Azərbaycan Respublikasının Prezidenti İlham Əliyev yanvarın 20-də Dünya İqtisadi Forumu çərçivəsində Davosda Rusiyanın “Rossiya-24” televiziya kanalına müsahibə verib. “Rossiya-1” və “Rossiya-24” kanalları dövlət başçısının müsahibəsini yayımlayıb.
Jurnalistin “Sizcə, bu gün dünyada çoxqütblülük əlamətləri varmı” sualına İlham Əliyev belə cavab verib: “Şübhəsiz, bu gün dünya məhz çoxqütblü dünya kimi inkişaf edir. Bir neçə güc mərkəzi var. Əlbəttə, bizi narahat edən məsələlər var - regionumuzda gərginliyin artması. Lakin biz müsbət dinamikanı da görürük, əvvəllər bu cür sıx qarşılıqlı fəaliyyəti olmayan ölkələr bu gün demək olar ki, müttəfiqlər kimi hərəkət edir və regional sabitliyə böyük töhfə verirlər. Buna görə də çoxqütblü dünya artıq reallıqdır. Düşünürəm ki, bu meyllər getdikcə daha da möhkəmlənəcək. Bu, müsbət haldır, çünki bu, dünyada sabitliyə zəmanətdir. Bilirsiniz, iri ölkələrin həmişə öz hüdudlarından kənarda maraqları olur və hər ölkə özü üçün daha yaxşı şəraitə nail olmaq, öz təsir dairəsini genişləndirmək istəyir. Burada təzə heç nə yoxdur. Biz bunu əsrlər boyu müşahidə edirik, sadəcə, müxtəlif intensivlik dərəcəsi ilə. Buna görə məsələ bunda deyil, bugünkü dünya nizamının konstruksiyası, o cümlədən, beynəlxalq münasibətlərin konstruksiyası çoxqütblülüyü nəzərdə tutur. BMT Təhlükəsizlik Şurasının daimi üzvlərinin tərkibinə baxsaq, bu, artıq dünyanın çoxqütblülüyünün əksidir. Daimi üzvlərdən birinin razılığı olmadan heç bir qərar qəbul edilə bilməz. Buna görə də düşünürəm ki, ölkələr özləri üçün birqütblülüyü təmin etməyə çalışmamalı, əksinə, hamı üçün sərfəli olan əməkdaşlıq elementləri tapmalıdırlar”.
Göründüyü kimi, Prezident regionumuzdakı stabillik və təhlükəsizliyə böyük önəm verdiyini deyir və bu xüsusda əvvəllər münasibətləri o qədər də sıx olmayan ölkələrin hazırda müttəfiqlik səviyyəsində fəaliyyət göstərdiyini qeyd edib. Ölkə başçısı hansı ölkələri nəzərdə tutub?
Qabil Hüseynli: “İki ölkə arasında münasibətlərin normallaşması Azərbaycan üçün həm strateji, həm iqtisadi, həm də siyasi cəhətdən əlverişlidir”
Politoloq Qabil Hüseynli qəzetimizə bildirdi ki, ölkə başçısı burada Türkiyə ilə Rusiya arasında olan yaxınlaşmanı nəzərdə tutub: “Bilirsiniz ki, Suriya ilə sərhəddə Türkiyə tərəfindən Rusiyaya məxsus qırıcı təyyarə vuruldu. Həmin hadisədən sonra ölkələr arasında vəziyyət gərginləşdi. Türkiyə Azərbaycanın strateji müttəfiqidir. Rusiya isə nə qədər işğalçı Ermənistana yaxın olsa da, Azərbaycanla tərəfdaşlıq münasibətləri var. Və biz Rusiyadan silah və sursat alırıq. Bu mənada iki ölkə arasındakı münasibətlərin gərgin olması Azərbaycanın maraqlarına mənfi təsir edirdi. Həm də bundan işğalçı dövlət yararlanmağa çalışırdı. Təbii ki, Azərbaycanın iki qonşusu arasında münasibətlərin yüksək səviyyədə olması ölkəmiz üçün də müəyyən əhəmiyyət kəsb edir. Çünki Rusiya da, Türkiyə də rəsmi məlumatlarda göstərilir ki, dost ölkələrdir. Strateji tərəfdaş ölkələrdir. Azərbaycanın Rusiya ilə kifayət qədər böyük ticarət əlaqələri var. Soydaşlarımız Rusiyada yaşayır, fəaliyyət göstərirlər. Türkiyəyə gəldikdə isə, Cənubi Qafqaz regionunda bütün beynəlxalq layihələr Türkiyənin iştirakı ilə həyata keçirilir. İki ölkə arasında münasibətlərin normallaşması bu baxımdan Azərbaycan üçün həm strateji, həm iqtisadi, həm də siyasi cəhətdən əlverişlidir. Ən azından, Azərbaycan iki ölkə arasında seçim qarşısında qalmayacaq. Bu baxımdan yüksək qiymətləndirmək olar”.
Məhəmmədəli QƏRİBLİ
