Cəbhə zonasında tez-tez atəşkəsi pozan Ermənistanda bu gün yenə ən xaotik halın hökm sürdüyü sahələrdən biri ordudur. Burada baş verənlər orduda cinayət hallarının yenə böyük sürətlə artdığını nümayiş etdirir. Belə bir vaxtda yayılan məlumata əsasən, işğal altındakı Dağlıq Qarabağ bölgəsində yerləşən Ermənistan Müdafiə Nazirliyinə məxsus hərbi hissədə silahlı insident baş verib.
“Sputnik Ermənistan” bildirir ki, Ermənistan Müdafiə Nazirliyinin mətbuat katibi Artsrun Ovannisyan faktı təsdiq edib. Onun sözlərinə görə, naməlum şəraitdə iki əsgər - 2001-ci il təvəllüdlü Henri-Ayk Zakaryan və 2000-ci il təvəllüdlü Armen Mesropyan silahdan açılan atəş nəticəsində yaralanıb. Ovannisyan Zakaryanın vəziyyətinin ağır olduğunu bildirib. Ermənistanın “shamshyan.com” nəşri yaralıların 2 yox, 3 nəfər olduğunu bildirir. Nəşr qeyd edib ki, onlardan birinin vəziyyəti ağırdır. Məlumata görə, vəziyyəti ağır olan erməni hərbi qulluqçu naməlum səbəblərdən digər iki hərbi qulluqçuya doğru atəş açaraq onları yaralayıb. Daha sonra silahı özünə tərəf tutaraq atəş açıb. Orduda belə şəraitdə itkilərin artması isə əsgər valiydeynlərinin Nikol Paşinyan iqtidarından narazılığını artırır. Elə bu günlərdə Ermənistanın hərbi hissələrində intihar adı qoyularaq öldürülən 25-ə yaxın əsgərin yaxınları İrəvanda hökumət binası qarşısında oturaq aksiya keçirir. Çıxılmaz vəziyyətdə olduqlarını deyən etirazçılar əsgərlərin ölümü ilə bağlı şikayət etdikləri bütün qurumlardan rədd cavab aldıqlarını bildirirlər. Etirazçılar baş nazir Nikol Paşinyanla görüşlərinin də nəticə vermədiyini deyirlər. Ermənistan ordusunda xaosun hökm sürdüyünü bildirən aksiya iştirakçıları qeyd edirlər ki, zorakılıqla bağlı xeyli faktın olmasına baxmayaraq, bunun qarşısı alınmır.
Sonuncu belə hadisə Dağlıq Qarabağ bölgəsində qanunsuz dislokasiya olunan hərbi hissələrdən birində baş verib. Zabit tərəfindən zorakılığa məruz qalan əsgər bu barədə ailəsinə məlumat verib. Yaxınları dərhal vəkil tutaraq məsələni ictimailəşdiriblər. Bundan sonra əsgərin hərbi hissəsi dəyişdirilib. Ailə indi zabitin həbs olunmasına çalışır. Amma hələ ki, onların cəhdi istənilən nəticəni vermir. Özü də orduda təkcə əsgərlər yox, həm də zabitlər işgəncə və zorakılıq qurbanıdır. Polkovnik-leytenant Ara Mxitaryan ətrafında baş verənlər bunun real təsdiqidir. Xatırladaq ki, Ara Mxitaryan ötən ilin sentyabrında Vayots Dzor vilayətinin Yeğeqnadzor şəhərində amansızlıqla döyülüb. Onun atası Samvel Mxitaryan məsələ ilə bağlı bildirir: “Hadisənin başvermə tarixindən 4 ay keçsə də, istintaq yerindən tərpənmir. Cinayəti törədənlər bilərəkdən müəyyənləşdirilmir və ifşa edilmir”. O qeyd edib ki, Paşinyan hadisənin təfərrüatının tam açılacağı və günahkarların cəzalandırılacağına vəd versə də, buna əməl edilməyib.
Hadisənin baş verdiyi ilk vaxtlarda törədilən cinayətə görə sabiq vilayət rəhbərinin köməkçisi Harutyun Qriqoryan və onun qardaşı Zaven Qriqoryanın həbs edildiyi, ancaq bu günədək hadisənin digər iştirakçılarının müəyyən edilmədiyi qeyd edilir. Vayots Dzor vilayətinin kiçik bir şəhərdə baş verən cinayətin üstünü açmaq və günahkarları məsuliyyətə cəlb etmək qarşısında aciz olduqlarının anlaşılmazlığı vurğulanır.
Döyülən erməni hərbi qulluqçunun atası hadisənin ətraflı araşdırılmasına mane olan şəxsin sabiq vilayət rəhbəri Srdat Sarkisyan olmasına əminliyini bildirir. Onun sözlərinə görə, müstəntiqlər onu Vayots Dzor vilayətinin sabiq rəhbəri Srdat Sarkisyanın hadisəyə şahid olmadığına inanadırmağa çalışırlar. O, öz ərizəsi ilə hadisədən sonra tutduğu vəzifədən istefa verən vilayət rəhbəri Srdat Sarkisyanın yerinə onun yaxın adamı, hadisə üzrə təqsirli bilinərək saxlanılan Harutyun və Zaven Qriqoryan qardaşlarının vəkili olan Ararat Qriqoryanın Paşinyan tərəfindən həmin vəzifəyə təyin edilməsini absurd hesab edir. Qeyd olunur ki, hazırda yeni vilayət rəhbəri olan Ararat Qriqoryan hərbçinin heç kimi döymədiyini, özünün yerə yıxıldığını və adları çəkilən təqsirkar şəxslərin günahsız olduğunu sübut etməyə çalışır. Ancaq Ermənistan Müdafiə Nazirliyinin 4 əməkdaşının, eləcə də 3 zabitin ifadəsi mövcuddur. Həmin ifadələrdə zabitlər qeyd edir və Sarkisyanla üzləşmədə də vurğulayıblar ki, Qriqoryanın çağırışı ilə hadisə yerinə gələn 7-8 nəfərdən biri də vilayətin sabiq icra başçısı olan şəxs, yəni Srdat Sarkisyan olub. Onun sözlərinə görə, müstəntiqlər şahidlərin və zərərçəkənin bu ifadələrini gözardına vurur. Ərazidəki kameralardan da görünür ki, Sarkisyan hadisədən öncə binanın blokuna daxil olur. Ara Mxitaryanın qardaşı Karen Mxitaryan da qeyd edib ki, qardaşının vəziyyətində heç bir dəyişiklik yoxdur. Əvvəlki kimi uzanıb, gözləri açıq, baxır, amma heç kimi tanımır. Bütün bunlar zabitlərin də erməni ordusunda təhdidlərdən sığortalanmadığını göstərir. Elə bu səbəbdən ordudan fərarilik edənldr arasında, əsgərlərlə yanaşı, zabitlərin də sayının artması müşahidə olunur. Erməni ekspert Artaq Malikyan bildirir ki, yaranmış vəziyyət ordunun döyüş qabiliyyətini aşağı salır, anarxiyanı dərinləşdirir. O, bu şəraitdə itklərin sayının artmasının da qaçılmaz olduğunu bildirir: “Rəsmi rəqəmlərə görə, təkcə ötən il 49 hərbçi itirmişik. Vəziyyət dəyişməsə, bu il onların sayı daha çox olacaq. Özü də nəzərə almaq lazımdır ki, Azərbaycan Qarabağ məsələsinin hərbi həllini istisna etmir və bu xüsusda fikirlərini daha çox ifadə edir”.
Nahid SALAYEV
