Məlum olduğu kimi, yanvarın 24-də, yerli vaxtla saat 20:55-də Türkiyənin Elazığ vilayətinin Sivricə rayonunda 6,8 bal gücündə zəlzələ baş verib və zəlzələ nəticəsində yaralananlar və həyatını itirənlər olub. Təbii fəlakət nəticəsində 1600-dən çox insanın xəsarət aldığı bildirilir.
Qeyd edək ki, Türkiyənin Fəlakət və Fövqəladə Vəziyyətin İdarə Edilməsi Orqanı (AFAD) tərəfindən verilən açıqlamaya görə, zəlzələ nəticəsində 76 bina dağılıb, 642 binaya ciddi, 425 binaya isə az və ya orta dərəcədə ziyan dəyib. İlk dağıdıcı zəlzələdən sonra bölgədə 19-nun gücü maksimum 4 bal olan 533 yeraltı təkan qeydə alınıb.
Azərbaycan Prezidenti İlham Əliyevin tapşırığına əsasən, müvafiq qurumlar tərəfindən Türkiyədə baş vermiş zəlzələ zonasında təhsil alan azərbaycanlı tələbələrin təxliyyə olunması istiqamətində tədbirlər həyata keçirilib və onlar zəlzələ zonasından təxliyyə edilərək avtobusla Naxçıvana, oradan isə təyyarə ilə Bakıya yola salınıblar. Elazığ və Malatya şəhərlərində təhsil alan azərbaycanlı tələbələrin təbii fəlakət bölgəsindən çıxarılması həqiqətən də təqdirəlayiqdir. Bu, Azərbaycan dövlətinin həyata keçirdiyi zəruri tədbirlər nəticəsində vətəndaşlarımızın həyatının xilas edilməsi deməkdir. Heç şübhəsiz ki, Türkiyədə zəlzələ zonasından azərbaycanlıların təxliyyə olunması və Naxçıvan vasitəsilə Bakıya gətirilməsi Azərbaycan dövlətinin öz vətəndaşlarına həssas yanaşmasının təzahürüdür. Dünyanın hansı ölkəsində yaşamalarından, işləmələrindən asılı olmayaraq, hər bir Azərbaycan vətəndaşı dövlətimizin diqqət və qayğısı altındadır.
“Biz Azərbaycan Prezidentinin həssaslığını ilk dəfədir müşahidə etmirik…”
Tanınmış siyasi şərhçi Azər Həsrət “Bakı-Xəbər”ə bildirdi ki, Azərbaycan dövləti təbii fəlakətlər zamanı hər zaman öz vətəndaşlarına həssas münasibət göstərib və dünyanın istənilən yerində təbii fəlakət baş verərsə, aidiyyəti təşkilatlar həmin bölgədə Azərbaycan vətəndaşlarının olub-olmadığını araşdıraraq tədbirlər görürlər. “Biz Azərbaycan Prezidentinin həssaslığını ilk dəfədir müşahidə etmirik, o, belə hallarda dəfələrlə həssaslıq göstərib. O belə vaxtlarda ən sadə Azərbaycan vətəndaşını düşünüb və buna görə davranıb. Əlbəttə ki, Elazığda baş verən təbii fəlakət, zəlzələ bizi çox dərindən üzdü. Azərbaycan Prezidenti bu zəlzələni, sadəcə, Türkiyə ərazisində baş verən zəlzələ kimi deyil, eyni zamanda, Azərbaycan xalqını, Azərbaycan Prezidentini üzən bir təbii fəlakət kimi qəbul etdi və dərhal da göstəriş verdi. Yəqin fikir verdiniz, Türkiyədə baş verən zəlzələ ilə bağlı dünya ölkələri arasında ən operativ reaksiyanı Azərbaycan verdi. Eyni zamanda, Azərbaycan başqa dövlətlər içində təbii fəlakət bölgəsinə ilk yardımı göndərən dövlət oldu. Yəni Azərbaycan Türkiyədə baş verən hadisələrə həmişə həssas yanaşıb. Bununla yanaşı, Azərbaycan Prezidenti hər zaman öz vətəndaşlarımıza da həssaslıqla yanaşır, onların taleyi ilə maraqlanır. Bu baxımdan, təbii fəlakət, zəlzələ baş verən Elazığdan Prezident İlham Əliyevin göstərişi ilə Azərbaycan vətəndaşlarının operativ şəkildə təxliyyə edilməsi dövlətimizin öz vətəndaşlarına bəslədiyi həssas münasibətin təzahürüdür. Həmin tələbələrin dövlət başçısının göstərişi ilə vətənə gətirilərək ailələrinə qovuşdurulması çox müsbət haldır. Bu, ölkə başçısı tərəfindən atılan çox humanist bir addımdır, bu, yalnız bir Prezidentlik vəzifəsinin icrası deyil, həm də insanlıq vəzifəsinin yüksək səviyyədə yerinə yetirilməsidir. Azərbaycan Prezidenti İlham Əliyev də məhz bu cür keyfiyyətlərinə görə öz liderliyini, qoruyur, illər sonra da qoruyacaq. Dövlətimizin başında belə bir şəxsiyyətin durmasına bu dəfə ikiqat sevindik ki, o, “bu, sadəcə, bir zəlzələ hadisəsidir” deyib keçmədi və hər bir azərbaycanlı üçün, bir növ, Azərbaycan dövlətini səfərbər etdi, onları çox qısa müddətdə o ərazidən uzaqlaşdırıb, öz ailələrinə qovuşdurdu”.
Təbii fəlakət zamanı xəsarət almayan, sağlam şəkildə ailəsinə qovuşan insanların ailələrində toy-bayram olduğunu deyən A.Həsrət hesab edir ki, bu sevinci də onlara Azərbaycan Prezidenti yaşadıb.
İradə SARIYEVA
