəxs Azərbaycanda silahlı radikal dini qruplaşma yratmaqda şübhəli bilinərək həbs edilib. Bu məni çox təəccübləndirdi və etiraz edib bildirdim ki, ABŞ niyə silahlı dini qruplaşma yaradan şəxsin həbsindən belə narahatdır. Hesab edirəm ki, ABŞ kimi AŞPA da sadəcə olaraq bəhanə axtarır. Müəyyən dairələr hər vasitə ilə Azərbaycanı gözdən salmaq istəyirlər. AŞPA-nın məlum bədnam və qərəzli qətnaməsi də məhz bu qəbildəndir. Onlar üçün fərqi yoxdur, Azərbaycanda ən ideal şərait olsa belə, mütləq bir bəhanə tapacaqlar. Bu da səbəbsiz deyil. Məsələ ondadır ki, Azərbaycanın müstəqil siyasət yeritməsi onları qane etmir. Qonşu Ermənistandan fərqli olaraq, dövlətimiz heç bir ölkənin vassalı deyil. Özünün müstəqil siyasəti var. Bu da Avropadakı qurumların xoşuna gəlmir. Ona görə də əllərinə bəhanə düşən kimi Azərbaycanın üstünə gedirlər. Fikrimcə, biz öz yolumuzla getməliyik və belə şeylərə əhəmiyyət verməməliyik”.
Vidadi ORDAHALLI
