“Qarabağ klanı” ilə Nikol Paşinyan iqtidarı arasında qarşıdurma yenidən özünün gərgin mərhələsinə daxil olmaqdadır. Belə görünür ki, “Qarabağ klanı” hakimiyyətin inzibati resurslar vasitəsilə onu sıradan çıxarmasına qarşı daha aktiv müqavimət göstərməyi planlaşdırır. Bunun ilkin anonsları artıq Ermənistanın eks-prezidenti Robert Köçəryan tərəfindən verilib.
Hakimiyyətə qarşı hərəkata rəhbərlik etdiyini bildirən Köçəryan qeyd edir: “Hakimiyyətin fəaliyyəti məni siyasətə qaytardı. Hakimiyyət həbsdə saxlamaqla məni özlərinin qabiliyyətsiz siyasətinə qarşı hərəkatın simvoluna çevirdi. Qarabağ hərəkatı başlayanda mən möcüzə nəticəsində Azərbaycan həbsxanasından qaça bildim. Taleyin ironiyası odur ki, məni azadlıqdan məhrum etməklə hakimiyyət azərbaycanlıların edə bilmədiyini etdi”. Həbsxanadan siyasi mübarizəyə başlayacağını bildirən Köçəryan “ölkənin azad olunması”nda vacib rol oynayacağını deyib.
Köçəryan tərəfdarlarının onun azad edilməsi uğrunda mübarizəni siyasi hərəkata çevirə biləcəklərini istisna etməyib:"Şübhəsiz ki, bu mümkündür". Onun sözlərinə görə, tarixdə həbsxanadan ilham alan siyasi mübarizənin bir çox uğurlu nümunələri var. Köçəryan həmçinin bildirib ki, Ermənistanda 2020-ci ildə siyasi landşaftın formalaşması başa çatacaq, bu da fəal vətəndaşları birləşdirəcək yeni siyasi gündəmin formalaşdırılmasına gətirib çıxaracaq. Onun sözlərinə görə, Ermənistanda növbədənkənar parlament seçkilərinin keçirilməsi siyasi proseslərin intensivliyindən, vətəndaşların iştirak səviyyəsindən, parlamentdəki hakim fraksiyanın sabitliyindən və hakimiyyətin səhvlərindən asılı olacaq. Xatırladaq ki, Köçəryan 2008-ci ilin mart hadisəsində konstitusiya quruluşunu devirməkdə ittiham edildikdən sonra 2018-ci ilin iyulunda həbs edilib.
Bu arada Ermənistanın sabiq prezidenti Serj Sarkisyan haqqında da cinayət işi məhkəməyə göndərilib. Xatırladaq ki, Serj Sarkisyan bir milyon dollardan çox dövlət vəsaitinin oğurlanmasının təşkilində ittiham olunur. Onunla birlikdə sabiq kənd təsərrüfatı nazirinin müavini Samvel Qalstyan, nazirliyin bitkiçilik idarəsinin rəisi Gevorq Arutyunyan və “Fleş” şirkətinin sahibi Barseq Beqlaryana da ittiham irəli sürülüb. Ötən il dekabrın ortalarında Sarkisyanın əmlakı üzərinə həbs qoyulub. İstintaqın versiyasına görə, sui-istifadə kəndlilərə dizel yanacağının münasib qiymətlərlə satılması üzrə hökumət proqramı çərçivəsində baş verib. Cinayət işinin materiallarına əsasən, Sarkisyan tabeliyindəki şəxslərə dizel yanacağının tədarükçüsü qismində “Fleş” kompaniyasını seçməyi tapşırıb. Halbuki, digər şirkət – “Masxur” kompaniyası daha ucuz qiymət təklif etmişdi. Müstəntiqlər hesab edirlər ki, sabiq prezident tamah məqsədilə sövdələşmədən özü üçün maksimum mənfəət götürmək niyyəti güdüb. Belə vəziyyətdə Sarksiyanın da həbsi qaçılmaz sayılır. Amma yuxarıda qeyd olunduğu kimi, “Qarabağ klanı” yaranmış durumda daha aktik müqavimətə hazırlaşır. Ermənistanın “168” nəşri yazır ki, klan ölkədə yaranan ağır sosial-iqtisadi durumdan istfiadə edərək insanları yenidən küçələrə çıxarmaq istəyir:“Əslində hökumətin hərəkətləri məhz bu cür hərəkatlar doğurur. Bir vaxtlar Paşinyan hökumətin atdığı addımlardan danışarkən bunun real gündəmdən, Qarabağ məsələsindən diqqəti yayındırmaq cəhdi olduğu deyilsə də, artıq bu reallıqdan uzaqdır. Paşinyan hökuməti gənclər üçün doğum evləri, kəndlilər üçün kəsmə yerləri, sürücülər və xüsusilə taksi sürücüləri üçün bal sistemləri olmaqla ən sadiq qrupları hədəf alaraq qəsdən populyar olmayan, məntiqi qərarlar qəbul edən kimi görünür. Sanki Paşinyanın “exit-strategy” həyata keçirdiyi təəssüratı var. Paşinyanın 1 milyon dollarlıq təmirli yeni evindən, yarım milyonluq yeni “Mercedes”lərdən və həyatın digər zövqlərindən imtina etməməsi ona kəskin antipatiya yaradır. Bu vəziyyətdən Paşinyanın rəqibləri artıq istfiadə etməyi düşünür. İndiki mərhələdə digər səbəblər barədə yalnız fərziyyə edə bilərik - bu, Qarabağ münaqişəsindəki fəlakət perspektivi qorxusu, bir ölkəni idarə edə bilməyəcəyinin açıq şəkildə ortaya çıxması, komandasından məyus olması və ya başqa bir problem ola bilər, ancaq Paşinyanın son vaxtlarda açıq şəkildə antixalq və münaqişə yaradan bir siyasət yürütdüyü aşkardır”. O da qeyd olunur ki, Paşinyanın hakimiyyətə gəlməsində əsas arqument və vasitə olan erməni xalqı siyasətdən kənarlaşdırılıb: “Eyni zamanda, Paşinyan hökumətinin ölkədə antihökumət hərəkatlarını qızışdırmağa çalışdığı kimi bir təəssürat yaradılır. Bu yaxınlarda Paşinyanın qəzetində hakimiyyət dəyişikliyinin bir neçə ssenarisini əks etdirən analiz dərc olunub. Bunlar təsadüfi deyil və Paşinyan özü də ona qarşı ölkədə yeni hərəkata rəvac verilə biləcəyini görür”.
İndiki halda belə əqüvvə qismində “Qarabağ klanı”nın ön plana çıxması da xüsusi vurğulanır və bu durumda klanla Paşinyan arasında ziddiyyətin daha da kəskinləşəcəyi proqnozlaşdırılır.
Tahir TAĞIYEV
