Azərbaycanda fevralın 9-da keçiriləcək parlament seçkilərinə ciddi hazırlıq gedir. Keçiriləcək seçkilərdə hazırda qeydiyyata alınmış 1374 namizəd mübarizə aparır. Ümumilikdə, parlament seçkilərində iştirak etmək üçün 2431 nəfər müraciət edib. Onların bir hissəsi seçki prosesinin müxtəlif mərhələlərində öz namizədliyini geri götürüb. Bununla belə, namizədlərin 248 nəfəri 19 siyasi partiyanın üzvüdür.
Digər tərəfdən, seçkiləri müşahidə edənlərin sayı da məlum olub. Belə ki, ümumilikdə, 54 min 292 yerli müşahidəçi qeydiyyatdan keçib. Onlardan 1434-ü Mərkəzi Seçki Komissiyasında, 52 min 858-i isə dairə seçki komissiyalarında akkreditasiyadan keçib. Həmçinin, seçkiləri 41 təşkilatı təmsil edən 44 ölkənin vətəndaşı olan 409 beynəlxalq müşahidəçi izləyəcək. Bütün bunlar keçiriləcək parlament seçkilərinə nə qədər böyük marağın olmasının göstəricisidir.
Başqa bir tərəfdən, namizədlərin qeydə alınması ilə bağlı problemlər çox məhdud çərçivədədir. Bu da sözügedən problemin sistem xarakterli olmadığını göstərir. Yəni bu o demək deyil ki, kütləvi şəkildə namizədlər belə problemlərlə üzləşir. Belə problemlər çox az saydadır. Zatən, dünyanın istənilən dövlətində seçki kampaniyası zamanı bənzər problemlər olur. Nəzərə almaq lazımdır ki, Mərkəzi Seçki Komissiyası namizədlərə müraciətində üzləşdikləri problemlərlə bağlı quruma müraciət etməyi bəyan edib. MSK bu kimi problemləri araşdırır və nəticədə bir sıra namizədlərin qeydiyyatı öz həllini tapıb.
O da məlumdur ki, budəfəki seçkidə bir sıra potensiallı namizədlər yarışacaq. Ancaq nə qədər çox namizəd olsa da, son nəticədə dairədən 1 namizəd parlamentə seçiləcək. Buna rəğmən, 9 fevral seçkiləri potensialı olan bir sıra kadrların üzə çıxarılması baxımından mühüm bir tarixi mərhələ olacaq. Nəzərə almaq lazımdır ki, namizədlərin içərisində çoxsaylı cavan şəxs var. Hansı ki, onların arasında iş təcrübəsi, elmi dərəcəsi olan, xarici dilləri bilən şəxslər var. O baxımdan belə potensiallı namizədlərin üzə çıxarılması mühüm əhəmiyyət kəsb edir.
Maraqlıdır, bacarığı və potensialı olan bu kimi şəxslərin sonrakı mərhələdə müxtəlif dövlət orqanlarına, vacib sahələrə cəlb olunması, onların potensialından istifadə edilməsi perspektivini ekspertlər necə dəyərləndirirlər?
Məhərrəm Zülfüqarlı: “Belələrinin imkanlarından nə qədər çox istifadə edilsə, bu bir o qədər ölkəmizin inkişafına öz töhfəsini verəcək”
Məsələyə münasibət bildirən İctimai Problemlərin Tədqiqi Assosiasiyasının rəhbəri, ekspert Məhərrəm Zülfüqarlının sözlərinə görə, belə bacarıqlı və potensiallı kadrların imkanlarından sonrakı mərhələdə istifadə ediləcəyi ehtimalı böyükdür: “Çünki müşahidələr göstərir ki, həqiqətən də budəfəki seçkidə çox bacarıqlı şəxslər öz potensiallarını ortaya qoyublar. Keçiriləcək seçkilər və seçki kampaniyası belələrinin üzə çıxmasına münbit zəmin yaradır. Hesab edirəm ki, Azərbaycanda bu istıqamətdə işlər gedir. O mənada ki, daha bacarıqlı və qabiliyyətli kadrlar şərait yaranan kimi işə cəlb edilir. Çünki belələrinin potensialından istifadə edilməsi dövlətin də mənafeyinə uyğundur. Belələrinin imkanlarından nə qədər çox istifadə edilsə, bu bir o qədər ölkəmizin inkişafına öz töhfəsini verəcək. Nəzərə almaq lazımdır ki, ölkədə çoxşaxəli islahatlar aparılır. Bütün bunları nəzərə alsaq, o cür şəxslərin dövlət qulluğuna cəlb edilməsi, onların potensialından istifadə edilməsi gözlənir. Hesab edirəm ki, bunun çox böyük faydası olacaq”.
Vidadi ORDAHALLI
