19/02/2020 14:43
728 x 90

Paşinyanla Sarkisyanın partiyası “Qarabağ siyasətindən qalmış miras” üstündə bir-birini qırmağa başlayıb

img

Ermənistanın Baş naziri Nikol Paşinyanın ötən həftəsonu Qafanda keçirdiyi mətbuat konfransı zamanı Dağlıq Qarabağ münaqişəsinə dair verdiyi açıqlamalar bu ölkədə yenidən məsələ ətrafında kəskin polemikaya səbəb olub.

Xəbər verildiyi kimi, Paşinyan keçmiş hakimiyyətdən Qarabağ məsələsində ona “ağır irs qaldığını” deyib, Serj Sarkisyanın vaxtında danışıqlar predmeti olmuş həll modelindən sitatlar gətirib. Deyib ki, keçmiş hakimiyyət danışıqlarda Dağlıq Qarabağ ətrafındakı rayonların Azərbaycanın nəzarətinə qaytarılmasını, sülhməramlıların yerləşdirilməsini və regionun hüquqi statusunun referendumda müəyyən edilməsini nəzərdə tutan sənədi müzakirə edib. Qeyd edək ki, Paşinyanın bu açıqlamasına ən sərt cavabı Serj Sarkisyanın rəhbəri olduğu Respublikaçılar Partiyasının funksionerləri veriblər. Erməni KİV-ində onların çox kəskin münasibətləri dərc edilib. Eyni zamanda, həmin partiyanın rəhbərliyində təmsil olunan şəxslər Paşinyanı diletantlıqda günahlandırıblar. Ona qarşı səslənən ittihamlarda bildirilir ki, şəxsən Paşinyanın özünün Dağlıq Qarabağ probleminin həlli ilə bağlı heç bir konsepsiyası yoxdur. Hətta ona çağırış da ediblər ki, belə bir konsepsiyası varsa, qoysun ortaya.

Paşinyana ünvanlanan ittihamlar sırasında belə bir fikir də var ki, Ermənistana rəhbərlik etmiş şəxslərin hamısı münaqişənin həllinin qarşılıqlı güzəştlər hesabına mümkün olduğunu vurğulayıblar. Sosial şəbəkələrin Ermənistan seqmentində bu mövzuda çoxlu sayda polemika aparılır. Ermənistanın ciddi sayılan siyasətçiləri Paşinyanı hətta psixoloji vəziyyəti yerində olmayan adlandırırlar. Respublikaçılar Partiyasının rəhbərliyi hətta qeyd edir ki, yaxşı olar Paşinyan danışıqlara getdiyi və daim əlinin altında olan sənədlərə istinad etsin. Görünür, Paşinyan bunu etməkdən daha çox populist kimi görünməyi üstün tutur və nəticədə elə öz ölkəsinin daxilində belə biabırçı qınaqlara tuş gəlir. Bununla yanaşı, həm də sübut etmiş olur ki, ondan münaqişənin həlli ilə bağlı hər hansı bir konstruktiv təklif gözləməyə dəyməz.

Məhəmmədəli QƏRİBLİ

Son xəbərlər