Yanvarın 28-də AŞPA-nın qış sessiyasında “Avropada media azadlığına və jurnalistlərin təhlükəsizliyinə təhdidlər” adlı qeyri-obyektiv qətnamə qəbul edilib. Qətnamədə Azərbaycanla bağlı hissədə deyilir ki, ölkəmiz mətbuat üçün düşmən ölkələrdən biridir.
Sənəddə Azərbaycandakı vəziyyət barədə ayrıca danışılır. Tamamilə qərəzli olan həmin qətnamədə qeyd olunur ki, Azərbaycan hakimiyyəti jurnalistlərə qarşı repressiyaları dərhal dayandırmalı, söz və media azadlığını təmin etməli, mətbuat azadlığı və təhlükəsizliyi sahəsində Avropa Şurası qarşısında götürdüyü öhdəlikləri yerinə yetirməsi üçün real addımlar atmalıdır. Guya 5 jurnalist peşə fəaliyyətinə görə hələ də həbsdədir. Müstəqil jurnalistləri susdurmaq məqsədilə onlara qarşı cinayət işi qaldırıldığı, jurnalistlərin ölkəni tərk etməsinə məhdudiyyətlər qoyulduğu iddia olunur.
Digər tərəfdən, AŞPA-nın qərəzli münasibətinin dərəcəsinə bax ki, qətnamədə hətta jurnalistlərə dövlət tərəfindən pulsuz ev verilməsinə belə, ikrahla yanaşılır: “Eyni zamanda, son vaxtlar 400-dən çox hökumətyönlü jurnalist hakimiyyətdən pulsuz mənzil alıb ki, bu da “ələalma”nın bir vasitəsidir”.
Hansı ki, ev alan jurnalistlərin hamısı hökumətyönlü deyil. Onların içində kifayət qədər müstəqil, hətta müxalif mövqedən çıxış edən jurnalist var. Görünən odur ki, AŞPA Azərbaycanda seçkiqabağı vəziyyətə növbəti dəfə təxribatçı müdaxilə edir. Məhz seçki ərəfəsində bu kimi təxribat xarakterli rəylərin artması bunların təsadüf olmadığını, məqsədli şəkildə həyata keçirildiyini göstərir.
“Ölkədə azad medianın inkişafı da göz qabağındadır”
Məsələyə münasibət bildirən media eksperti Yadigar Məmmədlinin sözlərinə görə, AŞPA ilə yanaşı, bir sıra beynəlxalq təşkilatların Azərbaycanla bağlı belə qərəzli yanaşmaları ənənə halını alıb: “AŞPA-da bir sıra dairələr var ki, onlar neçə ildir Azərbaycana qarşı ancaq ikili standartlarla çıxış edirlər. Ölkəmizə qarşı qərəzli mövqe tuturlar. Belə qərəzli rəylər ilk dəfə deyil dərc edilir. Zaman-zaman bənzər halların şahidi oluruq. Həmin dairələrin təsirilə Azərbaycan barəsində real olmayan fikirlər səsləndirilir. Bütün bunlar onu göstərir ki, məlum rəylər qərəzdən qaynaqlanır. Azərbaycanda son illər çox şey dəyişib. O cümlədən, media da dəyişib və inkişaf edib. Bütün bunlar inkişafa doğru gedib. Nə demələrindən asılı olmayaraq, Azərbaycandakı inkişafı danmaq olmaz. Ölkədə azad medianın inkişafı da göz qabağındadır. Ən ucqar kəndlərdə belə internet var. İnsanlar sosial şəbəkələrdə, internet saytlarında azad şəkildə öz fikirlərini ifadə edirlər. Əhalinin böyük hissəsi sosial şəbəkələrdə fəal iştirak edir. Ancaq, nədənsə, bütün bunlar AŞPA-nın hesabatlarında öz əksini tapmır. Yəni görünən odur ki, çox şey dəyişsə də, AŞPA-nın Azərbaycana olan qərəzli münasibəti dəyişmir. Bu baxımdan AŞPA-nın Azərbaycandakı media ilə bağlı rəyini qərəzli hesab edirəm. Hesab edirəm ki, biz onlara əhəmiyyət vermədən öz işlərimizi görməliyik. Mediada hansısa problemlər varsa, onların həlli ilə məşğul olmalıyıq”.
Vidadi ORDAHALLI
