Ermənistanda blokada vəziyyətinə ağlasığmaz yeni izah - "Azərbaycan bizi milyardların hesabına blokadaya salıb", siyasi-diplomatik uğursuzluq ört-basdır edilir…
Ermənistan mətbuatı bütün cəhdləri ilə Paşinyanın buraxdığı növbəti ciddi səhvin düzəldilməsi istiqamətində səfərbər olub. Söhbət Paşinyanın bir müddət əvvəl ölkəsinin ümumdaxili məhsul göstəricisinə görə Cənubi Qafqaz ölkələri arasında birinci yeri tutduğu ilə bağlı səsləndirdiyi fikirdən gedir. Qeyd edək ki, həmin açıqlamadan sonra həm Azərbaycan, həm də Gürcüstan Paşinyanın yalan danışdığını konkret faktlarla ortaya qoydular. Rəqəmlərin qarşısında aciz qalan Paşinyan təkzib verməyə məcbur oldu.
Buna baxmayaraq, Ermənistan KİV-i hələ də onlar üçün uğursuz olan bu mövzunu eşələməklə məşğuldur. Rəsmi Tiflisin və Bakının Paşinyana verdiyi cavabı onlar guya iki ölkənin Ermənistana qarşı qısqanc yanaşması ilə izah edirlər. Hətta bildirirlər ki, Ermənistanın iqtisadi cəhətdən geriləməsinin səbəbi özü ilə bağlı deyil. Bunu ölkələrinin blokada şəraitinə salınması ilə izah edirlər. Xüsusilə də qeyd olunur ki, Ermənistanın blokadasının bu şəkildə uzun sürməsində rəsmi Bakının lobbiçilik üçün xərclədiyi milyardlarla pulların böyük rolu var. Çox maraqlıdır ki, erməni KİV-i ölkələrinin blokada şəraitinə düşməsinin əsl səbəbini gizlədir. Özlərinin işğalçı siyasətinin buna səbəb olduğunu və bu amildən Bakının məharətlə istifadə etməyi bacarıb, siyasi-diplomatik yollarla onları uğursuzluğa salmağı bacardığını etiraf etmirlər.
Ermənistandan blokada şəraitində yaşamalarına verilən qeyri-adi izah nə ilə bağlı ola bilər?
Politoloq Yeganə Hacıyeva “Bakı-Xəbər”ə açıqlamasında bildirdi ki, son 10 il ərzində dünyada Azərbaycan dövlətinin artan nüfuzu onun xarici siyasətinin möhkəmlənməsi, məhz onun siyasi diplomatik dəst-xətti, müasir dövlətçilik simasına, inkişaf yoluna söykənir: “Bu gün üçün Azərbaycan dövlətinin diplomtik korpusunun dövlətin milli maraqlarına söykənərək, müasir dünyanın reallıqlarının nəzərə alınması, tərəfdaşların ümumi potensialının Azərbaycan dövlətinin maraqlarının təmin olunmasında istifadə olunması üçün səfərbər edilməsi tablosu göz önündədir. Təşəbbüskar, iştirakçısı və icraçısı oldugumuz qlobal, regional proseslərdə ədalətə və beynəlxalq hüquqa söykənən Azərbaycanın mövqeyinin təqdim olunması və ümumi prosesin bizim baxışlarımıza əsasən getməsinə hesablanmış, kiçik və üzünmüddətli hesablarda ümumi proseslərin Azərbaycanın baxışına adaptasiyası siyasəti yürüdülür.
Burada bir haşiyəyə çıxım ki, bütün dünyada olduğu kimi, Cənubi Qafqaz regionu ətrafında da gedən proseslər onu göstərir ki, artıq konfliktlərin dəstəklənməsi ilə regionlara nəzarət siyasəti özünü doğrultmur. İstər Cənubi Qafqaz, istərsə də postsovet regionlarına mövcud konfliktlər və daha öncə qeyd etdiyim kimi, bunların dəstəklənməsi ilə nəzarət siyasəti artıq effektiv deyil. Bu, artıq iqtisadi cəhətdən qeyri-səmərəli, siyasi cəhətdən isə problemlidir.
Azərbaycan da günümüzün mürəkkəb regional çağırışlarının həlli üçün tərəfdaşları və əməkdaşlıq etdiyi dairələrlə enerji, təhlükəsizlik və terrorizmlə mübarizə sahəsində, ortaq imkanları ümumi maraq olan sabitlik və inkşafa yönəltməsi siyasəti yürüdür.
Xarici siyasətimizn əsasında qitələrarası transmilli enerji nəqli marşrutlarında strateji bənd olan Cənubi Qafqazda sülh, stabillik və təhlükəsizliyin bərqərar olması üçün region ölkələrinə münasibətdə, beynəlxalq hüququn norma və prinsipləri, dövlətlərin ərazi bütövlüyü və suverenliyinə hörmət kimi baza prinsiplər təmin olunmalı və bu prinsiplərə əməl edilməsinin vacibliyinə diqqət yetirilməsi durur”.
Politoloqun sözlərinə görə, regionda beynəlxalq hüququn norma və prinsiplərinin təmin olunması dövlətlərin iqtisadi, diplomatik və təhlükəsizlik sferalarında mövcud münasibətlərin inkişaf etməsi və güclənməsinə xidmət edəcək bir addım olacaq: “İllərdir artıq diplomatik xidmətlərimiz təmsil olunduqları ölkələrdə, təşkilatlarda Ermənistanın işğal və təcavüzkar siyasətinin təkcə Azərbaycanın deyil, bütün tərəfdaşların maraqlarına ziyan vurması reallığını çatdırır.
Xarici siyasətimizin fəaliyyətinin önəmli hissəsi beynəlxalq tərəfdaşlara ölkəmizin regiondakı güclər arasında balanslı, milli maraqlarına uyğun müəyyənləşdirdiyi və həyata keçirdiyi müstəqil və çoxvektorlu xarici siyasətinin ana xəttini Dağlıq Qarabağ probleminin həllinin tezləşdirilməsi və bunun Cənubi Qafqaz regionu üçün açacağı perspektivlər haqqında fikir formalaşdırması və inandırması durur.
İştirakçısı olduğumuz istənilən bütün qlobal və regional layihələrin hamısında əsas şərt, pozulmuş beynəlxalq hüquq və normaların bərpası, ərazi bütövlüyünün təmin olunması tələbi və işğalçı Ermənistanın təcavüzkar siyasətinin davam etdirməsi ümumi maraqlara bir hədə kimi göstərilir. Bu fəaliyyət üçün isə Azərbaycanın bütün diplomatik-siyasi, lobbi imkanları səfərbər olunub.
Odur ki Ermənistanın blokada vəziyyətinə "Azərbaycan bizi milyardların hesabına blokadaya salıb" iddiası mövcud olduqları vəziyyətin öz işğalçı fəaliyyətinın məntiqi nəticəsi olduğunu və siyasi-diplomatik uğursuzluqlarını ört-basdır etməsi cəhdidir.
Bu həm də Ermənistanda hər şeyə qadir erməni lobbi mifinin dağılması, cəmiyyətin bu institutun imkanlarına arxayınlıq, güvən indeksinin düşməsidir”.
Məhəmmədəli QƏRİBLİ
