Vüqar Rəhimzadə: “Qurumun nümayəndə heyətinin məlum rəyi birmənalı surətdə qərəzə söykənir və obyektivlikdən tam uzaq subyektiv yanaşmadır”
9 fevral parlament seçkilərilə bağlı seçkiqabağı mühiti qiymətləndirmək üçün yanvarın 22-23-də Bakıda səfərdə olan Avropa Şurası Parlament Assambleyasının (AŞPA) nümayəndə heyəti öz rəyini açıqlayıb.
Qurumun nümayəndə heyəti ölkədəki seçkiqabağı vəziyyətə qərəzli prizmadan yanaşaraq hesab edir ki, Azərbaycandakı atmosfer demokratik seçkilərə xidmət etmir. Rəydə bildirilir ki, müxtəlif həmsöhbətlərlə müzakirələrdən sonra AŞPA nümayəndə heyəti qalan müddətdə vəziyyətin yaxşılaşdırılması və heç olmasa problemlərin bir hissəsinin həlli üçün imkanların olduğunu vurğulamağı vacib sayır. Guya bəzi əlaqədar tərəflər əsas hüquqlara, xüsusən ifadə və sərbəst toplaşma azadlığına əməl olunması ilə bağlı ciddi narahatlıqlarını ifadə ediblər. Müxalifət partiyaları nümayəndə heyətinə bildiriblər ki, məhdudlaşdırıcı şəraitə görə seçkini boykot etmək qərarına gəliblər. Bununla belə, nümayəndə heyəti bir çox həmsöhbətin söylədiyi və seçki komissiyalarının müstəqilliyi ilə bağlı Venesiya Komissiyası tərəfindən dəstəklənən şübhələri nəzərə alıb. Guya əsas azadlıqların konstitusiya təminatına baxmayaraq, hökuməti tənqid edənlər sistematik şəkildə təqib olunurlar.
Göründüyü kimi, AŞPA nümayəndə heyəti ciddi araşdırma aparmadan yenə də seçkilərə qərəzli müstəvidən yanaşdı. Ən azından, Azərbaycanda seçkiqabağı mühit demokratik olmasaydı, o zaman parlamentə iddiası olan yüzlərlə namizəd qeydə alınmazdı, onlara təbliğat-təşviqat kampaniyası ilə bağlı hərtərəfli şərait yaradılmazdı. O üzdən, AŞPA-nın ölkədəki seçkiqabağı vəziyyətə belə qərəzli münasibət sərgiləməsini ekspertlər necə dəyərləndirirlər?
- “Ümumilikdə, bir sıra beynəlxalq təşkilatlar var ki, onlar müntəzəm olaraq bu cür qərəzli yanaşmalar ortaya qoyurlar”
Məsələyə münasibət bildirən “İki Sahil” qəzetinin baş redaktoru Vüqar Rəhimzadənin sözlərinə görə, AŞPA nümayəndə heyətinin məlum rəyi birmənalı surətdə qərəzə söykənir: “Eyni zamanda, obyektivlikdən tam uzaq subyektiv yanaşmadır. Ümumilikdə, bir sıra beynəlxalq təşkilatlar var ki, onlar müntəzəm olaraq bu cür qərəzli yanaşmalar ortaya qoyurlar. Ötən seçkilərdə dəfələrlə bunun şahidi olmuşuq. Bir sıra beynəlxalq təşkilatların nümayəndələri hazır bəyanatlarla ölkəyə gəlirlər və Azərbaycandakı seçki mühiti ilə bağlı heç bir əlaqəsi olmayan fikirlər səsləndirirlər. O üzdən, AŞPA nümayəndə heyətinin məlum rəyi bu qəbildən olan yanaşmadır. Ölkədə seçkiqabağı mövcud vəziyyət, mövcud durum və yaradılmış şərait hesab edirəm ki, bir sıra digər Avropa ölkələri üçün nümunə olacaq səviyyədədir. Özlərini demokratiyanın beşiyi hesab edən ölkələr var ki, bir sıra tələblərə heç əməl etmirlər. O mənada, təbii ki, AŞPA-nın Azərbaycanla bağlı rəyi qərəzə söykənir və ədalətsiz bir fikirdir. Budəfəki seçkilər namizədlərin sayına və digər parametrlərə görə daha da ədalətli olacaq. Hesab edirəm ki, Azərbaycanda bu sahədə uğurların və irəliləyişlərin olduğu faktdır. Ona görə də AŞPA-nın yanaşması qərəzlidir və ədalətsiz bir mövqedir”.
Vidadi ORDAHALLI
