21/09/2020 23:19
728 x 90

Deputatlığa namizədlər piar-mütəxəssislərə müraciət etmir, özləri isə yarıtmır…

Məhərrəm Zülfüqarlı: “Elə namizəd var ki, tək bir şüarla seçkidə qalib gələ bilər”

img

2020-ci il fevralın 9-da keçiriləcək növbədənkənar parlament seçkilərində deputatlığa namizədlərin seçki şüarları sosial şəbəkədə geniş müzakirəyə səbəb olub. Bəzi namizədlərin seçdikləri şüarlar ictimai qınağa səbəb olub. Bir qisim namizədin şüarları isə bir-birini təkrarlayır. Yəni namizədlər yeni fikir, ideya ilə seçicini cəlb etmək əvəzinə, bir-birini təkrarlamaqla məşğuldurlar. Məsələn, “sizdən olanı seçin”, “özünüzü seçin”, “ailənizin üzvü”, “sizin kimi”, “sizdən biri” şüarları üstünlük təşkil edir.

Maraqlıdır, deputatlığa namizədlər piar mütəxəssislərlə işləyib uğur qazanmaq fikrində deyillər. Namizədlər elə digər namizədlərin şüarını təkrarlamaqla qalib olmaq istəyirlər. Ancaq xarici ölkələrdə isə vəziyyət fərqlidir. Əksər xarici ölkədə namizədlər seçkidə qalib gəlmək üçün bu işlə məşğul olan piar mütəxəssislərə müraciət edirlər.

  • “…bu bəsit kampaniyaları geridə buraxmaq lazımdır”

Azərbaycanda Vətəndaş Cəmiyyətinin İnkişafına Yardım Assosiasiyasının (AVCİYA) seçki qərargahının rəhbəri Məhərrəm Zülfüqarlı “Bakı-Xəbər”ə açıqlamasında qeyd etdi ki, istənilən namizəd güclü şüarla qalib gələ bilər: “Namizədlər seçki kampaniyasına pul xərcləmək istəmirlər. Seçki kampaniyasına barmaqarası baxırlar. Elə namizəd var ki, tək bir şüarla hər şeyi həll edir. Amerika prezidentlərindən biri “reklama ehtiyacı olmayan prezident” şüarı ilə seçkilərin qalibi olub. Bizdə bu sahə həddindən artıq geridə qalıb. Azərbaycanda imicmeykerlər, demək olar, yoxdur. Elə bir şəxs varmı ki, ofis açsın, seçki kampaniyası ilə bağlı öz xidmətlərini təklif etsin, hansısa namizəd isə onunla müqavilə imzalayıb, imicinin formalaşdırılmasını ona həvalə etsin? Olsa belə, imicmeykerlərə pul vermirlər. Adətən namizəd öz qohum-əqrəbasını başına yığır, ekspertlərin etməli olduğunu qohumlarına tapşırır. Bu bəsit kampaniyaları geridə buraxmalıyıq. Ümumiyyətlə, ölkədə seçki ilə bağlı imicmeyker problemi yaşanır. Gənc imicmeykerlər olsa da, namizədlər onlara pul ödəyib, müqavilə bağlamaq istəmirlər”.

Həmsöhbətimiz hesab edir ki, namizədlər seçki şüarlarına ciddi yanaşarlarsa, onların qalib olmaq şansı da yüksək olar. Ancaq ekspert onu da vurğuladı ki, seçkilərdə iştirak etmək istəyən namizədlərin əksəriyyətinin seçki texnologiyası, təbliğat-təşviqat kampaniyası haqqında bilikləri çox zəifdir.

Günel CƏLİLOVA 

Son xəbərlər