20/02/2020 21:37
728 x 90

9 fevral seçkisinin nəticələrinə kölgə sala biləcək neqativlər və pozuntular oldumu?

img

Ölkəmizdə keçiriləcək növbədənkənar parlament seçkiləri ilə bağlı bir neçə mərhələ arxada qalıb. Hazırda həyata keçirilən təbliğat-təşviqat mərhələsi də bitmək üzrədir. Ümumən bu seçkilərin daha aktiv keçdiyi qənaətində olanlar çoxluq təşkil edir.

Namizədlərin apardıqları təbliğat kampaniyalarından görünür ki, əksəriyyətin prosesdən narazılığı yoxdur. Bəzi dairələrdə namizədlər arasında müşahidə edilən kompromat savaşı və söz atışması seçki prosesinin pozulduğu anlamına gələ biməz. Bəs maraqlıdır, bu müddət ərzində seçkinin nəticələrinə kölgə sala biləcək pozuntular olubmu?

Qeyd edək ki, burada söhbət seçki prosesinə kobud müdaxilələrdən gedir. Məsələn, namizədlərin qeydə alınması, təbliğat aparmasına imkan verilməməsi, hansısa namizədin xeyirinə inzibati imkanları tətbiq etməklə təbliğatın aparılması, hakimiyyət nümayəndələrinin hansısa namizədə açıq təzyiq göstərməsi, namizədliyin kiminsə xeyrinə geri götürülməsi üçün kimlərləsə sövdələşməyə getməyə məcbur olunması və digər neqativliklərdən söhbət gedir.

  • Rauf Zeyni: “İndiyə qədər biz seçkilərin ümumi nəticəsinə təsir göstərə biləcək hər hansı bir neqativliyi qeydə almamışıq”

Seçki prosesini yaxından izləyən Milli Qeyri-Hökumət Təşkilatları Forumunun prezidenti Rauf Zeyni “Bakı-Xəbər”ə açıqlamasında bildirdi ki, seçkilər başlayandan bəri aparılan bütün kampaniyalar çox uğurla həyata keçirilib: “İndiyə qədər biz seçkilərin ümumi nəticəsinə təsir göstərə biləcək hər hansı bir neqativliyi qeydə almamışıq. Düzdür, xırda narazılıqlar ola bilər. Bu da dünyanın hər yeri üçün xarakterikdir. Söhbət ciddi qanun pozuntularından gedir. Bilirsiniz ki, indiki zəmanədə belə halları ört-basdır etmək də mümkün deyil. Çünki çəkiliş imkanları və onları ictimailəşdirmək üçün sosial şəbəkələr kimi məkan mövcuddur. Olsaydı, üzə çıxardı. Əminəm ki, proses sona qədər də bu cür demokratik şəraitdə aparılacaq. Hər hansı kiçik qanun pozuntusu olsa belə, onlara da qiymət veriləcək. Həmin hadisələr seçkilərin nəticələrinə təsir etmək gücündə deyil. Ölkə Prezidenti cənab İlham Əliyev də dəfələrlə xəbərdarlıq edib ki, hər hansı bir dövlət resurslarından namizədlərin xeyrinə istifadə etmək yolverilməzdir. Bunun məsuliyyətini yerli qurumlar və namizədlərin özü ciddi nəzərə alır. Bəzi namizədlər var ki, onlar suni şoular yaratmağa meyllidirlər. Özlərini gündəmə gətirmək üçün guya onlara təzyiq edildiyini bildirə bilərlər. Amma belə hallar çox cüzidir və ümumi nəticələrə təsiri ola bilməz. Bunu da əlavə edim ki, Azərbaycandakı seçkiləri çox nüfuzlu beynəlxalq təşkilatlar da müşahidə edəcəklər. Eləcə də biz QHT sektoru olaraq seçkilərin şəffaf keçirilməsi üçün müxtəlif növ monitorinqləri aparırıq. Əminəm ki, bu seçkinin nəticələri öz demokratikliyi ilə fərqlənəcək. Ölkə rəhbərliyi islahatların davamı kimi həm də yeni parlamentin formalaşmasını görürsə, onda bizə şəffaf seçkilər nəticəsində formalaşacaq parlament lazımdır”.

Məhəmmədəli QƏRİBLİ

Son xəbərlər