Yanvarın 22-də Azərbaycan Respublikasının Prezidenti İlham Əliyev Davos Dünya İqtisadi Forumu çərçivəsində “Strateji baxış: Avrasiya” mövzusunda keçirilən panel iclasında iştirak edib. Dövlət başçısı panelin moderatorunun suallarını cavablandırıb.
Ölkə başçısına ünvanlanan sualların əksəriyyəti gəncliyin cəmiyyətdəki rolu ilə bağlı olub. Bu xüsusda Prezident ölkəmizdə gənclərlə bağlı yürüdülən siyasətdən danışıb: “Biz onların nə istədiklərini dinləyərdik. Lakin fakt ondan ibarətdir ki, Azərbaycan gəncləri küçələrdə deyil, gənclər universitetlərdə, məktəblərdədir, gənclər startap biznesindədir, gənclər hökumət məsələlərinə fəal cəlb olunublar. Biz çox nəhəng könüllülər hərəkatına başlamışıq və on minlərlə insan ictimai xidmətlər sektorunda könüllülər qismində təlimlərdə iştirak edib. Sonra da biz yaxşı nəticələr göstərənləri hökumət təşkilatlarına işə götürürük. Səmimi danışsaq, dünyanın müxtəlif yerlərində gənclərin küçələrdə olması onları nəyinsə qane etmədiyinə görə baş verir. Onları həyat qane etmir, onların hökumətə olan etimadı itib. Hökumət hakimiyyətə gəlmək üçün populist şuarlardan istifadə etmiş, lakin sonra vəd etdiklərini yerinə yetirə bilməmişdir. Əslində, onlar yalan danışıblar. Bunun əsas səbəbi isə siyasətçilərin məsuliyyətsizliyidir. Çünki biz təkcə Avropada yox, bir çox ölkələrdə onu müşahidə edirik ki, hökumət hakimiyyətə gəlir və dərhal hökumətin rəhbəri təzyiq altında olur. İnsanlar onu seçir, lakin bir ildən sonra o, ona göstərilən etimadı itirir. Çünki yerinə yetirilməsi mümkün olmayan vədlər verilmişdir. Azərbaycanda biz həmişə sözümüzə əməl edirik. Biz heç vaxt yerinə yetirə bilməyəcəyimiz məsələləri dilimizə gətirmirik və insanlarımızın həyat standartları ildən-ilə daha da yaxşılaşır”.
Bunun ardınca İlham Əliyevə maraqlı bir sual ünvanlanıb. “Siz necə düşünürsünüz, Azərbaycandakı gənclər bu baxışı, regional təşkilatın bir hissəsi olmaq və həmin regional təşkilata suverenliyi həvalə etmək istəyini bölüşürlərmi? Azərbaycanda bu ideya yerli səviyyədə dəstəklənirmi?”
Ölkə başçısı bu suala tutarlı cavab verib. Ancaq diqqəti çəkən sualın quruluşudur. Aydın hiss olunur ki, Azərbaycan gəncliyi ilə bağlı hansısa layihə həyata keçirməkdə maraqlı olan güclər var. Hətta ölkəmizin gəncliyini hansısa təşkilata qatıb, onun suverenliyini belə əlindən almaq kimi planların olduğunu vurğulayırlar. Təsadüfi deyil ki, ölkə başçısı Qərbin müəyyən dairələrinin Azərbaycan gəncliyini özlərinə sərf edən istiqamətdə işlətmək, beyinlərini yumaq kimi planlarının olduğunu BDU-nun 100 illiyi ilə bağlı keçirilən tədbirdə söyləmişdi. Davosda verilən məlum sual həmin niyyətlərdən qaynaqlana bilərmi?
Yeganə Hacıyeva: “Həmin sual ölkədə bu sahədə vəziyyətin test olunması, gəncliyin istək və məqsədlərində millilik, dövlətçilik ideologiyasına sadiqliyi səviyyəsinin yoxlanılması üçün idi”
Avropadakı gənclər hərəkatı ilə yaxından tanış olan beynəlxalq məsələlər üzrə ekspert Yeganə Hacıyeva “Bakı-Xəbər”ə açıqlamasında bildirdi ki, moderator Avropa və Asiyanın kəsişməsində yerləşən ölkənin rəhbəri kimi Azərbaycan Prezidentinə daxili və xarici faktorları dəyərləndirməsi hesabı ilə strateji hədəflərin müəyyən edilməsinə yönəlik çoxsaylı sual verdi: “Bunlardan biri də məhz Azərbaycan gəncliyi, onun regional formatda fəaliyyəti, belə fəaliyyətin perspektivləri və gözləntiləri haqqında idi. Daha konkret desək, Azərbaycan gənclərinin regional təşkilatın bir hissəsi olmaq və regional təşkilatların mövcud coğrafiyada inkşafı və möhkəmlənməsi məqsədi bir sıra siyasi təşəbbüslərin ora həvalə edilməsi ideyasının, ümumiyyətlə, mövcudluğu haqqında məlumat almağa yönəlik sual idi. Azərbaycanda belə ideyaların yerli səviyyədə dəstəklənməsi və sair.
Azərbaycanın və bizim gəncliyin əsas ideyası və ideologiyası suverenlik, müstəqillik və öz ehtiyatlarımıza güvənmək olmasını qeyd edən Prezident ölkə rəhbəri və xalqın lideri olaraq əsas hədəflərdən birinin Azərbaycanı özünü təmin edən, heç kimdən asılı olmayan ölkəyə çevrilməsi olduğunu qeyd etdi. Bu günə qədər yürüdülən siyasətin prioriteti kimi iqtisadi müstəqilliyin əldə olunması da bu faktorun məhz siyasi müstəqillik üçün bünövrə kimi olmasıdır.
Prezident, həmçinin, qeyd etdi ki, Azərbaycanda beynəlxalq – regional qurumlarda təmsilçiliyimizlə bağlı hər bir məsələyə praqmatik yanaşma mövcuddur”.
Ekspert bildirdi ki, sırf bu mövzuda Azərbaycan gənclərinin regional təşkilatlarda təmsilçiliyi, bunun müsbət tərəfləri və narahatlıqları haqqında danışmaq istərdi: “Zamanında bir çox nüfuzlu regional gənclər təşkilatında, onların idarə heyətində təmsilçiliyi olan biri kimi onu qeyd edim ki, Azərbaycanda çoxlu sayda gəncin istər dövlət xətti, istərsə də müstəqil formada dünyanın bir çox regional təşkilatında təmsilçiliyi mövcuddur və olub.
Regional təşkilatlar, əlbəttə, mən də daxil, üzvü olan gənclərə müasir dünyanın tələblərinə cavab verən, müasir, cəld, çevik komanda idarəetməsini öyrənmək, strateji kommunikasiya alətlərinə və onlardan istifadə vərdişlərinə yiyələnmək, yüksək səviyyədə əlaqələr qurmaq və ən əsası, daxili və xarici risq və perspektivlər faktorunun nəzərə alınması ilə regionda və dünyada gedən prosesləri dəyərləndirmək imkanlarını inkişaf etdirmək üçün unikal şanslar yaradır.
Lakin bu, müzakirə etdiyimiz mövzunun pozitiv tərəfləridir, bunun neqativ tərəfləri isə bu gənclərin regional təşkilatlarda kənar maraqlar üçün istifadə cəhdləridir. Onların ölkə daxilindəki siyasi-ictimai aktivliyinin beynəlxalq təşkilatlarda hökumətlərə təzyiq kimi, məsələn, etiraz aksiyalarında bir neçə saatlıq da olsa polis tərəfindən saxlanmasını və ya təsadüfən cüzi zədələnməsini beynəlxalq qurumların sessiyalarında hökumətlərə qarşı arqumentlər olaraq istifadə olunmasıdır.
Uzunmüddətli hesablarda isə ölkə daxilində kənar nüfuz agentləri kimi, cəmiyyətlərə yad dəyərlərin daşıyıcısı kimi, nüfuz liderlərinin yetişdirilməsi, bunun məntiqi axarı kimi yad dəyərlər daşıyıcısı olan alternativlərin yaranması və bunun üzərindən çox asanlıqla dövlətlərin milli maraqlarına zidd gedə biləcək liderlərin yetişdirilməsinə, belə liderlərin yönləndirə bildiyi cəmiyyətlərin və uğur qazanacağı hallar isə hökumətləri öz məqsədləri üçün idarə olunması perspektivləri güdürlər.
Məhz moderatorun Azərbaycan gəncliyinin suverenliyin bir qisminin regional təşkilatlara həvalə olunması fikrinin mövcudluğu haqqında sualı, ölkədə bu sahədə vəziyyətin test olunması, gəncliyin istək və məqsədlərində millilik, dövlətçilik ideologiyasına sadiqliyi səviyyəsinin test olunması və ölkə rəhbərliyinin bu haqda düşüncələrinin bəyan etməsi üçün idi”.
Məhəmmədəli QƏRİBLİ
