Məlum olduğu kimi, Osvensimin azad edilməsinin 75-ci ildönümü ilə bağlı İsraildə keçirilən tədbirlərdə Ermənistan Prezidenti Armen Sarkisyan da iştirak edib. Ermənistan Prezidenti İsraildə yüksək səviyyədə qarşılanıb. Belə ki, onun şərəfinə Qüdsün hasarlarında lazerlə Ermənistan bayrağı dalğalandırılıb və ermənicə "Xoş gəldiniz Qüdsə!" yazılıb. İsrail parlamentinin (Knesset) başçısı Ermənistan Prezidentinə deyib: "Xoş gəlibsiniz, sizi burada qarşılamaq bizim üçün xoşdur".
A.Sarkisyan o qədər yüksək səviyyədə qarşılanıb ki, sanki İsrailin ən əziz qonağı elə o imiş. İsrail Prezidenti Reuven Rivlin Ermənistan Prezidentini salamlayaraq deyb: “Sizinlə Yerusəlimdəki Prezident Sarayında görüşmək mənim üçün böyük şərəfdir”.
Bununla belə, A.Sarkisyan İsrail Prezidenti Reuven Rivlin ilə görüşündə bir sıra yalanlar uydurub. O bildirib ki, məlum hadisə iki xalqı birləşdirən çox qanlı bir hekayədir. O mənada ki, guya bir vaxtlar ermənilər də “soyqırıma” məruz qalıblar: “Düşünürəm ki, 1915-ci ildə baş verənlərə dünyanın susması 1931, 1936, 1942-ci illərdə baş vermiş hadisələrə, Holokost zamanı baş verənlərə səbəb oldu”.
Daha sonra A.Sarkisyan utanmadan bildirib ki, İkinci Dünya Müharibəsi zamanı Ermənistan nasizmə qarşı mübarizəyə töhfə verib: “Sizinlə və başqa millətlərlə birlikdə nasistlərə qarşı mübarizə apardıq. Qürurla deyə bilərəm ki, sovet ordusunda altı yüz minə yaxın erməni döyüşmüş, onlardan üç yüz min nəfəri bu mübarizədə həlak olub. Ermənilər hamımızın uğrunda vuruşaraq dünya sülhünə, Sovet İttifaqına öz töhfələrini verdilər. Bu mübarizəyə böyük töhfə verən xalqımı təmsil etməkdən qürur duyuram”.
Əvvəla ondan başlayaq ki, İkinci Dünya Müharibəsində 600 min erməni iştirak etməyib. Məsələ ondadır ki, Ermənistanda o vaxt 1,6 milyon nəfər əhali olub. Onların da hamısı ermənilərdən ibarət olmayıb. Əhalinin çoxu azərbaycanlı olub. Belə olan halda, 600 min erməni necə müharibəyə gedə bilərdi? Bu tamamilə yalandır. O cümlədən, guya 300 min erməninin müharibədə həlak olması fikri də absurddur. Müqayisə üçün qeyd edək ki, İkinci Dünya Müharibəsində Azərbaycanda təqribən 3 milyon nəfər yaşayırdı. O zaman 640 min nəfər müharibəyə gedib. Onlardan 420 min nəfəri həlak olub. Belə olan halda, necə olur ki, Azərbaycanla müqayisədə əhalisi iki dəfə az olan Ermənistanın 300 min vətəndaşı müharibədə həlak olub? Başqa bir tərəfdən, İkinci Dünya Müharibəsində SSRİ-nin qələbəsi Bakı nefti hesabına mümkün oldu. Müharibə zamanı neftə olan tələbatın 75 faizi Azərbaycan hesabına təmin edilib. Bunu Prezident İlham Əliyev də bir sıra beynəlxalq tədbirlərdə qeyd edib. Ölkə başçısı qeyd edib ki, məhz Azərbaycan İkinci Dünya Müharibəsinin qələbə ilə bitməsinə daha çox töhfə verib.
Başqa bir tərəfdən, Ermənistan İkinci Dünya Müharibəsinin qələbə ilə bitməsinə töhfə verən ölkə olsaydı, o zaman faşistlərlə yaxından əməkdaşlıq edən, onlara xidmət edən Qaragin Njdeyə heykəl qoyulmazdı. Hansı ki, İkinci Dünya Müharibəsi zamanı Vermaxtın tərkibində 20 min nəfərlik erməni legionu yəhudilərin qətlə yetirilməsində xüsusi fəallıq göstərirdi. Erməni legionu həbs düşərgələrində ölüm marşları təşkil edib. Bununla yanaşı, Adolf Hitlerin təbliğat-təşviqat naziri Yozef Göbbelsin nəzarəti altında sırf ermənilərdən təşkil olunmuş rus, erməni, fransız və alman dillərini bilən radio təbliğatçıları fəaliyyət göstərirdilər. Həmin ermənilər III Reyxin digər xalqlara təbliğat materiallarını ötürməkdə müstəsna xidmətlər göstərirdilər.
Bununla yanaşı, 1936-cı ildə Almaniyada nəşr olunan "Hayrenik" adlı erməni qəzetində diqqətçəkən məqamlardan biri də qəzetin yəhudilərə qarşı açıq-aşkar nifrət, iqri ayrıseçkiliyi əks etdirən çağırışları təbliğ etməsidir. "Hayrenik" qəzeti o zamankı sayında yazırdı: “Yəhudilər fanatik milliyyətçiliyin və irqçiliyin törəmələridirlər. Bu zəhərli ünsürləri xroniki xəstəliklər kimi kök saldıqları yerdən təmizləmək bəzən çətin olur. Ancaq onların məhv edilməsinə ehtiyac olduğu zaman, bu cür addımın atılması düzgün sayılmalıdır. Cərrahiyyə əməliyyatı zamanı qanın axması təbiidir”.
10 may 1935-ci ildə "Hayrenik" qəzeti Rumıniyanın paytaxtı Buxarest şəhərində bələdiyyə rəhbərinin irqçi və antisemitizm mahiyyəti daşıyan çıxışını böyük fəxrlə dərc edir. Buxarest şəhərinin bələdiyyə rəhbəri erməni qəzetinin nəşr etdiyi həmin çıxışında deyirdi ki, “ermənilər bizə, yəni rumınlara yəhudilərin köləsi olmamağımız üçün böyük kömək etdilər”.
Həmçinin, Njde şəxsən özü Bolqarıstanda yəhudilərin soyqırıma məruz qalmasına rəhbərlik edib.
Çox təəssüf doğuran məqam ondan ibarətdir ki, İsrail Prezidenti A.Sarkisyanın yuxarıda səslənən yalanlarına heç bir reaksiya verməyərək onu dinləyib. Hansı ki, İsrail rəsmiləri ermənilərin İkinci Dünya Müharibəsinə hansısa töhfə vermədiyini yaxşı bilirlər. Əslində, sözügedən konfransa Azərbaycan Prezidenti xüsusi dəvət edilməli idi. Çünki İkinci Dünya Müharibəsinin qələbə ilə başa çatmasında Azərbaycanın müstəsna xidmətləri var. Azərbaycan nefti sayəsində müharibədə dönüş əldə edildi. İndiyə qədər Azərbaycanda faşistlərə xidmət edən şəxslərin xatirəsinin əbədiləşdirilməsi ilə bağlı heç bir təşəbbüs olmayıb. Ancaq bundan fərqli olaraq Ermənistan faşistlərlə əməkdaşlıq edənlərə heykəl qoyur. Dəfələrlə Prezident İlham Əliyev Ermənistanın bu iyrənc siyasətini ifşa edib. O üzdən, Osvensimin azad edilməsinin 75-ci ildönümü ilə bağlı İsraildə keçirilən tədbirə xüsusi olaraq Azərbaycan Prezidenti dəvət edilməli idi. Ancaq İsrailin ədalətsizliyinə bax ki, faşist Njdeni qəhrəmanlaşdıran Ermənistan Prezidentini qucaqlayaraq isti qarşılayırlar. Budurmu ədalət?
O baxımdan İsrailin sözügedən məsələdə sərgilədiyi siyasət tamamilə yanlış və ədalətsizdir. Hansısa siyasi maraqlara görə bu dərəcədə Ermənistan Prezidentinin İkinci Dünya Müharibəsi ilə bağlı uydurduğu yalanlara təmkinlə qulaq asmaq, bu ölkənin ən ali şəxsini həmin görüşə dəvət etmək İsrailə hörmət gətirmir. O baxımdan bunun heç bir tarixi və məntiqi əsası yoxdur. İsrailin bu addımı utancverici bir siyasətdir və buna heç cür bəraət qazandırmaq olmaz.
Vidadi ORDAHALLI
