Məhəmməd Əsədullazadə: “Ermənistanın elə bir vəsaiti yoxdur ki, silah arsenalını yeniləsin”
Ermənistan Baş naziri Nikol Paşinyan növbəti yalan məlumatlarla ölkə ictimaiyyətini aldatmağa çalışır. O, erməni mətbuatına deyib ki, guya hakimiyyətə gələndən sonra ordu ən yeni silahlarla təchiz edilib, hərbi texnika müasir və işlək vəziyyətdədir.
Paşinyan yeni silahlar, o cümlədən, Su 30 SM çoxfunksiyalı qırıcılar və ASEZ zenit-müdafiə sistemlərindən bəhs edib. İddia edib ki, bütün biunlar Ermənistanda qanuni bir hökumətin qurulmasının əsas nəticəsi idi. Guya Ermənistanın hazırkı hakimiyyəti 2016-cı ilin aprel müharibəsindən dərs götürərək bu işləri görüb. Ermənistan ordusunun silah inventarı ancaq 80-ci illərə aid olan silahlardan ibarət olub və guya Paşinyan bu vəziyyəti dəyişib. Bununla belə, o bu sahədə bütün günahları əvvəlki hakimiyyətin, xüsusən də eks-prezident Serj Sarkisyanın üstünə atıb. Guya Paşinyanın qanuni hakimiyyəti Ermənistana daha çox işlər görməyə və müharibədən əvvəl Rusiya qarşısında məsuliyyət məsələsini qaldırmağa imkan verdi. Nəticədə Rusiya ən müasir silah komplekslərini Ermənistana satdı.
Açıq-aydın görünür ki, bu, Paşinyanın növbəti yalanıdır. Məsələ ondadır ki, müasir silahlar əldə etmək üçün böyük vəsaitə ehtiyac var. Paşinyan hakimiyyətə gələndən sonra Ermənistanın dövlət büdcəsi, gəlirləri əsaslı şəkildə artmayıb ki, belə müasir silahlar əldə edə bilsin. Ermənistanın hazırkı dövlət büdcəsi 3,5 milyard dollardır. Belə olan halda, hansı pulla müasir silahlar alıb? Onun bu barədə səsləndirdiyi fikirlər nə dərəcədə inandırıcıdır?
- “…Paşinyanın səsləndirdiyi fikirlər, sadəcə, ağ yalandır”
Məsələyə münasibət bildirən politoloq Məhəmməd Əsədullazadənin sözlərinə görə, Paşinyanın yeni silahlarla bağlı səsləndirdiyi fikirlər uydurmadır: “Ermənistan regionda Rusiyanın forpostu olmaqla yanaşı, üçüncü ölkələrdən silahların alınması üçün yetərincə maliyyə vəsaitinə malik deyil. Müstəqillikdən bu günə qədər Rusiyanın satileti olaraq bu ölkədən kredit yolu ilə silahlar idxal edib. Baş nazir Nikol Paşinynanın açıqlamasına gəldikdə isə, o, Rusiyadan alınmış silahları digər ölkələrin silahları kimi təqdim edir. Bu, ənənəvi erməni yalanıdır və Azərbaycana guya mesaj verir. Serbiyadan yalnız atıcı silahlar alırlar və bunu uğur kimi dəyərləndirirlər. Hesab edirəm ki, bu gün Azərbaycanın malik olduğu hərbi arsenal qarşısında Ermənistanın silahları primitiv və yalnız cüzi miqdarda müasir rus silahlarıdır. Sadəcə, Paşinyan populizmə üstünlük verərək bu kimi yalan açıqlamalar verir. Ermənistan daxilində iqtisadi vəziyyət böhranlıdır və Paşinyan çalışır ki, ölkədə narazılığı silah alışı vasitəsilə ört-basdır etsin. Ancaq erməni cəmiyyəti yaxşı bilir ki, yalnız Moskvanın hesabına malik olduğu silahlarla bu gün Paşinyan belə pozlar verir. Hansı ki, həmin silahlar heç də deyildiyi kimi müasir deyil. Digər tərəfdən, Ermənistanın elə bir vəsaiti yoxdur ki, silah arsenalını yeniləsin. Kreditlə hansısa silahların alınması o demək deyil ki, bu ölkə müasir silahlar əldə edib. O üzdən, bununla bağlı Paşinyanın səsləndirdiyi fikirlər, sadəcə, ağ yalandır”.
Vidadi ORDAHALLI
