İsrail hökumətinin Holokost hadisələri ilə bağlı Ermənistana verdiyi meydandan sonra indi də Rusiyadakı yəhudi icması yarımçıq bəyanat yayıb. Bəyanatda qeyd edilir ki, Ukrayna, Baltikyanı ölkələr və Polşada faşizmlə əlaqəli olan cinayətkarların qəhrəmanlaşdırılması, onların xatirələrinin əbədiləşdirilməsi yəhudilər tərəfindən pislənir.
Bu barədə bəyanatı Rusiya yəhudi icmasının prezidenti Aleksandr Boroda imzalayıb. Qurum rəhbəri Ukraynada Stepan Banderaya ucaldılan heykəlin də yığışdırılmasını tələb edir. Onun sözlərinə görə, belə adamlar milli azadlıq hərəkatının qəhrəmanları kimi cəmiyyətə təqdim olunur, əslində isə əlləri qana batmış faşistlərdir. Çox maraqlıdır ki, yəhudi icmasının rəhbəri bu xüsusda faşistlərin xatirəsini hamıdan çox əbədiləşdirən Ermənistanın adını qeyd etmir. Yəhidi diaspor rəhbərinin bu yarımçıq mövqeyini nə ilə izah edə bilərik?
Mübariz Əhmədoğlu: “Yəhudilər bu məsələdə ikili standarta yol verirlər, özü də açıq şəkildə”
Siyasi İnnovasiya və Texnologiyalar Mərkəzinin rəhbəri Mübariz Əhmədoğlu “Bakı-Xəbər”ə açıqlamasında bildirdi ki, bunun səbəbləri çoxdur: “Qeyd edim ki, son vaxtlar İsraillə Ermənistan arasında ciddi yaxınlaşma meylləri hiss edilir. Gördünüz ki, İsraildə keçirilən Holokostla bağlı tədbirdə Ermənistan Prezidenti yuxarı başa keçirilmişdi. Erməni mediası məlumat yayıb ki, yəhudilər Ermənistanda İrana qarşı baza tikirlər. Özü də Gümrüdə. Niyə məhz Gümrüdə olması onunla izah olunur ki, orada Rusiyanın da bazası var, İran risq edib həmin yeri vura bilməsin. Bu məlumat tam dəqiqdir. Amma olduqca ciddi məqamdır. Görünür, İsrailin Ermənistana qarşı yumşaq davranışlarının kökündə həm də bu amil durur. Çox maraqlıdır ki, Rusiyadakı yəhudi icmasının rəhbərinin bəyanatında da erməni təəssübkeşliyi hiss edilir. Bunu mən informasiyasızlıqla əlaqələndirməzdim. Çünki bəyanatın təsir dairəsinə çoğrafi cəhətdən daha uzaq olan Polşa düşürsə, onda Ermənistanın adının niyə qeyd edilməməsi şübhə doğurmaya bilməz. Bu yaxınlarda tanınmış yəhudi politoloqlarından birinin rəyi ilə tanış oldum. Bilirsiniz o nə deyir? Deyir ki, Qaregin Njdeni faşist kimi yox, anti-Türkiyə mövqeyində olan döyüşçü kimi tanıyırlar. Yəni Njdenin “qəhrəmanlığını” Osmanlıya qarşı döyüşdüyü ilə izah etdilər. Eyni Paşinyanın mövqeyi kimi. Bir müddət əvvəl Paşinayan da bənzər açıqlama vermişdi”.
Politoloqun sözlərinə görə, Njdenin faşistlərlə əlbir olması faktlarla sübuta yetir və Ermənistan hakimiyyəti ona heykəl qoyub: “Biz bütün bu faktları təkrarən bütün yəhidi diaspor təşkilatlarına və rəsmi dövlət qurumlarına göndərməliyik. Ona görə ki, məlumatlarının zəif olmasını bəhanə edə bilməsinlər. Hesab edirəm ki, son vaxtlar yəhudilərin bu istiqamətdə ermənilərlə bənzər siyasət yürütməsi Türkiyə və bizim tərəfimizdən ciddi nəzarətdə saxlanılmalıdır. Dünyada faşizmi Ermənistan qədər əbədiləşdirən ikinci ölkə yoxdursa, niyə onun adı çəkilmir? Deməli, yəhudilər bu məsələdə ikili standarta yol verirlər, özü də açıq şəkildə”.
Məhəmmədəli QƏRİBLİ
