Azərbaycan Prezidenti İlham Əliyev Davosda “Strateji baxış: Avrasiya” mövzusunda konfransda yeni formalaşacaq parlamentdən danışıb.
Ölkə başçısı bildirib ki, 2019-cu il fevralın 9-da keçiriləcək növbədənkənar parlament seçkilərinin nəticələri üzrə formalaşdırılacaq Azərbaycan parlamentinin yeni tərkibi ölkədə həyata keçirilən sosial-iqtisadi islahatların mühüm hissəsi olacaq: “Yaxın aylarda əhaliyə etimad etdikləri şəxsləri seçmək üçün növbədənkənar parlament seçkiləri keçirəcəyik. Seçkilərdən sonra isə parlament islahatların vacib hissəsi olacaq”.
Prezident qeyd edib ki, Azərbaycan qonşu ölkələr barəsində dostluq siyasəti yürüdür: “Lakin milli maraqlar hər şeydən üstündür”. Dövlət başçısı aparılan islahatlar barədə də fikirlərini bildirib: “Biz siyasi-iqtisadi sahədə ciddi islahatlar aparmağa müvəffəq olduq. Nailiyyətlərimiz Ümumdünya İqtisadi Forumun qiymətləndirilməsi və Davos İqtisadi Forumun işində öz əksini tapıb. İnfrastruktur, yolların keyfiyyəti sahələrində bir çox nailiyyətlər əldə etdik, bu göstərici üzrə dünyada 27-ci yerdəyik”.
İ.Əliyev əlavə edib ki, həyata keçirilən islahatlar çərçivəsində hökumətin tərkibi yenilənib: “Hökumətdə yeni adamlar var. Onlar yüksək səviyyədə təhsil almış və müasir dünyagörüşləri olan gənclərdir. Mən dəfələrlə demişəm ki, XXI əsrdə uğur qazanmaq yalnız XX əsrin baxışlarına riayət etmədən mümkündür. Bu səbəbdən, nəinki hökumətdə, həm də Prezident Administrasiyasında yeni adamlar lazımdır. Burada da böyük dəyişikliklər baş verib”.
Göründüyü kimi, ölkə başçısı yeni formalaşacaq parlamentlə bağlı öz düçüncələrini qısa da olsun ifadə edib. Bununla ölkə başçısı həm də Azərbaycan seçicisinə tarixi əhəmiyyətli bir mesaj vermiş olub. Azərbaycan vətəndaşları da bundan irəli gələn addımları atmalıdırlar. Yəni ortaya prinsipial mövqe qoyub, layiqli şəxslərin parlamentdə təmsil olunmasını təmin etməlidirlər. Ölkə başçısının yeni parlamentlə bağlı fikirlərindən başqa hansı nəticəni çıxarmaq olar?
“Parlamentdə yeni, savadlı, media ilə işləməyi bacaran millət vəkilləri olsa, onda Prezidentin mesajlarına adekvat cavab verilmiş olar”
Politoloq Qabil Hüseynli qəzetimizə açıqlamasında bildirdi ki, ölkə başçısının beynəlxalq tribunadan səsləndirdiyi bu önəmli fikirdən həm vətəndaşlarımız, həm də seçkinin keçirilməsinə məsul olan şəxslər ciddi nəticə çıxarmalıdırlar: “Ölkə başçısının yeni parlamentdən gözləntiləri çoxdur. Buna görə də orada layiqli adamların təmsil olunması lazımdır. Bu həm vətəndaşın, həm də seçkini keçirən qurumların məsuliyyətinə aid məsələdir. Ölkə başçısının fikirlərindən belə nəticə hasil olur ki, yeni parlamentdə daha çox iqtisadi və politoloji təfəkkürü olan deputatların təmsilçiliyi arzulanır. Aparılan seçki kampaniyaları bununla bağlı tam əminlik yaratmasa da, nikbin olmağa da əsas verir. Çünki proses hələ bitməyib. Ola bilsin ki, ciddi ələnmə prosesi qabaqdadır. Ancaq seçkilərdə iddiasını ortaya qoyan namizədlərin arasında yaxşı gənc iqtisadçıları görürəm. Həmin adamların parlamentdə təmsil olunması Prezidentin dediyi islahatlara dəstək ola bilər. İndiki mərhələdə ölkənin iqtisadiyyatı ilə bağlı önəmli proqramların hazırlanması lazımdır. Bu qanunvericilik təşəbbüsü ilə də savadlı millət vəkilləri çıxış edə bilər. Prezidentin bu etimadını doğrultmaq üçün şəffaf şəkildə seçilən parlament formalaşmalıdır. Vətəndaşa “get filankəsə səs ver” kimi təzyiqlər edilməməlidir. Ölkədə islahatlar gedirsə, parlament də ona dəstək olmalıdır. Bu istəklə parlament buraxıldı. Amma təəssüf ki, biz bir çox deputatın yenidən millət vəkili olmaq istəyini görürük. Qanun bunu qadağan etmirsə, mənəvi yük baxımından onlar bunu etməməli idi. Biz yeniləşmə istəyiriksə, ağzını açıb danışmayan deputatı yenidən ora niyə seçməliyik? Parlamentdə yeni, savadlı, media ilə işləməyi bacaran millət vəkilləri olsa, onda Prezidentin mesajlarına adekvat cavab verilmiş olar”.
Məhəmmədəli QƏRİBLİ
