Hadisələrin real inkişaf axarı işğalçı Ermənistanda yeni böhran dalğasının yarandığını göstərir. Özü də bu dəfə böhranın əsas mərkəzi qismində baş nazir Nikol Paşinyanın komandası çıxış edir. Paşinyanın anlaşılmaz siyasəti, ziddiyyətli davranışları, xüsusən də verdiyi vədlərin heç birini yerinə yetirməməsi təkcə əhali yox, komandası arasında da ona etimadı azaldıb.
“İrates” qəzeti yazır ki, artıq Nikol Paşinyanın öz komandasının üzvlərinə etimadsızlığı hər keçən gün bir az da dərinləşir: “Bizim məlumatımıza əsasən, Paşinyanı daha çox komandasının bəzi üzvlərinin digər siyasi qüvvələrlə oyunlara başlaması və sərfəli anda öz düşərgələrini dəyişib, onu tək qoyacağı narahat edir”.
Məlumatda Paşinyanın komandasında bəzi şəxslərin Ermənistan Milli Təhlükəsizlik Xidmətinin sabiq rəhbəri Artur Vanetsyandan daha betər olduğu və onların daha pis şeylər etiraf edə biləcəyi vurğulanıb. Qeyd olunub ki, “Mənim Addımım“ Blokunun deputatları arasında Vanetsyanın adamları var və sabiq kəşfiyyat şefinə kömək edirlər. Erməni siyasi ekspert Armen Badalyan da qeyd edilənləri istisna etmir. O bildirib ki, Nikol Paşinyanın qurduğu siyasi sistem Vanetsyanın timsalında siyasi alternativə dözməyəcək. Badalyan qeyd edib ki, Vanetsyanın Milli Təhlükəsizlik Xidmətinin direktoru vəzifəsindən uzaqlaşmaq barədə birmənalı olmayan bəyanatından sonra o nisbətən passiv mövqedə olsa da, siyasi sahədədir. Bu da Paşinyanı ciddi narahat edir və bu səbəbdən baş nazir Vanetsyanı, ətrafını müxtəlif üsullarla zərərsizləşdirməyə çalışır. Artur Vanetsyan özü isə məsələyə belə münasibət bildirib ki, nifrət və daxili düşmənçilik istənilən ölkə üçün böyük təhdid kəsb edir: “Ermənistanın yarımhərbi vəziyyətdə olması baxımından onun təhlükəsizliyi və gələcəyi üçün bu öldürücü ola bilər. Dayanmaq lazımdır”. Amma erməni mediası onu da yazır ki, Vanetsyan Paşinyanın adamlarını ələ almaqda davam edir. “Joxovurd” qəzeti də bu xüsusda “Mənim Addımım“ blokundan olan deputatlarla görüşüb. Paşinyanın blokundan olan deputatlarla fraksiyadan 20 deputatın ayrılması xəbərinin yayılmasıyla əlaqədar görüşdüyü bildirilib: “Deputatların fraksiyadan ayrılacağı xəbəri Paşinyana qədər çatıb. O bunun üçün bütün fraksiya üzvlərini toplayıb və parlamentdəki komandası ilə daha ciddi məşğul olmaq qərarına gəlib. Məsələ odur ki, fraksiyadakı situasiya ilə bağlı baş naziri fraksiya rəhbəri Lilit Makunts və fraksiyanın katibi Akop Simidyan məlumatlandırıb. Məhz buna görə o, deputatlarla şəxsən görüşmək qərarına gəlib. Amma buna rəğmən, bəzi deputatlar Paşinyandan ayrılmaqda israrlıdır”.
Erməni mediası yazır ki, ölkədə hazırkı hakimiyyətlə əməkdaşlıq edən siyasi qüvvələrin sayı durmadan azalır. Hətta hakimiyyət dəyişikliyini alqışlayan, son ilyarımlıq müddət ərzində hakimiyyətin bütün addımlarını dəstəkləyən, təsdiqləyən siyasi xadim və partiyalar bu gün ya susur, ya da hakimiyyətdən uzaqlaşıb və öz narazılıqlarını gizlətmir. “Daşnaksütyun”, “Çiçiklənən Ermənistan”, “İşıqlı Ermənistan” partiyaları keçmiş reveransları çoxdan bir kənara qoyub açıq şəkildə hakim qüvvəyə qarşı çıxır. Əsas xadimlər və 2018-ci ildə “Vətəndaş Müqaviləsi” partiyasına seçkilərdə iştirak etməkdən imtina etmiş “Erməni Milli Konqresi”nin lideri Levon Ter-Petrosyan uzun müddət danışmayıb, konstitusiya dəyişikliklərində isə “Erməni Milli Konqresi”nin verdiyi təklif hakimiyyət tərəfindən rədd edildikdən sonra baryer daha da dərinləşəcək. “İrs” partiyası bəyanatla çıxış edərək hakimiyyətdən narazılığını bildirir. Halbuki, “İrs” partiyası ötən müddət ərzində hakimiyyətlə əməkdaşlıq edib. İndi partiyanın bəyanatında qeyd edilir ki, hakimiyyətin bütün qanadlarında - məhkəmə, qanunverici və icraedici orqanlarda idarəetmə böhranı dərinləşir, səhvlər və onların yönləndirilməsinin bir nömrəli cavabdehi isə Nikol Paşinyandır. O, məhkəmə, qanunverici və icraedici orqanların işini islah etmək üçün addımlar atmalıdır. “İrs” partiyası həmçinin qeyd edib ki, Ermənistanda həqiqətən də böhran dərinləşir və mehribancasına təmin edilmiş insanlar belə bunu görürlər.
“Vətəndaş Şüuru” ictimai təşkilatının sədri Narek Samsonyan bu vəziyyətdə Paşinyan iqtidarının sonunun tezliklə çatacağını bildirir:“Deməli belə, Nikolcan, anlaşılandır ki, çox yaxın zamanda hakimiyyətdən qovulmanı hiss edəcəksən və həm də şəxsən sənin qaçmaq üçün yerin var, lakin hər şeyi dramatikləşdirmə”. O qeyd edib ki, Paşinyan çox gözlənilməz və çox qısa zamanda gedəcək: “Bu günlərdə “Yerkir TV”nin baş redaktoru “Pravda” qəzetində növbəti “pis xəbər”ini çap edib ki, “xarici dəstəklə çevriliş edəcəklər”. Sən könüllü şəkildə hakimiyyətdən uzaqlaşdırılacaqsan, öz əşyalarını toplayacaqsan və Kerenski kimi imici dəyişdirilmiş şəkildə ölkədən qaçacaqsan”.
Tahir TAĞIYEV
