Bu həftə dünyanın 40-dan çox lideri Osvensimin azad edilməsinin 75-ci ildönümünü bayram etmək üçün İsrailə toplaşacaq. Nə qədər maraqlı olsa da, həmin tədbirə dəvətlilər sırasında Ermənistan Prezidenti Armen Sarkisyanın da adı var. Ermənistan Prezidentinin dəvətlilər arasında olması ona görə maraqlıdır ki, həmin ölkənin özü faşizmi açıq şəkildə dəstəkləyir.
İsrail bütün dünyaya yəhudilərin faşizmdən daha çox əziyyət çəkdiyini təbliğ edir. Ancaq maraqlıdır ki, Hitlerin ən yaxın silahdaşı olan və əlinin yəhidilərin qanına batmasına kiminsə şübhəsi olmayan Qaregin Njdeyə heykəl ucaldan, onun ideologiyasını dövlətin idarə edilməsinə tətbiq edən bir ölkəyə İsrail indiyə qədər bir dəfə də olsun irad bildirməyib. İndi isə Ermənistan Prezidentini faşizmə lənət oxunacaq tədbirə dəvət edir.
Ermənistan mediası bunu böyük bayram kimi qeyd edir, hətta bildirirlər ki, analoji tədbiri 24 apreldə Ermənistan hökuməti də təşkil edib, İsrail Prezidentini ora dəvət etməlidir. İsrailin Ermənistanın faşist sevgisinə belə susqun qalması nə ilə bağlıdır və necə qiymətləndirilə bilər?
Elşən Həsənov: “Əks halda, onların faşizm üzərində qurduqları təbliğat tam faş oluna bilər”
Azərbaycan Sosialist Partiyasının sədri Elşən Həsənov qəzetimizə açıqlamasında bildirdi ki, bu məsələdə bir qədər obyektiv və soyuqqanlı olmaq lazımdır: “Bizim İsraillə çox yaxın münasibətlərimiz var. Hətta bu münasibətlər müttəfiqlik səviyyəsində belə dəyərləndirilir, özü də mühüm strateji sahələri əhatə edir. Araşdırdıqda məlum olar ki, Ermənistanın İsraillə münasibətləri bu səviyyədə deyil. Belə amillərdən istifadə edərək, Ermənistan münasibətləri korlamağa çalışacaq. Buna görə də biz bir qədər təmkinli olmalıyıq. Artıq İsrailin öz daxiliundə buna narazılıqlar var. Onların aparıcı mediasında bu amil sərt tənqid edilir. Biz də buna həm dövlət, həm də başqa kanallarla etirazımızı bildirməliyik. Xüsusilə də İsraildə olan çox güclü dayaqlara malik yəhudilərdən ibarət Azərbaycan diasporunun əlaqələrindən istifadə etməliyik. İsrail hakimiyyəti yekcins deyil. Orada da guya ermənilərin də soyqırıma məruz qalan millət olduğunu qabardanlar var. Buna görə ermənilərin iştirakını məqbul kimi sırımaq istəyirlər. İkinci amil isə Türkiyəyə İsrailin təzyiqi kimi ola bilər. İstənilən halda, İsrail burada obyektiv olmalıdır. Əks halda, onların faşizm üzərində qurduqları təbliğat tam faş oluna bilər. Biz də ciddi işləməliyik. Sərt etiraz etməsək, sabah da ermənilər öz saxta soyqırım tədbirinə İsrail rəsmilərini dəvət edəcəklər. Bizim jurnalistlər də bu məsələdə fəal olmalıdırlar. İsrailin rəsmi qurumlarına Njde ilə bağlı aparılan siyasət təqdim edilib, suallar ünvanlanmalıdır. Görək, İsrail rəhbərliyi bu susqunluğunu nə ilə izah edəcək? Dilemma qarşısında qalmaları onları doğru qərar qəbul etməyə vadar edəcək”.
Məhəmmədəli QƏRİBLİ
