ABŞ prezidenti Donald Tramp Yaxın Şərq sülh planını açıqlayıb. Baki-xeber.com xarici mediaya istinadən xəbər verir ki, Tramp Ağ Evdə İsrail Baş naziri Binyamin Netanyahu ilə birgə mətbuat konfransında Qüdsün İsrailin "bölünməz" paytaxtı hesab ediləcəyini və planın fələstinlilər üçün son şans olduğunu bildirib.
Sülh planının 80 səhifədən ibarət olduğunu deyən Tramp, planda həm İsrail, həm də Fələstin tərəfi üçün çox dəyərli maddələrin olduğunu iddia edib.
Donald Tramp, planda Fələstinə paytaxtı Şərqi Qüdsdə olan müstəqil bir dövlət qurmaq imkanı yaratdığını deyib, lakin paytaxtın harada yerləşəcəyi barədə ətraflı məlumat verməyib.
Yaxın Şərq sülh planına görə, Tramp Fələstinə, müstəqil dövlət olmaq üçün lazım olan şərtləri yerinə yetirmək üçün 4 illik müddət tanıdığını bildirib.
Tramp, eyni zamanda Yaxın Şərq sülh planının müstəqil Fələstin dövləti və fələstinlilər üçün "son şans" olduğunu da söyləyib.
Planı "İsrail üçün böyük və tarixi bir qələbə" kimi xarakterizə edən Netanyahu isə, ABŞ-ın Yaxın Şərq sülh planı çərçivəsində Qərbi Şəriyədəki yəhudi yaşayış məskənlərini İsrailin torpaqları kimi tanıyacağını açıqlayıb. Netanyahu, həmçinin Trampın planına əsasən, İsrailin İordan vadisi üzərində hakimiyyətini davam edəcəyini bildirib.
ABŞ planına görə, təxminən 6 milyona çatan fələstinli qaçqınların geri dönmək hüququnun olmayacağını da açıqlayan Netanyahu, planın bölgədə sülhün təmin edilməsinə böyük töhfə verəcəyini iddia edib.
Fələstin dövlət başçısı Mahmud Abbasın "əsrin süpürgəsi" adlandırdığı plan, bəzi iqtisadi yardımlardan başqa Fələstin xalqının lehinə heç bir şeyin olmamasına görə tənqid edilir.
ABŞ prezidenti Trampın Fələstin-İsrail məsələsilə bağlı sülh planını açıqladığı toplantıya Birləşmiş Ərəb Əmirliklərinin (BƏƏ) Bəhreyn və Omandakı ABŞ səfirləri də qatılıb.
Trampdan sonra çıxış edən Netanyahu, BƏƏ, Bəhreyn və Oman səfirlərinə sülh planının elan edildiyi görüşdə iştirak etdikləri üçün təşəkkür edib.
Birləşmiş Ərəb Əmirliklərinin (BƏƏ) Vaşinqtondakı səfiri Yusuf əl-Uteybe Tramp tərəfindən elan edilən Fələstin-İsrail "sülh planı"nı dəstəkləyən açıqlama yayıb.
İsrail Nazirlər Kabineti bazar günü Qərbi Şəriyədəki İordan vadisi və qanunsuz yəhudi yaşayış məntəqələrinin "ilhaqı"nı təsdiqləyəcək.
Fələstin prezidenti Mahmud Abbas ABŞ prezidentinin sülh planını rədd etdiyini açıqlayıb. "Qüds satılmır. Heç bir fələstinlinin müsəlman və ya xristianın (Tramp) bu planını qəbul etməsi mümkün deyil" deyən Abbas Trampın planını tənqid edib.
Fələstin Müqavimət Təşkilatı Həmas da Trampın sülh planına ciddi şəkildə qarşı çıxacaqlarını açıqlayıb. Fəth Hərəkatı isə “Əsrin sazişi"nin uğursuz olması üçün müqavimət göstərməyə çalışacaqlarını bildirib.
İordaniyanın xarici işlər naziri Safedi isə İsrailin birtərəfli qaydada reallığı dəyişdirmək səylərinin təhlükəli nəticələrə səbəb olacağını deyib.
Tramp, mətbuat konfransından sonra Twitter hesabından açıqlama verib və Orta Şərq sülh planı çərçivəsində nəzərdə tutulan İsrail və Fələstin dövlətlərinin sərhədlərini göstərən bir xəritə paylaşıb: Açıqlamasında "Mən həmişə İsrail dövləti və yəhudi xalqının yanında olacağam. Onların təhlükəsizliyini və öz vətənlərində yaşamaq hüquqlarını qəti şəkildə dəstəkləyirəm. İndi sülh vaxtıdır!".
